《我獲得一個願望，我選擇左係學校做一次男神》: 第十八章：別 離
「唔係啊，我肯啊，你講啦，你想我幫你做啲咩？」見佢淚珠留係眼眶之中，我都唔係幾好意思再講。
「好，既然係咁，我聽日話你知；而家我有啲攰，想抖下先，不過，多謝你，為我走堂，等左我咁耐，浪費左你啲時間係個就黎死既人上面添。」
「唔好再講啦...」芊雪開始喊起黎，雙手緊握成拳頭。
我拖住無乜力氣既身軀落地，攬住芊雪，感覺到佢喊得越犀利，淚水已經沾濕左我件衫，我亦無謂叫人唔好喊，喊都係人之常情，邊有得話停就停。
我再輕輕摸下佢個頭，今次無再整亂佢個all back頭，的確，芊雪既頭髮真係好柔順，比人好舒服既感覺。
「阿明呀，應承我唔好走...」就算點講都好，生離死別都係天注定，但係為左芊雪，我都講一次大話。
「唔走，點會走。」佢再將我攬得更實，見佢趷高咁辛苦，我都蹲低啲，比佢攬得舒服啲。當佢將兩隻手都放係我條頸上面，我諗起穎心，我同佢最後一次相擁，我唔想芊雪都要經歷同樣既野。
我慢慢放低芊雪，佢都無再喊，我用手幫佢抹乾啲眼淚痕，望返住佢個樣，真係喊到成隻豬頭咁。
最後我錫左落芊雪個壓頭一下，佢呆左一秒，然後一野搣落我塊面到。
「邊個比你錫我架，變態佬！」佢令轉面，但係從玻璃窗反光，見到佢係到偷笑。
我即刻再攬住佢，佢又想掙扎，搞到我地同時跌左落張病床到。
「咳咳，白先生，呢到係病房黎，同埋你身體仲未康復，請你自重一下。」
壓住我既芊雪馬上彈左起身，我向門口一望，原來係護士。
今次我都感覺到我自己有啲面紅，點知芊雪紅到好似成個蘋果咁，真係搞笑。
「白生，你份報告已經出左，麻煩呢個小姐出一出去先。」
我都示意芊雪走先，唔想佢聽到呢個殘酷既結果...
其實我一開始係大排檔已經鍾意左呢個男仔，我未拍過拖，但係一見到呢個男仔，就覺得佢可以比到安全感同埋幸福我既男仔。
唔知點解一聽到佢話自己就黎死，我個心揪左一下，好唔舒服，甚至係好唔捨得佢，阿明比人一種好奇妙既感覺，好吸引，好想探索佢既生活，更加想入侵佢既生活；但可惜，佢講得無錯，人始終要離開世界，只係快慢之區，但係我未同佢睇過戲，未行過街，未傾過電話，好多好多野都想同阿明做，唉，個天卻偏偏咁對我。
「白生，你好幸運，心臟惡化情況減弱，係因為受左猛烈撞擊，而擴散速度醫生開始掌握到，亦能夠估計幾時到末期，係好消息，詳細醫生會同你交代返。」太好了！仲唔洗死住，我曾經一刻諗過，如果一個月內我就無命，就即刻同芊雪表白，但係而家，唔知點解更加想同芊雪表白...
「阿仔，個女仔走左既？仲諗住請佢食飯添。」
「請食飯呢啲野我搞咪得囉，洗乜麻煩娘親你。」其實我只係驚佢地會係芊雪面前亂講野。「唔得，你做野求求其其，敷衍了是，話晒人哋都救過你一命，無叫你以身相許已經好好啦。」以身相許？開玩笑咩。
我打左個呵欠，扮好眼訓：「好攰啊我，你地放低啲野食走先啦，我瞌一陣。」
當佢地走既時候，我再凝視外面既環境，雨，已經停左，太陽亦都從雲朵中冒返出黎。
係醫院真係好悶，又唔係成日有人黎探我，多數都係芊雪同男班長黎探我，阿峰就已經去左英國讀書，每次諗起佢去英國，都覺得佢會見到穎心。
到左第二日，芊雪都同樣時間黎探我。
「阿明，我又黎探你啦。」芊雪每次黎探我，都帶啲野食黎，同我傾計，好過老豆個啲多多聲，老豆個啲次次都係粥，粉，搞到我瘦晒，好彩芊雪都有啲人性，會幫我買M記。
「嗱，比你食一次架咋，之後都唔會幫你買M記架啦。」嗚呼，終於食到久違既M記。
「知啦，訓三個月終於食到M記，好滾動啊！」無錯，我足足住左三個月，第一年既大學，我就無返三個月學，都幾威下。
「下個禮拜就出院啦喎，有咩感受啊。」
「唉，我唔係悶死就抑鬱死。」每日一係打機，睇書同埋睇下社工啲野，波又無得睇，更加唔洗旨意踢。
「喂啊，我日日黎陪你，無我，你先悶死啊。」
「係囉係囉，次次黎都搣到我塊面紅晒，如果我唔係無反抗之力，我一定打爆你個頭。」
「你夠膽？！」芊雪一黎，我地都展開咁樣既對話，老實講，我地既感情增長得唔錯，有時都會打下情罵俏，摸下個頭，搣下塊面，都係情侶溫馨既場面，但最後我都只會屈服係呢個小美人身上。
「你今年半個sem都無上堂喎，係咪要repeat啊？」講到呢層，我都唔知點算好，不過我諗以我聰明才智，凈係讀一個sem都升到上Yr２啦。
「我都唔知啊，讀到咪讀囉。」
「乜你咁架。不過你差我一套戲未睇，出院之後，一定要陪我睇。」哇，咁耐都記得，真係記仇。
「得啦，點會呃你。」
「唔得，要勾手指尾。」細路女真係細路女，真係唔知佢隨時比人呃走...
「好啦。」同佢勾完手指尾之後，我食埋個M記，就訓著左。
唔知點解有時訓覺個陣，佢都入到我個夢到。
「明仔，我今次比機會你繼續生存，唔該你完成我比你既託付。」呢個人真係好鬼長氣。
「知啦，我又唔係對佢無好感，感情要培養架嘛，大佬。」
「好，我比多半年時間你，如果你追唔到芊雪既話，我會拆散阿峰同阿樂。」痴線，感情無得逼架嗎，我追唔到又要搞到落阿峰到，難得佢有女朋友，你而家話拆散佢，你咁樣都係想我一定要追到芊雪，好，我就成全你。