《我獲得一個願望，我選擇左係學校做一次男神》: 第十四章：芊雪？

放榜個日，我都入到我想入既大學同學系，其實我想做社工好耐，今日終於比我讀到，而且係中大，心裡面都有小許既興奮。
「喂，阿峰，你入左咩大學啊？」我懷著興奮既心情打比阿峰，唔知佢會唔會都係讀中大呢。
「唔...我...」搞乜啊，明明啲口吃無晒啦，仲係咁既？
「我要去外國讀書。」
「下？」
「你考得好差咩？」
「唔係啊，反而考得唔錯，所以屋企人先叫我出國讀書。」唔係掛，即係又要少個摯友。
「唉，我都唔想架，放完暑假，我就走架啦，我都係趁呢段時間見多啲你地啦。」講到好似死咁，不過，可唔可以唔好好似穎心咁，去左英國之後，仍然係音訊全無。
「好啦。我地之前都掛住溫書，都少左出黎飲野，不如我地就聽日出黎啦。」
問過男班長，佢都話無問題，順便問下佢讀咩大學都好。





到左第二日，我都訓到成十二點先起身，好彩係約一點。梳洗完，行過去大排檔，即係我地既老地方同飯堂，見到佢地都好似未黎，咁我就自己坐低先。

我望到有個女仔係大排檔啲欄杆外面望住我，仲要望到實一實，我即刻令轉頭望下後面，但係後面都無人啊，唔通我以前識佢？見佢兩個未黎，我決定起身行過去問下咩事，比人咁樣望法，好唔舒服。
「妹妹，請問你望住我係咪有咩事呢？」我已經用好溫柔既語氣問佢。行近啲，原來呢個妹妹仔都幾靚，幾可愛，雖然比較矮小，仲要成個妹妹仔咁向上望先可以同我講野。
望住佢水汪汪既眼睛，扎起個all back頭，頭髮仲啡啡地色，望落去好似好順滑咁，笑起黎個樣仲要好似穎心...
「我唔係妹妹！我同你同年架！」下，雖然你著住件ocamp既衫，但係個樣...
「你唔信？」佢趷高腳搣我塊面。
「哇！痛痛痛。」我即刻彈開幾米遠，搣到我紅都面晒。
「信啦，信啦，咁你係咪揾我有咩事？」我仍然保持住幾米距離，以免我塊面再遭襲擊。





「我地可唔可以坐低傾啊？」又係扮可憐，不過又幾得意既。
「但係我約左我班FD喎。」我的確約左男班長同埋阿峰，無理由叫佢一個人坐係到聽我地吹水架嘛。
「唔緊要啦，一齊坐啦，話晒我同你同一間U。」佢依起排牙，個樣真係好渴望同我傾計咁。
「唉，好啦，怕左你啦，佢地都未黎，我地坐住先啦。」
坐低之後，妹妹仔先開口講野，真係多口水。
「其實我叫芊雪啊，我今年Year One，住係九龍塘，同你一樣都係讀中大架。」咪住，點解你知我讀中大！
「點解你又知我讀中大架？」
「你自己都著住緊件ocamp既衫，你係咪傻左？」今鋪樣衰左添。
「咁你頭先做咩係企係出面望住我？」終於可以返正題。




「我見你係中大，我又無乜FD，咪想揾下啲正常啲既人玩下，做朋友囉。」
「下，你去完ocamp都識唔到FD咩？」
「ocamp個啲好多毒男，唔係毒男就係MK，好噁心。」咁又係既，可惜你太遲遇上我啦，我都不禁偷笑左一下。
「你笑咩啊？」佢再想搣我既時候，我已經即刻彈起，成功避開佢既攻擊。
「坐低啦，唔玩啦。係呢，都唔知你叫咩名喎。」
「我啊？叫我阿明得啦。」我唔係幾鍾意人哋知我全名，所以都係叫阿明算。
「無啦？讀咩架？等我睇下。」佢撥開我隻手，望住我見ocamp tee。
「哦，犀利喎，讀社工。」呵，洗乜講。
「你呢？」我先唔會好似佢咁望住件衫，費事佢以為我係變態佬。
「我讀中大護理架。」
「係呢，你個兩個朋友唔係黎同你食飯咩？」
衰仔，兩個一齊遲到？
「等我打比佢地先。」當我打緊比阿峰既時候，佢cut左我線，send左個信息比我：「同個女仔食得開心啲啊，我地識做架啦。」仲加埋個恥笑我既emoji黎，大佬，本身我唔係同佢食...而家要搞到得返我同佢食撐枱腳...