《執劍》: 第八章－－門者

第八章－－門者

弗洛姆：「若我是我所有，若我失去所有，那我是誰？」
“If I am what I have, and if I lose what I have, who then am I?” Erich Fromm said.

「係我忘記左自我，迷失係復仇之中，迷失係憤怒之中。」真鳳望出窗外，一片藍色的天空，卻配上灰色的雲，令人感覺更迷失。

不知過了幾長的時間之後，小冰捧著一杯熱茶，走到已屬於真鳳的房間。「真鳳，不如你飲下杯茶，輕鬆下。」

「唔該你呀，小冰。係呢，其實我想問好耐，係咪係呢道做既全部都係…呀…門者？」真鳳接過熱茶後，把它放在桌上。





「唔係，有人負責處理文書，有人負責金錢轉帳過戶，不過的確大部份都係門者。」小冰溫柔地回答著真鳳的問題。

「咁你呢？」

小冰輕輕一笑，走向真鳳的辦公桌前，把手指點一點那杯熱茶，原在沸騰的熱茶瞬間凝冰。「我既能力係凝冰，初階二門者。」

真鳳對於小冰的能力感到十分驚訝，但令他更感興趣的是小冰的說話。「嘩！你將熱茶變成冰茶！係呢？初階二門者係咩黎架？」

小冰帶著耐性向真鳳解釋。「總監講過，人有四門，分別係解門、破門、心門同靈門。跨過解門就可以稱為一門者，跨過破門就可以稱為二門者，如此類推。越過破門之後，就會開始分為初階，中階同高階。」





真鳳點頭示意明白。「點先可以知道自己係咩階幾門者？」

「假如你解放自己的限制，就係一門者，例如你既五感同反應會推到比以前高出幾倍。假如你突破自己既界限，就係二門者，例如強化自身機能。至於階級，係你以後控制到自己既力量，我再話你知，嘻。」小冰的笑容與她凝冰的能力相反，溶掉別人的心牆。

真鳳看見小冰的笑容，心跳又突然加速，才想到自己原來與一個絕世美女處於同一間房間，而且她專誠拿一杯茶給自己，是無比的關心，是真切的照料，真鳳雙頰通紅，紅得像一個蕃茄般，害羞得要坐上那張屬於自己的黑色大辦公椅，趴在桌上。

小冰眼見面前的真鳳回復當初第一次見面的清澀，整個人都放鬆了，就決定與真鳳說出心底話。「真鳳，其實你去搵爆樽果日，你既殺意連我呢個二門者都憾動，而且，我係連反抗既力都無……」

真鳳聽得出小冰話中的認真，便抬頭望向小冰，亦希望知道更多。





小冰續道：「所以我相信，你身上既靈力量已經至少係三門者既級數，只不過係你仲未駕馭到，亦唔識得點樣運用自己的靈力。世上能成為三門者既人唔多，我相信假以時日，你將會係其中一個。你以前既力量充滿住霸道同憤怒，假如你唔好好控制，你只會走火入魔，被力量吞噬。」

「我既靈力…係三門者既級數？乜我真係擁有咁大力量咩？」

「幸好你仲未識得運用靈力，否則可能唔止爆樽廢左雙手，連身邊的建築物都會被摧毀。記住，你一定要好好控制。你要好好記住你到底係邊個，邊個先係你自己選擇既自己。真鳳，我有野要做，我出去先啦，拜拜。」小冰莞爾一笑，真鳳又再一次面紅，呆著像機械人般揮手。在真鳳眼中，那情況就像突然播放著一首柔情的背景音樂，小冰轉身離去的動作都漸漸變慢，彷如電視劇般慢慢播放著，那個畫面不斷閃爍，不斷閃爍。

真鳳等小冰離開自己的視線後，就趴在桌上，忍不著說：「點解我會咁易面紅架呢？係，小冰係好靚女，好吸引，但我唔係咁膚淺既人，我欣賞既，係小冰既溫柔，善良，細心，所以有少少心思思。唉，其實人地，都只係拎杯茶入黎姐，我又係道亂咁諗野。死毒男，諗下點用靈力好過啦。」

真鳳便開始苦惱著，不知道該如何入手，運用及控制靈力。

「我到底係邊個？邊個先係自己選擇既自己？」真鳳回想起那時與解封前的自己對話，友善，善良，純真；那個解封後的自己，憤怒，魯莽，自我中心。

「我既能力又係咩？」回想那時的火龍火鳳，望著桌上的冰茶，一接觸到那茶杯，凝冰了的茶突然沸騰，化作蒸汽，連茶杯亦開始燃燒，熔解，變作一堆液體，差點連桌亦燃燒。





「唔通我既能力係火焰？」話語一完，真鳳頭上的灑水器就被那股突如奇來的熱力觸發了，向著真鳳不斷灑水，正在燃燒的茶杯亦開始靜止。
真鳳抬頭望去灑水器，雙眼瞇成直接，右手舉起中指。而房外的人都望向真鳳，眼見傻氣的真鳳，都不禁偷笑著。

就只有數人，彷彿一直在監視著真鳳的舉動。