《我獲得一個願望，我選擇左係學校做一次男神》: 第七章：備戰

暑假最後既一個禮拜，我隊波已經透過地獄式訓練，可以晉升到兼職球員既水平，我覺得已經好好，以前，個中場成日傳甩波，而家成個派路咁，下下都可以傳係我地腳下，而阿元，佢都有好大進步，把握力好左好多；聽聞原來阿元佢好怕做前鋒，怕錯失機會會被人罵，令到自己好自卑，但係今次訓練唔單只訓練技巧更加訓練埋佢地心裡質素，令阿元係門前信心大增。
隊波就搞得七七八八，但係阿峰個學生會就...

「阿峰，搞左半個月，我地成個內閣都係得５個人，咁樣落去，點贏啊。」５個人既內閣，聽落去都好笑。而除左我地三個巴打之外，我地揾到一個女仔，叫阿樂，個樣平平無奇，短頭髮，矮矮地，笑起黎幾可愛咁囉，不過對眼係啡色，我好鍾意啡色眼睛既女仔，好吸引，可能因為穎心對眼都係啡色先覺得靚。
而另一位成員係男既，係男班長既朋友，個樣同男班長一樣咁毒，希望佢幫到手啦。
點解我呢個男神唔出手宣傳，招攬人手？無謂啦，學生會靠既係政綱，往後既目標，唔係單靠外表。
「阿明，唔好睇小五個人既力量，有無聽過人多做事手腳亂。」都係既，但係搞學生會，唔係人多好辦事咩？算啦，五個人分工容易，雖然多野做，但係可以好專注。
「係既。」
「好，黎到暑假最後一個禮拜，大家預備成點？」阿峰問到，我既職位係副會長，即係花瓶，同會長出去應酬下，簽下合約，同第二啲學校聯校咁囉。
「阿明係同我負責同一個專項，所以我地無咩問題，亦都順利咁同幾間大既公司簽約，可以比到優惠我地學校。」




「男班長，係搞活動方面點？」其實搞活動呢啲通常都係當選先做，不過為左比野男班長做，先塞比佢。

差唔多開左三個鐘頭既會，究竟五個人點開三個鐘頭，我自己都唔知，因為我已經攰到爬係到。
「會就開完，大家返去準備下質詢會需要既野啦。」其實質詢會咪即係辯論會，都係係台上面做小丑，等台下班人恥笑下咁。
「阿明，一唔一齊食飯？」見佢仍然係擺住個認真樣，又無叫埋其他人，即係有野想同我單獨講啦。
「好，去前面個間大排檔？」
我地一直行過去，直到坐低都未開過聲，氣氛好奇怪，我又唔想打破悶局。
「明，我有啲野想同你講。」好，睇下你有咩要交代。
「凈係叫你黎，我想你唔好話比人知。」我點頭示意，而且我從來都唔講人哋秘密出去。
「今次我同阿軒鬥係有原因，我亦都知道你同佢暗地裡鬥緊，最終贏左個個可以同穎心一齊，而輸左個個以後都唔可以見穎心。」最後個句...有講過咩？不過輸左都無面見穎心啦，但我相信贏既會係我。




「從前我同阿軒係好好朋友，大家由細玩到大，不論踢波，打機，甚至會一齊出街。」估唔到，佢地以前係咁好朋友。
「但係，直到上左中學，升左讀男女校，我個奇怪既性格就出左黎，你都知道架，就係同女仔講野會死機；而阿軒上到中學都變左好多，可能都係同我一樣，男校小學，但係佢見到女仔，就會好雀躍，同埋佢樣又唔差，又識搞下gag，哄下啲女仔，仲要有跟班，真係性格決定命運。」咁樣講，呢個阿軒真係好賤格，連青梅竹馬既兄弟都可以唔理。
「就係咁，佢覺得我好無用，開始唔想理我，排斥我，仲揾人打我。」阿峰露出佢既左臂比我睇，見到一條埋左口既疤，但係我諗傷得最深既係阿峰既內心，唉，阿峰個心一定揪住揪住。
「阿峰，所以你就同佢下戰書，要做到學生會。但係，輸左又要點呢？」真係純粹好奇問下。
「輸左既，就要永遠離開香港，同埋唔能夠再接觸穎心。」
「哦，你地兩個一齊追穎心，又係公平競爭。」既然係咁，三個人同時作出公平競爭，咁即係我都要同阿峰鬥？
「阿峰，我同你...」我都唔好意思講出口。
「無野既，如果你贏到穎心，我都好高興，至少唔係落入禽獸手中。」佢搭住我膊頭，同我飲杯，希望佢講呢句野係出自內心。