<明明係黑社會，我就同老婆講自己係臥底>: 第五回
番到屋企，未開門之前，我原本諗住屌柒個衰婆做咩Ｓｅｎｄ埋ｄ硬鳩短訊，搞到我爭ｄ俾人斬開十碌八碌，點知我一開門，Ｂｏｅｙ就即刻飛撲埋黎，抱實我好o爹咁講：「老公豬，你好勁呀！頭先新聞話你地搜獲左批毒品呀～～～咁你係唔係可以唔洗做古惑仔，做番警察呀？」
個傻婆望住我，雙眼發光，當正我係英雄咁。佢咁撚仰慕我，搞到我唔想講個真相俾佢知．．．
我唯有好無奈咁講：「傻豬．．．仲未得呀．．．都未拉到人．．．」
唉，今次條「水」斷左，森爺又跌左幾百粒，成班兄弟今個月都唔知有冇飯開，但個傻婆就讚我好撚勁．．．依一種情況，我諗部份睇緊依篇野既青頭仔都有相似經歷：
你同班Friend吹水，大家都年少氣盛，毛都未出齊，吹水好多時都離唔開「性」或者「邊個女同學對波好大」之類既話題，
依ｄ時候，總係會有條友好撚威咁分享點樣同自己既性對手大戰，講下講下，你就發現原來其他Friend既經驗值都已經唔再係零，對於你依個青頭仔 黎講，當然係好大打擊．．．正當你好懊惱點解自己仲係「處」既時候，失驚無神有條仆街將個焦點轉向你，問你既第一次係點，又問你同你Partner試過幾 多花式，
大家望撚住自己，咁梗係老虎蟹都話自己有幾勁幾勁，同個對手大戰左不下數百個回合咁啦．．．咁其實都無講錯既，你又的確同「對手」－左手同埋右手，經歷左好多個寂寞既晚上．．．
對住個傻婆問埋ｄ咁撚尷尬既問題，而我仲要對住佢笑，真係眼流在心裡流．．．
如是者過左幾個禮拜，突然有一晚，收到豪哥既電話，話阿森爺有重要事想見一見我，叫我上去龍風大茶樓。
咁夜仲叫我出黎，究竟搵我咩事呢？．．．仆街！唔通森爺仲係懷疑我係鬼頭仔？
但又好似無咩理由，若然係懷疑我，唔會咁撚明顯特登叫我出黎啦。但無論諗唔諗得通，其實我都冇得揀，唯有到時執生。
上到去茶樓，原來阿森爺已經開定間大房等緊，而豪哥同柒強佢地都係門口守住。
豪哥：「Billy仔，快ｄ入去，森爺佢係入面等緊你。」
入到去，見到森爺坐係度，而成張枱都係餸，佢見我黎左，仲四萬咁口叫我快ｄ坐底食野。
睇黎森爺今晚心情好好，之前跌左果幾百粒都好似唔記得晒咁．．．
森爺：「Billy仔，快ｄ食啦，凍左就唔好食架喇～」
我：「係既森爺．．．阿森爺，你搵我．．．係唔係有ｄ咩事想吩咐我去搞？．．．」
森爺並冇即刻答我，佢反問：「Billy仔，你跟左我幾耐？」
我：「都有兩年幾架喇！」
林爺：「原來都兩年幾架喇．．．Billy仔，我打算遲下再入一批貨，今次想俾機會ｄ後生仔，咁多兄弟當中，我最信果個就係你！」
嘩，無耐前你條仆街先懷疑我係鬼，轉個頭就話最信果個係我，咁撚樣都講得出，真係屌你老母．．．
我：「森爺，你放心，我會做到好好睇睇。」
當時我一心諗住，只要我幫森爺搞掂依單野，應該可以令佢繼續相信佢，而且仲會重用我．．．
