《我獲得一個願望，我選擇左係學校做一次男神》: 第十七章：命危

自從我出世無幾耐，醫生就話我個心有病，亦都係不治之症，雖然唔會好似癌症咁，但係呢種病，一擊舊病復發即中，可以暈左之後，以後都醒唔返，更可以，瞬間死亡。究竟係咩病，叫咩名，連醫生都唔知，凈係知道，我心臟入面有不明物體擴散，可以擴散得好快，亦都可以擴散得好慢，只係在乎個天想我幾時死。

「明仔，又係我啊。」唉，估唔到病都要見到你。
「點啊請問？我係絕對唔會再特登揾穎心，唔洗再求我啦。」我用強硬既態度同佢講野，希望先發製人。
「今次唔係叫你揾穎心，只係比一個懲罰你，你唔聽我地講野，唯有將你懲罰，下個可以唔係你，但係可以係你既屋企人，巴打，芊雪，甚至係穎心。」
「咩話！我比你懲罰我，但係你唔可以掂我親人一條頭髮。」
「唔...你都當晒佢地做親人，都幾深情啊。好，我破例比一次機會你，但係你醒返之後，同我追芊雪返黎。」
我靜左幾秒，竟然又有啲怕羞，興奮既感覺。
「點解...係芊雪。」
「因為你鍾意佢囉，你唔洗唔承認啦，天仙無所不知，呢到得我同你，點解要收收埋埋呢？」我真係懷疑呢個人前世係讀心理學，下下係到咄咄逼人。




「係好感，啱傾姐，而且人哋只係小妹妹，無謂搞人啦。」
「好，你唔出手，你自己後悔。」

「喂！」當我想伸隻手捉住佢既時候，我好似打到啲野。我再擘大雙眼既時候，我見到我阿媽同老豆。
「哎，sorry打親你添。」見到老豆係到捽眼，我打中既應該係佢。
咦，咪住，點解我見到穎心既？
「穎心！你點解返左黎既？」
「啊仔，你叫緊邊個啊，病房得我同你阿媽，同埋呢個送你黎醫院既女仔咋喎。」我都捽一捽隻眼，又好似唔係穎心，穎心高過呢個女仔好多。
「芊雪？！」
「點解你係到架？」




「衰仔，人哋幫你叫救護車，等到你醒，你個衰仔多謝都無聲，仲要咁無禮貌同人講野？」阿媽一野打落我個頭到，好彩無乜用力，唔係既話，我諗我應該可以暈多次。
「哦..唔該晒你啦。」我都唔知講咩好，最多之後請佢食飯啦。
「唔洗。」佢既笑容比以前淺色左，係咪因為我病，擔心我，定係仍然內疚打左我一拳呢？
「老豆，娘親，你地可唔可以出去一陣，我有啲野想同芊雪講，一係幫我買碗粥食。」
「好啦，你好好報答人哋啊，人哋對你咁好。」
「我...」我野都未講完，就出左病房。

我望出窗外，見到而家落緊雨，搞到我都唔係幾好心情。
「阿明啊，我有啲野想同你講。」
我令返轉個頭，望住芊雪。




「我想同你講聲對唔住啊。」芊雪認真，不但只收起笑容，難得一見既少女氣質亦都出左黎。
「無野啊，你打我個拳都唔關事，呢個病我係從少就有架。」雖然關唔關事都仲未知，但係個下真係特別痛。
「哦... 咁就好啦。」呢個傻妹真係。
「話時話，點解會係你送我過黎既？」

佢好奸咁對住我笑。
「其實本身係你roommate送你架；不過我感覺到個心有啲痛，我就即刻係lecture room跑出黎，跑下跑下，見到好多人圍住，咪去睇下，點不知真係你出左事，仲要暈左...」竟然芊雪個心會痛？咁啱姐...
「所以你就係到騎劫，扮係你幫我叫白車，仲同我上埋白車？」我都估到芊雪啲衰野，佢都無即刻否認。
「我仲話你係我男朋友，佢地先肯比我上車，你唔會介意架何？」男朋友？！
不過佢都係內疚先咁緊張姐，算啦，大人有大量，不記少人過。
「唔緊要啦，你都係擔心我姐，下次唔好啦。」
當我講完呢句野既時候，佢好似有啲唔開心，唔通我講錯野？
「芊雪啊，你點解一心痛，就會跑過黎揾我既？」雖然我咁問好奇怪，但係為求知道原因，都係逼不得已。
「我都唔知架，感覺就係感覺架啦。」
感覺？算啦，唔重要，我而家只在乎我仲能夠生存幾耐。




「芊雪啊，其實我都唔知仲有幾耐命，但係我有一樣野未完成到，你願唔願意幫我成就？」
「我...點解。」見佢好似唔係幾願意咁，我都唔為難佢。
「算啦，當我無講過。不過，真係好多謝你，雖然我地識左唔係好耐，但係都叫幾啱傾，而且做埋你入U第一個朋友，我都好榮幸架，不過呢，我地呢段友誼唔知可以維持到幾耐，希望人走左，但係友誼就永固啦。」我都唔知點解咁感觸講左呢段野出黎，可能人到死之前真係有啲遺憾啦，而且芊雪係我心目中有啲特別...
（稍後再加推第二篇)