《90後銀行小妹甩轆記》: 《富貴由天》(下)

銀行定期會倒一些call list入system，未到數的同事只好努力call客，證明自己有努力過，製造更多activity。
 
自從陳生收咗我皮之後，我好努力繼續Call客。無錯，平時大家好憎收到關於貸款的Cold Call，有可能是小妹打出的，所以，如果大家以後收到姓溫嘅銀行職員電話，唔該唔好即刻cut線。
 
講返我張新App，話說我大約打了100個電話，終於有位年輕的女士有興趣同我傾多兩句，我更成功約了她到分行辦理申請手續。
 
到了中午，目標出現，她看上去大約三十歲，打扮非常斯文樸素。
 
「楊小姐，好多謝您有興趣申請本行嘅私人貸款，宜家先同您填返啲申請資料，唔知您想貸款嘅金額係幾多呢？」
 




「溫小姐，我想準備買樓，可唔可以借三十萬做首期一部份？」楊小姐期待著我的答案。
 
咦？咩玩法呀！借完錢做首期，再借錢做Mortgage？媽呀，我好亂呀！
 
「唔知楊小姐您之後有無打算再做按揭呢？因為申請按揭時，銀行會check TU，到時發現首期係借返嚟而又未還清，未必會批按揭。」
 
「下……其實係咁嘅，本來我同老公睇中左個單位，但點知個業主反價，計落條數仲差少少。咁仲有無其他方法呀？」楊小姐非常擔心的樣子。
 
「方法唔係無嘅，係高風險啲。一係你同先生其中一方申請私人貸款，咁假設係楊小姐您啦，您就將呢筆錢送比您先生做首期，而買樓方面只用一個人名義買，就由您先生申請按揭，但問題係層樓就只係落佢個名，睇您點睇啦。」其實我亂吹的。
 




「eh……唔落我個名......咁樣……梗係唔得啦！」楊小姐突然好激動咁拍枱，比比鳥RM正好呢個時候得閒，走咗過嚟食花生。
 
比比鳥RM，他的外號以他的髮型命名。其實我一直不明白為何十個男同事有九個都是這類髮型。學星爺話齋「髮型呢家嘢，係要襯架！」，你以為你剪了這個髮型就會成為大文豪，弄不好在別人眼中你只是肥仔恩。
 
「點解！點解我地儲咗咁耐錢，都仲上唔到車！嗚……」楊小姐忽然爆喊，斷斷續續地說：「點解啲樓價又要升返！點解係我地就嚟上到車嘅時候班X街又要反價！點解呀……嗚呀……」
 
呢個時候，除了遞紙巾，我也不知說甚麼好了。就像社會跟她開了一個玩笑，一個原本快可達到的願望，一下子就溜走了，我感受到她在這個社會下掙扎求存的辛酸、無奈，不禁眼濕濕。
 
「我唔想再等啦，我驚繼續升……嗚嗚……」楊小姐哽咽著，泣不成聲。
 




我聆聽著她的哭訴，一邊安慰她冷靜一點。
 
「小姐，如果一直儲錢都追唔上通脹、追唔上樓價，您有無諗過點樣令您啲錢增值？」一直站在一旁食花生的比比鳥RM終於發話了，成為現場哭泣聲的終結者。
 
「嗯？」楊小姐頓了一下，不解地望著比比鳥RM。
 
「如果您願意承擔風險，其實方法有好多種。我可以為您提供專業理財方案，希望幫到您盡快上車。」比比鳥RM chok了一個很charm的樣子注視著楊小姐雙眼，老實講，幾型。
 
楊小姐若有所思地點了點頭，隨即，比比鳥RM邀請她到他的房間繼續詳談，這一談便是一小時。楊小姐出來時，已經簽好了我那份私人貸款申請表。
 
過了幾日後的briefing，得知比比鳥RM的investment target又追近了一點，他受到老闆高度讚揚如何完美演繹cross-selling，讓楊小姐將貸款再投資，將成功嘅可能性擴到最大。
 
我不知道楊小姐後來會否成功上車，但深信冥冥中都早注定了富或貧，盡了力就好，真的要如此執著嗎？