《我獲得一個願望，我選擇左係學校做一次男神》: 第八章：決戰一

暑假話咁快完左，但今年出奇地過得充實，唔再係打機，訓覺，而係練波同搞學生會，其實每個人對「充實」既定義都唔同，但係比較上黎，後者，更有意義。

雖然到左返學日，但係放學之後，為左要贏同阿軒約定既比賽，我同我隊友差唔多隔日就練習一次，把握機會；因為聽講，佢請返黎既全部都係名校校隊精英；的確以前我會驚唔夠勁，但係而家，我相信我隊友，更加相信自己會贏到呢場比賽。不知不覺，我同阿軒之間既決鬥越黎越多人知道，應該都係個男班長講出去架啦，死人大喇叭。

每日返學凈係諗住足球戰術，點踢好啲場波，可以好快放學。但係如果我再繼續咁樣落去，我諗我連班都升唔到。

「今次係最後一次練習，後日就係正式比賽既日子，大家比心機踢好場波，贏左既話，我應承大家，我每個禮拜都同大家踢一次波，好無！」作為隊長兼領隊既我，為左贏到場波，犧牲少少自己既時間都無所謂。
「今日，我唔洗大家做啲咩，我凈係想大家睇一條片，係佢地名校校隊精英踢比賽個陣既精華。」點解唔練波，熱下身？或者呢啲既訓練做得太多，反而比佢地知道對方既實力，比自己一個心理準備都好，正所謂，「知己知彼，百戰百勝。」希望，係咁啦。

大家都好認真睇條片，為左足球，佢地可以去到好盡，即使訓練好辛苦，都無一句半句怨言，我好欣賞佢地，更加喜歡同佢地一齊踢波；運動，就係有呢種驚人既凝聚力。





最後一次練習都已經過去，等待緊我既，只剩下一場關乎穎心幸福既決鬥。

去到比賽場地，入到更衣室。
「今日，雖然有少少雨，但係無阻我地去贏呢場比賽，係咪！」我以激昂既士氣講野，希望可以感染到佢地，精精神神咁去踢呢場比賽。
出到場外，雖然係維園，更加雖然係兩隊無名之戰，但係見到願意企起到圍觀既都唔少，當然我地學校學生佔多數啦。
佢地都好齊心咁答：「係！」搞到我有少少感動。
比賽開始！摘完銀仔，結果係我地開波先。
我同阿元企係中圈入面，佢一傳波比我，我就係咁跑，成個扭過一，兩個人，因為佢地都未反應得切，平時開波邊有人即刻衝過去；好快，我就對住對方既防守中場，叫做好堅固既一個關口，佢無跑過黎攞我波，反而係到睇實我，當我繼續推既時候，係我後面有個人衝左過黎，訓身鏟低左我，踢到咁茅都有？踢波定踢人？我諗佢咁樣鏟落黎，有紅牌啦下話。
「過黎！一次警告！」求證跟住比左自由球我地就行開左。




咩話，一次警告？！我即刻行上去同求證投訴。「喂，佢後面鏟落黎，無紅都有張黃牌啦。」
「黃牌？好，我比。」佢指住我，係我面前高舉左張黃牌，寫低左號碼。
心諗，發咩顛？
算，我係隊長唔可以亂黎，再係咁就黎紅牌離場添啊。自由球比返佢地，都係返去幫手防守。

見佢地個個都６尺高，好彩我都唔矮，爭頂頭槌應該無乜大問題。
差唔多佢地中圈後少少既位置開出，哇，估唔到後生仔都踢到咁大力，正好砍到黎我個位，見到我身邊個位都幾高下，不過都要頂架啦。點不知，佢一下扯返我落地，搞到我失重心跌低，球證都無吹罰，頭腦細膩既人都知道，球證係對面隊既人，估唔到足總球證都可以收買，好野！

對方既高佬係禁區頂用個胸控定粒波，轉身抽射，我身都起唔切，係地下睇住個波飛埋去龍門到...