<明明係黑社會，我就同老婆講自己係臥底>: 第六回
係交易前一晚，我同Boey係屋企食完飯之後，就自己一個上左天台食煙。
食食下，我就突然俾人禁係地下。
我嚇撚到慌：「喂喂！咩事咩事，大佬點錯相呀大佬！」
然後有把男人聲係度講：「Billy仔，你個鐵竇都幾難搵架wo！」
捉住我果個人鬆開手，我終於可以轉身望清楚係邊條仆街，原來係有兩個人，一個係黃Ｓｉｒ，另一個我就唔識，但我記得佢係大茶飯當晚都有上黎踩場。
我：「黃Ｓｉｒ！？你地兩個想點呀？？」
黃Ｓｉｒ：「無～Billy仔，有野想搵你幫幫手姐～我知道森爺聽晚又有大茶飯，到時想你透露個交易地點俾我地知姐～」
黃Ｓｉｒ佢地已經知道聽晚既交易！？社團入面果然有鬼，究竟係邊撚個！？
我：「你痴撚左線咩黃Ｓｉｒ，我有咩可能去做二五仔幫你先？俾ｄ兄弟知道既話，我仲會有命！？你都硬撚鳩！」
黃Ｓｉｒ：「Billy仔，你唔幫我就算啦～不過，就算你唔幫我，都唔代表你會有命wo～」
黃Ｓｉｒ講完之後，就拎左部電話出黎，然後播段片俾我睇．．．又係你，Boey！！！我真係俾你激撚死！！！
段片播左無耐，就見到有幾個女人係間餐廳食飯，其中一個係Boey，其餘果Ｄ應該係佢果班八婆姐妹。
其中一個八婆：「嘩～你老公原來咁把炮架！？我睇佢果樣，都知唔簡單架喇，估唔到原來係臥底！」
Boey個樣就好撚自豪咁答：「哈哈哈哈哈哈～～～～～o拿～你地千祈唔好同其他人講呀～～～佢既行動係要保密架～～～如果唔係，好危險架～～～」
另一個八婆：「放心啦Boey，唔熟果ｄ朋友我一定唔會同佢地講架～係呢，咁你老公完成任務之後，係唔係即刻復職架？到時佢會係督察定係警司呀？快ｄ同我地講啦～～～」
成段片，有一半既內容就係關於個衰婆點樣大大聲叫佢ｄ八婆姐妹唔好周圍同人講我係「臥底」，另一半既內容就係Boey果把死人笑聲，佢笑到咁撚 樣，究竟會唔會笑到失禁，我真係無心情去理解，事關我自己都就黎嚇到失禁．．．如果依段片俾森爺佢地睇到，我實會俾佢到斬開百九幾碌！！
黃Ｓｉｒ：「我收到風，森爺佢懷疑你係鬼頭仔，若然依ｄ時候俾佢睇到依段片，你都知道有咩下場架啦！」
依鋪我真係俾Boey個衰婆累撚死！！！
我：「黃Ｓｉｒ，你唔好信個衰婆講呀！！！我唔係咩臥底黎架，我幫唔到你地架！」
黃Ｓｉｒ：「我地當然唔會信你係臥底啦～我地已經查過你，你唔會係臥底黎既．．．你又唔打得又唔睇得，似馬伕多過警察啦～不過咁，你都有野可以幫到我手既～」
我：「黃Ｓｉｒ，唔好玩我啦．．．我都唔知交易地點．．．而且你唔係都派左隻鬼入黎咩！？有佢通知你咪得lor．．．我真係幫唔到你手架．．．」
黃Ｓｉｒ：「森爺佢份人好撚古惑，唔知佢幾時講真幾時講假，所以我想買多個保險．．．放心，到時你咩都唔洗做，只要將依樣野放係你隻鞋入面就得。」
黃Ｓｉｒ一邊講，一邊指住佢伙記手上既一個小型裝置。
黃Ｓｉｒ：「劉Ｓｉｒ手上拎住既，係一個追蹤器，到時你只要放係鞋入面，我地就會知道你既位置。」
果位劉Ｓｉｒ就將個追蹤器放係我手上：「Billy仔，你咁醒目，應該識得點決揀架啦，我保證，只要你幫我地，段片一定會俾番你～」