《我獲得一個願望，我選擇左係學校做一次男神》: 第六章：後生阿伯?

過左半個暑假，隊波都好準時，積極咁練波，但係實際上能力仍然有啲水皮。
我決定幫佢地進行地獄式訓練。再次黎到維園，係遠處見到阿元，係佢地之中最好波，亦都係前鋒。
「阿元，時間唔係得返好多，我希望可以迅速提升大家既能力。」
「你想？」眾人已經圍埋一齊，等待我既回答。
「我想幫大家進行英超球會式既訓練，簡稱英式訓練。」見大家都唔係幾明，睇黎我要講白啲。
「首先，跟住落黎個幾個禮拜都會比較辛苦，一個禮拜要四次訓練，包括健身，比賽，戰術，同埋睇比賽等等。」
「所以唔係次次都要消耗大家體力，大家可以放心。」佢地好似明白晒咁，我就唔客氣啦。
「今日要做體能訓練，大家先推住波跑１０個圈，然後做５０下掌上壓。」睇到佢地滴晒汗，但係為左佢地，更加為左穎心，不得放棄。

由三點訓練到六點，大家表現唔錯，我都放佢地走，今日咁練法，搞到我都有啲攰。





返到屋企，我涼都未沖，我就訓左，而且發左個夢。
係夢入面，我再次聽到「後生阿伯」既聲音，但係今次唔單只聽到，終於見到佢個樣，咪住，點解咁似我以前未變男神個樣既？
「咦，明仔，又見到你哦。」阿伯撩我傾計，但係明明係我毒男既樣，只係把聲係老牛。
「點解，你個樣？」我忍唔住問佢。
「哈，呢個樣咪係你以前未變男神個樣囉，而家比我封印左啦，而你身上既男神外表，本身係我既，但係上面話見你咁可憐，就交換左咁囉。」點解可以咁靈異，雖然呢個男神身份唔錯，而且好滿意，但係對從前既自己竟然有啲依依不捨。
「明仔，唔好諗咁多野啦，既然你開到聲話要做男神，咁咪繼續做落去囉，忘記背後，努力面前啊，穎心，注定係你架啦。」當我想問點解我會遇上呢個阿伯既時候，我已經醒左，睇下時間原來已經１０點，再諗返佢話穎心注定係我既時候，我有啲猶豫。
訓左係到，望住盞燈，腦海裡一片空白；但又諗起每人都有佢自己人生既路要行，毒有毒行，毒都可以繼續生存，何必強求做男神呢，而且知道要為左穎心去同個痴線佬爭既時候，我打左個冷陣，我真係驚，我驚穎心會落入佢手中，更加驚做左男神之後，會變得一無所有。

唔知男班長同阿峰佢地點呢，打比佢地先。




「喂，男班長，阿峰，你地點啊？」我一次過打比佢地兩個。
「無啊，日日係屋企打機，打到悶咪做功課囉。」果然係男班長，經典毒男一個。
唔知阿峰點呢。「我準備緊學生會。」
「咩話！」阿峰搞學生會？
「我係認真，為左打贏阿軒，我要參選。」打贏阿軒？佢地有過咩淵源，要以參選學生會做賭注。
「學生會好多野搞架，你掂唔掂架，阿峰。」
「唔掂都要掂，你地兩個肯唔肯幫手？」兄弟問到，一定應承。
「你叫到，我實幫手。」估唔到男班長比我仲快應承。
「你呢，阿明？」
「我無問題啊！」




「好，係到講聲多謝先，我地仲有好多野搞，聽日出黎傾下得唔得？」
我地都答應左阿峰，真係完全估唔到，對住咁多人講野會死機既阿峰，而家為左贏阿軒，願意突破自己，好勵志，我都要好似佢咁，打低阿軒，等佢唔能夠再傷害我地。



既然阿軒同阿峰都已學生會決鬥，咁索性第二句決鬥，就用學生會做賭注，當選既就贏一局。

原來係我同阿軒宣戰個日，穎心已經知道，仲要好嬲，話我地好白痴，但係無辦法，為左穎心既幸福，委屈一時，幸福一世，值得既。