<明明係黑社會，我就同老婆講自己係臥底>: 第九回
成個貨倉剎時間就變左戰場，子彈橫飛。
我依ｄ醒目仔，梗係即刻搵位哩埋啦，我踎係ｄ貨箱側邊，聽住ｄ子彈係前後左右咁穿梭，嚇撚到我鳩頭都縮。而柒強條屍就灘撚左係隔離，柒強阿柒強， 有怪莫怪呀，我都估唔到人地咁撚狼死架．．．依？柒強件褸好似有ｄ野跌左出黎，古古怪怪咁既，好似以前睇戲既時候見過．．．唔通！！
嘭！嘭！
頭先搶我個喼果條友，連中兩槍之後就扒撚左係我前面，個喼入面埋白紙同埋兩支槍都晒出黎，咪講笑，都係「蠟」番支槍旁下身穩陣ｄ！
嘭！嘭！嘭！嘭！
嘩，估唔到豪哥佢地個個都咁撚勇猛，眼都唔眨下，對家再有兩件訓底左係度，終於有機會俾我表現喇！我半踎半行咁靠近，拎住支槍雞手鴨腳咁對住訓係地下果兩件蛋散講：「嗱！大佬！有怪莫怪，唔關我事架！唔係我隊冧你架．．．」
嘭！嘭！終於開左人生第一次槍．．．嘩，屌！近得滯開槍，ｄ血彈撚到我成條褲，仆你個街．．．
過左無耐，豪哥佢地已經搞掂晒對方ｄ人，而森爺條「mok契」宜家時候先斯斯然咁行出黎，佢一望到我，就笑面虎咁近果黎同我講：「Billy仔，你咁撚樣都無事，好野好野！．．．」
大煲，似乎佢想對我郁手！
我：「森爺！你．．．你睇下，你睇下柒強佢，我頭先見佢件褸跌左ｄ野出黎，你睇下，原來係通訊器黎架！！仆佢個街，原來就係佢出賣森爺你，所以我幫你「辣」低左佢！」
森爺見到，若有所思咁：「原來佢先係鬼頭仔．．．Billy仔你做得好，．．．哎！今次仆街！！有皇氣係附近，大家拎埋批貨就閃！」
話口未完，貨倉兩邊都有警察衝入黎，睇黎貨倉鐵門同埋後門兩邊出口都已經俾警察守住，睇黎今次真係猩猩打飛機．．．
豪哥係最撚有義氣果個，佢將條車題拋俾我：「Billy仔，我宜家同幾位兄弟去後門果邊幫你地開路，出到去你就渣車帶森爺走先！」
一講完，豪哥同幾位兄弟就一邊同警察駁火，一邊迫近後門，而我同森爺就跟係後面。
嘭！嘭！嘭！嘭！成個貨倉再次火光四起，混亂間，我望到黃Ｓｉｒ係追捕我地既時候中左兩槍倒地，而果個劉Ｓｉｒ就好似關公上身咁款，好撚凶狠咁係後面追住森爺黎射。
幾經辛苦，豪哥佢地終於幫我同森爺殺出條血路，仲搏晒命咁掩護我地上車，我開車既時候，見到後門有唔少兄弟都訓低左，但已經唔理得咁多，我拿拿林開車同森爺離開先。
係咁危急既情況，我發揮出作為飛鵝山車神既本領，時速１２０公里咁用飄移技術連過幾個髮夾彎。我同你地講，其實飄移係一ｄ都唔難。嗱，就即係咁，你一入彎，拉一拉手制，架車個屎忽「bel」一「bel」，就係咁簡單。
我係倒後鏡見到森爺佢左手同埋大脾都流緊血：「森爺，你見點呀？你流左唔少血ｗｏ！」其實我係想知佢死得未。
森爺：「無．．．我無咩事，係擦傷姐．．．果條仆街，竟然想攞我命！！」
咁撚樣都攞唔到你條命，梗係仆街啦！
森爺拎住個電話出黎，原來係打俾威哥：「阿威，今次賴晒野！你快ｄ拎我地社團果本「祖籍」出黎，然係收埋係鐵館果度，快！」
「祖籍」？估唔到森爺咁撚孝義，依個時候仲諗住去拜山。
森爺收左線之後就同我講：「Billy仔，我果幾個竇口都已經唔安全，宜家去你個鐵竇避一避先！」
唔撚係掛！？去我度！？？？
P.S. 如果覺得依個故仔有趣，希望你可以到小弟FB度俾個Like，以作鼓勵～
https://www.facebook.com/devilcard
