《我獲得一個願望，我選擇左係學校做一次男神》: 第十五章：往前

上到大專，玩完ocamp，真係要開sem上堂既時候，有啲掛住中學時代，覺得自己好老，好似完全唔想長大咁，因為知道讀完大學之後，好快就要躋身係社會工作。

「係呢，唔好理佢地住啦，你有無住hall啊？」
「梗係有啦，讀大學點可以唔住hall架。」呢個芊雪真係成個妹妹仔咁，搞到我都有小小鍾意同佢傾計。
「得閒出黎食野啊，我都有住hall架。」揾定人陪，如果個roommate好摺既話，我都可以揾下芊雪。
「好啊。」見佢個樣好期待咁，搞到我都有啲興奮。
「芊雪啊，我個兩個朋友黎唔到啊，我地自己食啦。」唉，好彩都叫啱傾，唔係既話，成餐飯都無人講野。

食完飯之後，芊雪話佢下就有堂要返去先。我就未有住，等我即刻揾返個兩個賤人。
「喂，你地而家仲得唔得閒啊，出黎飲杯野都好吖。」




「好啦好啦，我同男班長行過黎揾你啦。」

見佢兩個行緊過黎，我都叫定半打啤酒先。
「搞乜啊你兩個。」兩個凈係係到笑。
「見你終於肯識返個女仔喎，梗係唔會阻住你啦。」
算，我知道於心何在，都係想我放低穎心，揾第二個女仔。
「唔好凈係講我啦，男班長，你點啊？」見佢終於留返長啲頭髮，唔再係平頭裝，帶埋副文青眼鏡，成個人唔同晒，靚仔好多。
「我啊？我入到港大醫學啊。」
「咩話！港大？仲要讀醫？」對我黎講，係港大讀醫難過升天。
「嗯，所以大家之後有咩事，都可以揾我。」男班長露出左佢邪惡既笑容。




諗起如果自己要做手術，個醫生係佢既話，我寧願死左佢算。

「阿峰，你就去外國啦，係呢，去邊到啊？」當我問佢既時候，佢個樣好似想迴避問題咁。
我再追問佢，「係咪去英國？」佢都唔好意思答，只係默默點頭。
「唔洗咁喎，我唔會叫你幫手揾穎心架，我唔係癡纏到咁。」我咁講完，阿峰個心應該好過啲。

我地不斷飲酒，亦不斷講關於大學既野；有咩憧憬，識左啲咩人，見到啲咩靚女，都一一講晒出黎，好舒服，自從穎心走左，個心都未試過咁釋懷，巴打就係有咁既用處。
「大獲，我唔記得有堂上添。」男班長無端端大叫。
望下隻錶，原來都四點幾，枱上面全部係啤酒，得一兩碟餸。
「算啦，一堂半堂，咪走左佢囉，你唔係諗住成陣酒味去上堂啊？」阿峰都係張枱到爬返上黎同男班長講野。




「好啦...」唔係下話，上少一堂要灰到咁咩？唔通醉翁之意不在酒？。
「喂，家成，你係咪有女朋友。」我用邪惡既眼光睥住佢。
「無！無，點會呢。」
「你覺得我地會唔會信你？」阿峰攞起支空酒樽，擺係枱角，完全係爆樽前既動作。
「係兄弟先同你地講咋。我鍾意左ocamp個組媽。」我同阿峰互相對望，隔阻唔夠兩秒，同步笑左出聲。
「笑，笑咩姐。」見到佢騰晒雞個樣仲搞笑，「果然係我地既男班長，平時有女唔睇，一睇就睇中組媽，有大志。」阿峰一到講仲一到笑。
「算啦，我地唔笑你啦，講其他野啦。」有人性既我，幫男班長轉移話題。
「係呢，頭先個女仔係邊個黎架？」衰仔啊，幫你轉移話題，而家倒反轉頭講我？
「無，我都係啱啱先識，見係讀中大先傾幾句囉。」個心好似唔係咁諗，明明就幾好傾，唔通我...
「加油啊，見人地個樣都幾乖，幾可愛，唔好教壞人啊。」明明我先係好人，仲要係咁比人搣。

不過，芊雪又真係唔錯既。