秦天晴 — 有鬼 新章《畫》正式展開: 畫 — 第三章
我抱住小木魚慢慢咁行埋去沙發度坐底，然後開口問
“呀皓！呀峰！點解你地會響度嘅？係咪發生左啲咩事丫？”
軒轅皓聽到我咁問，就諗住答我啦，點知佢只係“嗯”左一聲，都未開始講，就比凌嘯峰搶答咁話
“天晴！真係《善惡到頭終有報》架！之前個惡毒女人咪走去害人地個女嘅！而家咪搞到自己果個都無埋囉！”
聽到佢咁講，我就有啲疑惑咁問
”搞到自己果個都無埋。。。即係咩意思？”
凌嘯峰見我聽唔明佢講咩，就開口將今朝所發生嘅事，完完整整咁講番比我聽
“你應該響呀朗嘅口中得知左宋娟已經死左嘅消息架啦！我地今朝收到消息之後，就即刻趕過去睇睇啦！
當我地去到果陣，法醫就已經做緊表面嘅檢查，而初步估計，宋娟嘅死因係全身放血，失血過多致死！因為佢面無血色之餘，全身上下仲佈滿住大大小小嘅傷口！
當然，呢啲只不過係依照表面而去估計啦！深入去檢查肯定唔少得！
所以過左一陣之後，法醫就響宋娟條長裙之下，發現到令佢死亡嘅主要傷口！
響宋娟嘅下腹之處，係一個血肉模糊，子宮外翻嘅巨大傷口！而本來響子宮入面嘅胚胎，就成個咁消失左！”
”下！？個胎唔見左！？”聽完凌嘯峰所講嘅說話，我擘大眼好震驚咁話
見到我咁嘅反應，軒轅皓就接住話
“嗯。。。唔見左！我地懷疑奉靈教偷走個胎，係想利用宋娟嘅怨，死胎嘅恨嚟四圍作惡！
不過佢地到底想做啲咩呢，呢層我地就要再調查下先至知。。。
仲有件事，就係我地今日清理地底果堆屍油樽嘅時候，黑白無常佢地突然出現響我地面前！”
一聽到黑白無常呢四個字，我就諗起修羅閻君！一諗起修羅閻君，我就諗番起收左鬼王殘魂嘅降魔金鈴！
於是，我就迫不及待咁問
”見到黑白無常！咁有無見到修羅閻君呀？有無同佢講個金鈴收左鬼王個殘魂丫！？有無。。。”
見到我呢副心急嘅模樣，軒轅皓就馬上急急咁開口話
”天晴！你冷靜啲！冷靜啲聽我講！修羅閻君無出現丫！得黑白無常現身咋！”
我當堂成個人愕住左，望住軒轅皓眨眨眼，然後呆呆咁開口問
”修羅閻君居然無出現！？咁黑白無常現身係為左啲乜丫。。。？”
而呢個時候，同呀晞大戰左唔知幾回合嘅呀朗，就走埋嚟開口話
”黑白無常之所以會出現，其中一個原因，係為左幫我地清理地底下面嘅果啲屍油樽！佢地一嚟到就即刻揮舞收魂幡！將裡面嘅鬼魂送番去地府！等我地唔洗一個個咁搵同埋破咒，浪費靈力同時間！
二來係將果班守護靈帶走！本來班守護靈就係為左鎮壓凶地而存在，而家鬼王殘魂都已經唔響度，果度亦都唔再係大凶之地！所以就將佢地帶番去地府，等佢地可以投胎，重生做人！”
講到呢度，佢吞一吞口水，繼續話
”仲有就係。。。黑白無常叫我同你講，降魔金鈴之所以收得到果個鬼王殘魂，主要係因為果個魂，只不過係鬼王嘅其中一個無意識嘅殘魂！
如果係有意識嘅殘魂，就會好似上次你同呀峻露營果次咁，一出嚟就會有所行動！仲識得講野，有思想！而我地今次呢隻就只係會隨意攻擊，其他嘅野乜都唔會做，所以就係無意識！”
“無意識。。。有意識。。。其實鬼王究竟有幾多個殘魂響度？”聽完佢講，我就有啲好奇咁問
於是，軒轅皓就好有耐性咁同我解釋番
”相傳，鬼王當年被秦家先祖用禁咒將佢個鬼魂打散，分為七份！其中三個有意識嘅主魂，同三個無意識嘅殘魂，就比我地四大家族嘅人，封印左響唔同嘅位置！
至於淨番果一個無意識嘅殘魂，就比奉靈教嘅人帶走左！”
聽到呢度，我就即刻舉手發問
”咦！？比奉靈教嘅人帶走左？咁即係佢地而家咪有一個主魂，一個殘魂響手囉！？”
我一講完，呀朗就接住話
”非也，佢地果個殘魂，應該就係你手上面嘅果一個！
原因好簡單，因為天師家族封印鬼王殘魂，係利用鎮壓之術！咁即係話，殘魂就算番出嚟都好，威力都會有所減弱！
而奉靈教嘅目的係為左令到鬼王復活，所以佢地會諗辦法去溫養住個殘魂！至於溫養嘅最好方法，當然就係吸收其他鬼魂嘅魂力啦！
如果我無估錯嘅話，奉靈教當初帶走左鬼王殘魂之後，為免比我地天師家族嘅人所搵到，於是就整個祭壇，佈上結界，將佢封印響現址為百貨公司嘅地底下面！同時再以活人為祭，埋響地底作為飼料，等到時機一到，就破開封印，等鬼王殘魂可以重見天日！繼而將鬼王復活！”
聽到呀朗所講，凌嘯峰就即刻扮感嘆咁話
”唉。。。可惜！佢地嘅如意算盤打得卜卜響！但係就千算萬算，都算唔到佢地計劃左幾百年嘅野，會因為某個開左《麻煩請找我》呢個超級外掛嘅人而破壞左！”
我滿頭黑線咁望住凌嘯峰，心諗
“其實你唔洗講某人，我都知道你講緊我囉。。。”
同時，聽完佢所講嘅說話，我亦都響度諗。。。
如果唔係因為office有鬼事件，我就唔會激發到自己嘅靈力，同埋認識軒轅皓。。。
如果唔係認識軒轅皓嘅話，咁我就唔會因為貓妖事件，而去決定加入靈界警察！
如果唔係加入左靈界警察，要番公司辭職，然後發現到Cindy嘅面色唔係咁好，比左隻護身符公仔佢旁身！繼而引發起Cindy媽入院，需要我去照顧悠悠，從而發現到鬼娃娃呢樣野嘅話，我地就唔會留意到奉靈教嘅存在！
如果唔係軒轅皓佢地番左總部去匯報奉靈教嘅事，我又神推鬼㧬咁去左露營，放左鬼王殘魂出嚟嘅話，我地都唔知道奉靈教原來已經開始行動！準備將鬼王復活重生！
最後，因為察覺到奉靈教響百貨公司度有所動作，所以過左去視察！再莫名其妙咁用降魔金鈴將鬼王殘魂收起，將奉靈教今次嘅行動，完完全全咁破壞左！
諗到呢度，我突然有種心寒嘅感覺！因為。。。所有野都係一連串咁去進行！仲好似一直都圍繞住我咁。。。
莫非，真係正如佢地所講咁，我本身就係一個招惹麻煩嘅存在！？
或者，我心入面亂諗野嘅負情緒，已經不經意咁散發左出嚟！所以企響沙發後面嘅呀晞，就突然從後咁攬住我，同時開口話
”晴晴，唔洗驚！就算咩事都好，我都會響你背後支持你架！”
秦天朗聽到嚴正晞咁樣講，仲要又再攬住佢個妹，就即刻冷嘲熱諷咁話
”一個啱啱先陪完女人去旅行，而N咁耐都無出現過嘅人，好似無咩資格講呢句說話囉！”
嚴正晞一聽到無資格呢三個字，就馬上反駁兼搵秦天晴投訴
”人地大佬，你點可以因為咁而否定我嘅心意架！晴晴。。。佢又洽我丫。。。”
凌嘯峰見到咁嘅情況，就瞬間明白到呀朗點解係都要叫佢地上嚟！明明呀皓本來係叫呀朗轉達黑白無常嘅說話比天晴知，偏偏呀朗就死都唔制！仲話有啲野自己唔親口去講，可能會後悔一世！
原來係呢個意思！一語相關。。。高招！
而軒轅皓呢，佢望住嚴正晞同秦天晴嘅互動，就完全了解到呀朗所講嘅後悔一世係咩意思！
佢強忍住想將佢地分開嘅衝動，輕咳兩聲打斷佢地，然後話
“咳咳！仲有一點要補充！就係黑白無常話過，降魔金鈴係附有天界嘅印咒，除非你親自唸口訣，否則鬼王殘魂係無辦法破封而出！
同埋因為天界印咒嘅關係，所以奉靈教，甚至係鬼王都無辦法可以感應到殘魂嘅動向！因此，你地而家係最安全嘅！”
呼。。。聽到佢咁講，我都鬆左一口氣！至少我知道自己所拎住嘅炸彈，係唔會爆先啦！應該話佢肯定唔會爆先至啱！
老實講，我根本就唔知個口訣係咩！上次點解封印成功連我自己都唔係好清楚。。。我諗點都唔會無啦啦隨口嗡一句佢就放番佢出嚟掛。。。
不過，既然奉靈教佢地都無辦法感應到殘魂嘅所在，咁樣嘅話。。。我咪可以復工囉！？
“佢地既然感應唔到，咁我係咪可以繼續做番靈警嘅工作丫？”
軒轅皓聽到秦天晴咁問，就響度苦腦緊點樣答佢先至好！
而咁啱響呢個時候，秦洛把洪亮嘅聲音，就響飯桌果邊響起
“唔好傾住啦！食得飯啦！你地一個二個快啲洗乾淨隻手，然後過嚟食飯啦！”
於是，軒轅皓就逃過一劫！可以暫時唔洗答佢住！皆因呢個情況並唔係佢一個人講就算！亦都要睇下呀朗點安排！
不過，當佢地一邊食飯，一邊聽到嚴正晞約秦天晴聽日去邊，後日去邊，大後日又去邊嘅時候，軒轅皓就終於都忍唔住放低碗筷，望住秦天晴好嚴肅咁話
“天晴！三日後復工！”