<明明係黑社會，我就同老婆講自己係臥底>: 第四回
睇黎我真係淆撚晒底，竟然舉起手，好似小學生問老師俾唔俾去廁所咁款：「森．．．森爺，部．．．部手機係．．．係我．．．」
森爺聽到我咁講，就行埋黎，用部電話隊撚住我塊面問：「Billy仔，你可唔可解釋一下，o麥撚野叫『邪不能勝正』，o麥撚野叫『任務』！？」
俾森爺咁樣兇一兇，我個腦已經一片空白，驚撚到腳震，完全唔知道應該點兜好，開始胡言亂語：「森．．．森爺，咁．．．咁我地拜開關二哥，咁我地咪就係『正』lor．．．」
講完之後，唔知邊位兄弟，細細聲彈左一句：「差佬夠係拜關二哥啦．．．」
仆你個臭街！香港人鐘意睇人仆街真係無講錯！
森爺繼續笑面虎咁問：「哦～關二哥下化．．．咁『任務』又係咩黎呀？」
我吞大啖口水，繼續諗到咩就講咩：「我．．．我同屋企隻乸講今晚有大茶飯，佢份人又．．．好撚崇拜古惑仔，所以咪成撚日幻想我地好似職業特工隊咁lor．．．」
屌，我究竟係度講緊咩呀！？！？
森爺繼續笑笑口：「哦～職業特工隊下化．．．」
係佢講野既同時，佢望實我包到成隻糭既左手。
硬係覺得依一幕，好似唔知係邊撚度見過．．．而且仲ｆｅｅｌ到唔多老黎．．．
森爺突然捉撚住我隻左手，大大力咁拍落去張枱度！！！
好！！！撚！！！痛！！！呀！！！！我屌你老母臭西！！！！！
你條死老野！！！！你唔撚係當自己係曾智偉呀！！！！睇戲睇到你傻撚左咩！！！
當然，以上幾句，我並冇講出口．．．我只係好似一個俾人省中春袋既足球員，有苦難言。
慢慢，左手既紗布，好似滲出微黃色既液體．．．
依一下，好明顯就係森爺佢柒撚左，另一方面，在場有幾位琴晚同我打邊爐既兄弟，望住我隻左手，都忍唔住笑左一聲，氣氛好撚尷尬。
係依個時候，豪哥即刻出黎解圍：「森爺，Billy仔佢唔會係鬼黎既，雖然佢只係跟左你兩年，不過佢好細個果陣，大佬B已經帶佢入社團，我地都由細睇住佢大．．．仲有，你睇下佢，唔打得又唔睇得，柒下柒下，似馬伕多過似差佬啦！」
我屌你老味，俾個喇叭你周圍唱好唔好．．．其他兄弟做足花生友既本份，企埋一邊陰陰咀笑。
豪哥再黎一招柵埋門教仔：「Billy仔，你痴撚左線咩，做咩同屋企隻乸講有大茶飯呀，你下次咪撚再咁喇！」
森爺聽到豪哥咁講，面容終於都放鬆番，而我亦都暫時鬆一口氣。
「拍！拍！拍！．．．森爺，威哥話有班差佬衝緊上黎呀！」睇場果條友，係暗門既另一邊咁講
睇場友講完唔夠兩秒，就聽到出面有人大叫：「差人查牌，一個二個同我企定定咪撚玩野！」
唔洗幾耐，班差佬亦都搵到入黎，第一個行入黎既，我認得佢，佢就係重案組黃Ｓｉｒ。
黃Ｓｉｒ望住森爺，笑笑口咁講：「嘩，又會咁岩既森爺，同成班兄弟出黎叫雞呀？」
森爺亦不甘示弱：「黃Ｓｉｒ，咁你又點呀？拉唔到大賊就轉去掃黃組呀？」
黃Ｓｉｒ：「無～見今晚有時間，咪去幫掃黃組ｄ伙記出黎行個圈ｌｏｒ～～．．．嘩嘩嘩，成枱電話既？阿森爺，ｏ麥你轉左行學人賣二手電話咩？
呀～咁又係ｗｏ，聽講你今晚ｄｕｍｐ左幾百粒落海，唔搵其他外快，點養住你成班兄弟呀～講開又講，我部手機塊保護貼甩左，森爺可唔可以幫手換過塊？哈哈」
森爺終於忍唔撚住，再一次曾志偉上身．．．佢一手將枱上面所有電話掃撚晒落地下！
大家知唔知咩係「含撚咀」？
就即係咁，有條友明明無講野，只係擘大個口得個窿，但你都ｆｅｅｌ到佢個咀好似同你講「屌，今次真係含撚．．．」，此之為含撚咀。
而在場所有兄弟，望撚住自己部電話係地下，都齊齊擺出一幅「含撚咀」既表情．．．除左我～～
事關森爺左手掃跌枱上面ｄ電話之餘，右手依然緊握住頭先拎起既我果部電話。
心涼～～～今之終於輪到我望撚住班花生友，報以陰陰咀笑既表情～班花生友只可以對住我咬牙切齒～
森爺：「ｄ電話我係買番黎ｄｕｍｐ既，吹咩！」
黃Ｓｉｒ：「森爺～做咩事咁燥呀？～～咁鬼燥，不如你去叫下雞出下火會比較好ｗｏ～呀！唔好意思，唔醒起我地岩岩連你ｄ雞都冚埋～Ｓｏｒｒｙ～～咁無計啦，你都係去打飛機啦，唔阻你地，慢慢打，我地走先～」
好明顯，黃Ｓｉｒ今日黎特登上黎挑釁。
黃Ｓｉｒ講完轉身就走，森爺俾人踩到上心口，唯有攞番個尾彩．．．佢右手大力一ｄｕｍｐ，將我部電話ｄｕｍｐ係黃Ｓｉｒ隔離，再好撚兇咁講：「屌你老母！我唔會就咁算既！」
好野好野．．．森爺不愧為大佬輩，唔單只好撚有霸氣咁ｄｕｍｐ我部電話，仲好撚有霸氣咁將我心入面果句都講埋出黎．．．屌你老母．．．
風水輪流轉，今次又輪到班花生友對撚住我黎笑。
望住地下我果部支離破碎既電話，我開始明白，點解會有ｄ傻閪可以對住個爛玻璃杯都當係藝術品咁欣賞，仲要打晒飛機咁作埋文，無他既，若果你都好似 我咁，買左部電話唔夠一個星期，黎緊仲要供十二個月，如今就變成堆玻璃，莫講話當係藝術品，叫你當係魚生咁食落肚，你都會笑笑口讚個電話好撚鮮甜啦。
就係咁，今晚我地條「水」俾班死差佬截左，我地所有兄弟部電話報銷左，我手上既水泡爆撚左．．．我仲差ｄ俾森爺當係鬼，爭ｄ連命都無。
我仲以為，所有事情可以暫時告一段落，點知真正既大鑊野，陸續有黎．．．森爺真係一隻好撚陰險既奸狗！