《我獲得一個願望，我選擇左係學校做一次男神》: 第十九章：出院

今日終於都出院，做左咁耐宅男，知道自己終於都可以離開密室，真係差啲激動到喊出黎。

不過屋企人今日都要返工黎唔到接我出院，咁啱芊雪又得閒，咪叫佢黎接我出院囉。
不過芊雪未黎，醫生就入左黎同我講野，唔係唔比我出院下話。

「白生，今日出院啦，有幾樣野提你，首先盡量唔好做太激烈既運動，如果攰，感覺到頭暈就要即刻休息，第二，保護好心臟，以免受到猛烈撞擊，同埋最後一樣野，唔知係好消息定係壞消息，我地估計到你心臟擴散速度，導致心臟完全壞死既時候，係你... 」講下講下，原來我已經訓著左。
「白生？聽唔聽到？」
「係！係，聽到，繼續。」
「我要講既野已經講完，你可以出院啦，同埋你父母話佢地叫左個女仔接你，個女仔好似仲未黎喎。」係喎，芊雪唔係黎接我出院架咩？
「我會聯絡佢架啦，呢段時間唔該晒你，你去做野先啦，唔好左你時間。」見係熟既醫生，先咁樣講野。





醫生都走左，我打比芊雪，但係佢無聽到電話，唔係出左咩事下話，平時佢都唔會遲到或者放飛機架喎。
我再打多幾次比佢，都係飛左去留言信箱。

但係我聽到有高踭鞋聲接近，唔通係芊雪？
「哎，Sorry啊，遲左黎接你添。」見到芊雪今日著得好靚，著左條白色連身裙，粉紅色高踭鞋，唔通佢今日有約？
「哇，做咩著到咁啊？」
「無啊，黎接你囉，今日同你出街，咪著靚啲，唔好睇咩？」當一個女仔問「唔好睇咩？」就係男人既死期。
「好靚啊，你今日好似公主。」但係有啲說話由心發出，對方我感覺到既；我仲發現芊雪今日搽左少少粉，令到塊面紅卜卜，個妝又幾啱佢。
「嘻嘻，多謝喎。」




「既然約左我，不如我地行啦，我都想出去吸收下啲新鮮空氣。」

我收拾好啲衫褲鞋襪，零碎雜物，就離開左醫院。
唔通我三個月都無出過黎行咩？點會唔出黎行下啊，不過都只能夠係醫院範圍內，而且我有一樣野唔明白，呢三個月我都無痛，但係都唔比我出院，肯定係攞我黎做咩人體實驗啦。
「係呢，今日我地去邊啊？」
「去邊，去你屋企囉。」去我屋企？點解去我屋企啊，雖然我好耐未返過屋企姐，都唔洗帶埋個女仔返去下話。
「點解啊？」
「唔通你諗住攞住咁多野周圍行？比你擺返低啲野啊，蠢材。」招牌動作，一下搣左攞黎，不過無以前咁痛，咁大力，我諗佢都唔想再對我有過度既肉體傷害。
「多謝你喎，咁體諒我呢個病人。」
「你仲好講，我每日用左幾多時間係你到，又買野食，又照顧你，又走...」未講完句野，佢就收左口。




「走咩？」「你唔係為左我走堂下話？」呢個傻妹真係，為左我走堂都有既，我唔值得你為我做咁多野，我已經無能為力去報答你。
「你唔會嬲架何？」見佢縮埋一舊，又停左係到，不過我又點會話佢啊，佢都係為左我先咁做，做人邊可以咁忘恩負義。
「點會嬲啊，傻妹，多謝你啊，無你，我真係寧願早啲死左佢。」
「唔得！點都唔可以死！」我冷笑一聲，然後搭住佢膊頭，繼續行去搭車。
雖然我地仲未係情侶，但係我地相信，我地之間既關係好舒服，亦都好享受，無謂做多餘既野，傷害對方。

返到屋企，放低啲野，個傻妹係我屋企走黎走去，明明得五百幾尺，佢都可以好似跑左幾個圈咁，喘晒氣。
「返到黎屋企既感覺真係好。」自從住hall之後，都無乜點返黎，返黎食飯都係得一兩次，同時我亦伸下懶腰，話晒我屋企都係半山，不過係馬鞍山，咁都叫有新鮮空氣呼吸下啊。
「擺低完啲野要行啦，夠鐘啦。」咩夠鐘，唔通芊雪咁快訂左戲飛？
「我地睇咩戲啊？」我地已經出左門口等車。
「睇冰河世界，係咪好想睇呢？」明明就係你想睇多啲，不過同芊雪一齊，睇咩都無所謂啦。

入到去太古城個間戲院，人煙稀少，難怪既，今日係平日，芊雪今日day off先陪到我，不過個衰女day off都會走堂黎接我架啦。
「我想食爆谷，買比我。」著左條公主裙，原來會附送埋公主病...
我見自己都有少少肚餓，就買做個餐，大爆谷同大汽水，呢個份量，完全只有肥仔先可以駕馭到。




（稍後仍然加推第二篇。）