《我獲得一個願望，我選擇左係學校做一次男神》: 第九章：勝利在望？

當我轉頭望個波飛緊埋去個龍門既時候，有人踩左我隻手一下，好痛，好陰濕，痛到好似骨折咁；個個都轉住緊個波入唔入既時候，條友特登踩落黎，就可以避過球證法眼，唉，點都要忍！雖然呢個世界係黑暗，但係我要用實力同你地講，呢啲小技倆係唔能夠贏到我地！

「咇！！」球證指向中圈，代表已經入左波，雖然龍門已經撲到盡，但仍有半寸之差。好強，果然不負校隊精英呢個隊名；但係咁快就失守，令我地都有啲不知所措，真係完全無諗過。
「隊長...」阿元同我講野，但係我唔想答，只係想專心比賽。
「唔好講野，專注！」佢亦都即刻望返住前面，準備開波比我。
同一招唔可以用兩次，我都係傳返去後面算。
我地一直守，佢地就一直攻，我地完全無機會反擊。

上半場終於完結，雖然再無失球，但係我地一次射門都無，防守得好辛苦，好攰。
「大家聽住，我知道大家好落力，但係記住，佢地好茅，唔單只要防守，更加要防埋佢地啲陰招。」




「同埋...」我想講落去既時候，阿元打斷左我。
「個球證都係佢地既人，唔好同球證嘈。」估唔到踢左波一段時間，阿元仲可以知道我想講咩。
「無錯。我地依返上半場黎打，雖然好辛苦，但係我同阿元會合力將大家既努力化成入球！」
「我地叫聲先！」
我將手擺係中間，隊友們亦都隨即將手放上去。
「加油！」
雖然我們沒有隊名，
從前互不相識，各人有佢既長處短處，但係一隊波就係要咁既人，互補不足，先能夠成為一隊足球隊！

阿軒已經係中圈等開波，圍觀既人越黎越多，雨亦得越落越大，但係無阻大家睇波既心情。




係群眾裡面，我睇到一粒星星，好特別，好靚。係穎心，佢黎左睇比賽，佢彎彎既笑容，在嘴角成為左一粒最閃耀既星，多謝你，穎心。
「開波啦，望。」阿峰係中圈開波，佢亦都見到穎心黎左。

「咇！！」球證指示可以開波，阿軒傳比中場球員，開始進攻，我當然會睇實阿軒。
阿軒已經走到我面前，揮手叫隊友比波，佢攞到波之後轉身一跑，估唔到佢跑得咁快，我只好叫後面啲人過去防住阿軒，可惜過完一個又一個，我既隊友好似雪糕筒咁企晒起到，我都唔想罵佢地，唯有睇下龍門既表現啦。

已經去到禁區頂既阿軒，雖然前面無人，但佢選擇左射波，今次究竟救唔救到呢，個波已經飛左去右上角，龍門一起跳，手指掂到波皮！成功改變方向，係龍門後面跌返落黎。

呼，好彩，嚇死我。





對方既角球，我只係企左係出面，費事又比人犯規，而且有利於快攻。球證指示可以開出，希望佢地能夠頂返出黎比我。開出既時候，砍到去十二碼位，阿軒準備起跳，可惜唔夠我地既中堅高，成功頂返出黎，仲要係我腳下；我馬上加速，推波，係我前面既得返一兩個防守球員，雖然想鏟我，但係我已經輕易咁避開左，佢地亦都追唔到我。

黎到單刀既機會，作為前鋒，好大壓力，我再望下穎心，佢緊握住拳頭，聚精會神咁睇住我，我相信，係佢心底裡，已經有左答案。
當我去到龍門前，我感受到一陣涼風，一望，原來阿軒已經跑到返黎，我一射門，今次真係大獲了，一下跣腳，仆左係到，又係要坐係到望住粒波入唔入。

對唔住，我辜負左大家對我既期望。