《90後銀行小妹甩轆記》: 又到中秋

有好多公司過時過節都有得早放，我真心好羨慕，但做分行真係得個恨字，唔通我哋貼住「東主有喜，提早打烊」咩，上面啲大老闆都唔肯過我哋啦。不過咁，每逢過節我哋都有些少福利享受到。

臨近中秋，我間行收到好多果籃月餅朱古力，有啲係上面派嘅，有啲係合作公司送嘅，有啲係啲熟客送嘅。當中有一款係比較出名的某某酒店月餅，咁新仔Teller同事Ernest又好鍾意食喎，佢一得閒就會走去攞嚟食，有時仲會攞果籃啲嘢返屋企添。

今日晏晝，比比鳥RM同Connie姐吹水，Connie姐是分行的另一位高級客戶經理，娜姐的死對頭，至於佢地之間的恩恩怨怨，我之後再講，無謂喺節日講呢啲咁掃慶。傾傾下，比比鳥RM就問Connie姐食咗某某酒店月餅未，點知Connie姐面色一沉，講咗句「梗係未啦，啲人食7咁食」。
 
之後好衰唔衰，Ernest幫Connie姐個大客過數時又唔小心出錯，眼見Connie姐入咗老闆房詐晒型，最終Ernest都係被照肺。

辦公室向來都係一個極度階級嘅地方，做細嘅應該要識得分莊閒，唔係會死得好慘。





所以，每位同事最好做好自己關公，真係唔好不停食不停食不停食，或者，不斷攞不斷攞不斷攞，比人話「食7咁食」事小，喺背後插幾刀事大呀！

預祝大家中秋節快樂！