《我獲得一個願望，我選擇左係學校做一次男神》: 第十六章：新伴

其實芊雪幾好啊，又得意，又唔鍾意同埋啲MK仔啊，毒男一齊，不過，如果我無變到男神，佢仲會唔會走埋黎揾我呢。

琴日飲完酒，坐左都好耐，返hall沖涼就訓左；到左今日，朝早無堂既我，正係躊躇緊有咩做既時候，我收到個whatsapp。
芊雪：「一唔一齊食早餐啊，我等陣有要堂上啊。」
點解呢個人會有我電話...
我：「好啊，去canteen食？」隻手好似唔受控制咁，明明好攰，想訓多陣，但係諗起可以見到芊雪，就情不自禁咁應承左。
芊雪：「梗係canteen啦，唔通仲出去咩。」

我地９點約左係canteen等，平時無堂真係唔會咁早出去。
我係遠處見到芊雪，點解我咁快就認到佢？因為佢身形矮，而且幾時都扎住個all back頭。




「喂，咁早既。」我拍一拍佢個頭，佢光速令左過黎。
「做乜拍我個頭！」見佢好似真係嬲咁，但係我都無用力拍。
佢咩都無講，一野搣左落我塊面到，算，我錯，就範一次。
「入去食野啦，乜我塊面真係咁好搣咩？」佢聽完之後，塊面有少少紅，就直接行左入去。
入到去之後，因為我地都係第一次食中大canteen既緣故，觀摩左一陣先買到野食。
「我請你食啦，當係賠罪。」佢岳高頭望上黎，笑左一下，再好順手咁搣左我塊面一下。當佢成日搣我既時候，我已經覺得無乜野，更加習慣左佢會對住我咁做。

揾左個位坐低，我地都係食三文治算，佢就趕時間，我就太早無胃口食野。
「芊雪啊，點解你會有我電話號碼既？」我咬住啖三文治問佢。
「喂啊，你噴左啲菜落黎啊！」




我反一反白眼，講左聲唔好意思。
「傻仔，尋日我地一坐低個陣，你部電話係褲袋到跣左一半出黎，我咪乘機攞左你電話跟住打比我囉，所以你而家都有我電話架啦！」佢塊面紅紅地，又成日笑，雖然性格細路仔左啲，但係都幾可愛啊。
「我食完啦，今晚約你去睇戲，再揾你，上堂先。」佢一起身就整跌張凳，我即刻忍住笑，全場既眼光都注視係到。
佢睥一睥我，我即刻起身陪佢走。
「做咩咁激動，洗唔洗連張凳都整跌埋。」我繼續恥笑佢。
「咩姐，人哋趕時間阿嘛，唔準笑人啊！」佢今次無再搣我，反而一拳打落我心口到，我即刻禁住心口，點解唔係痛一兩秒，仲要感覺到啲骨都斷埋咁。
「喂，你無事阿嘛？我無心架，洗唔洗call救護車啊？」見芊雪個樣咁驚，我唔想嚇親佢，都係扮無事算。
「無野啦，可能之前踢波整親，打到舊患姐。」但係真係好痛，好似想就黎吐血咁。
「對唔住啊，下次唔打你啦，都係搣返你算啦，好無？」佢水汪汪既雙眼，白裡透紅既臉狹，我搣左佢塊面一下，同佢講聲真係無事，就打發左佢去上堂，希望佢唔會內疚啦。





返到hall，我個心口仍然痛緊，好似比支長矛刺左入咁。話時話，我都無乜點同個roommate傾計，一係就我走左出去，一係就佢出去，兩個只係見過面，訓同一間房，連個名都唔知，難得今日仲見到佢坐係到睇Youtube，同佢傾下計先。
「Hi，我地都好似未認識大家喎。」我嘗試同佢打開話題。
「係囉，我地一係就上堂，出左去，都無乜機會認識大家。」又係客套說話，仲要繼續望住部電腦。
「你叫咩名啊？我叫阿明啊，讀社工，有時都會出去踢波。」
佢終於令個頭過黎，當佢令過黎既時候，我已經暈左，跌左係地下。