秦天晴 — 有鬼 新章《畫》正式展開: 畫 — 第二章
“傳說，曼珠沙華係地獄入面唯一嘅花。。。生長於忘川彼岸嘅兩邊，所以又被稱為彼岸花！
呢種花，望落去係如火如血嘅赤紅色，妖艷唯美！但事實上佢係悲涼淒美嘅存在！
常言道，彼岸花，開彼岸，只見花，不見葉，花葉兩不相見，生生相錯！相念相惜永相失！所以。。。佢有永遠無法相會嘅悲戀之意。。。”
聽到呢度，我望住嚴正晞果副淡淡哀傷嘅表情，唔知點解。。。我個心入面忽然有種好心酸嘅感覺。。。
由細到大，呀晞響我面前都係笑面迎人，完全都無好似而家咁樣過。。。
佢眼定定咁望住我，雙眼所流露出嚟嘅果種悲傷嘅感覺，完全係直插我嘅心底。。。令到我個心有啲隱隱作痛。。。
就係咁。。。我地就一直沉默咁對視住。。。
直到思語行番嚟，出現響我地嘅面前，呢種感覺先至結束！
不過，結束嘅同時，我就突然發現自己剛才好似比佢嘅表面所呃左！因為。。。
一個同時間有幾個女朋友嘅人，又點會理解到咩係永遠無法相會嘅悲戀之意丫！好明顯佢係響度偽文青啦！
果然！佢一見到思語，就即刻換左副表情，同佢有講有笑！完全好似無事發生過一樣！
我望住佢呢個收放自如嘅表現，都真係不得不感嘆一句
“嚴正晞！真係抵你有咁多女！”
而呢個時候，本來響客廳嘅呀耀，亦都走左過嚟招呼我地出去客廳！話佢已經準備好啲野飲同野食，我地可以邊飲邊食邊傾喎！
於是，我地就跟佢出去，向住客廳張餐枱進發！
但係，臨出去之前，我再次望一望幅畫，諗番起剛才呀晞所講嘅野之後，就決定等陣同思語講，唔好響BB房度掛呢幅畫！
因為BB一出世就對住呢啲地獄之花，總係好似有啲唔係咁好嘅感覺。。。
“晴晴，你響度望咩丫？”思語見我停低響度向後望，就好疑惑咁問我
聽到佢咁問，我就隨口答左佢一句“無丫，無望咩丫！行囉！”，之後就輕輕咁拉住佢向前走！
嚴正晞見秦天晴佢地都已經離開左之後，就跟住佢地尾出去！只係。。。當佢離開間房之前，對住空氣淡淡咁講左句
“明明知道再無可能。。。何必呢。。。”
講完，佢就行出門口，“砰！”一聲咁閂埋門！
然而，無人知道響度門閂埋嘅果一刻，油畫上面嘅曼珠沙華，竟然響度微微咁擺動，同時。。。亦都發出一陣似有若無嘅嘆氣聲。。。
我地出到客廳，就開始一邊食野，一邊響度暢所欲言！當然，響對話入面，唔多唔少都有啲係同BB有關架啦。。。
於是，我就趁思語講緊裝修BB房嘅野果陣，乘機咁開口同佢地講
“其實呢，我覺得BB房應該以粉色系為主！所以房入面幅油畫，放響果度應該唔係好襯！”
思語一聽同我咁講，就即刻不停咁點頭，然後回應我
“係囉係囉！我都覺得係咁，幅畫太紅啦！同BB房真係好唔襯！等我過幾日拆左佢先！”
點知。。。呀耀一聽到話要拆左幅畫，就突然“噗！”一聲咁企左響身！之後，佢就好激動咁講左三個字
“唔拆得！”
嚇到我同思語兩個都呆住左咁望住佢，完全唔知接住落嚟比啲咩反應佢好。。。
嚴正晞見到呢個情況，就即刻出嚟打完場！
“嗯。。。我都覺得唔好拆住會好啲！因為，傳說話孕婦係由胎神掌管，搬野丫，釘野丫，修理牆壁丫，都會驚動到胎神！對媽媽同BB都唔好！仲有丫。。。”。
下。。。又傳說！？
我望住講得頭頭是道嘅嚴正晞，再望下全神貫注咁響度聽佢講野嘅思語同呀耀。。。心諗。。。
”無見一排，呀晞嘅神棍功力又顯著咁提升左！”
如是者，我地咁樣傾下傾下，幾個鐘頭就咁就過去左！我望一望隻錶，已經差唔多六點！就唯有起身同佢地告辭！
思語一聽到我話要走，就即刻拉住我！堅持要留我地響度食飯！不過，最後我都係婉拒左佢！
因為。。。我想番屋企向呀朗打聽下關於宋娟嘅事。。。
其實，今朝聽到呀朗話宋娟死左之後，我就覺得好在意。。。
皆因宋娟嘅死，八九不離十係奉靈教嘅所為！
於是，我就響度諗，到底奉靈教突然走去將宋娟殺死，係為左啲咩呢？
究竟係因為鬼王殘魂無回歸去奉靈教，所以遷怒於佢丫，定抑或係另有原因呢？
雖然，我而家被放假中，但係呢一切一切，我都想去問個清楚！
思語見我婉拒左佢，就一直都表現得悶悶不樂。。。我知道佢真係好想我地留低，佢仲有好多野想同我地分享！所以見到佢咁嘅樣，我就唯有向佢承諾，過幾日再嚟搵佢！到時佢要我傾通宵都得！
不過前提係某人要《獨守空房》囉！
聽到我咁講，大家都忍唔住響度哈哈大笑！之後，佢地就邊笑邊送我地出去村口嘅車站果度！
因為思語佢地嘅新居同軒轅皓一樣，都係村屋嚟，今日有呀朗揸車先至可以直達門口，如果唔係就要搭小巴再行入去！
我地企響車站度邊傾邊等，好快架小巴就到左，我輕輕咁攬一攬思語，同佢講左句“遲啲見”之後，就走左上車！
而跟住我尾嘅嚴正晞，就響上車前突然擰轉頭，同呀耀講左句唔知咩，先走上嚟！而果句說話，就令到呀耀嘅面色有啲唔係咁好！
見到咁嘅情況，我就好奇咁問
”你啱啱同佢講左啲咩丫？點解佢好似臉都青埋咁嘅！？”
嚴正晞聽到之後，就響我耳邊細細聲咁話
“其實。。。我啱啱係同佢講，叫佢《獨守空房》果陣時記得Call我，我陪佢《共度春宵》！”
聽到佢咁講，我即刻忍唔住響度狂笑！哈哈哈！唔怪之得佢面色驟變啦！共度春宵！哈哈哈。。。基情四射丫！
嚴正晞望住笑得正歡嘅秦天晴，就好無奈咁笑左一下，心諗
“如果唔係咁講嘅話。。。你又點會信呢。。。”
其實，嚴正晞剛才同呀耀講嘅，並唔係咩共度春宵嘅笑話！而係一句好嚴肅嘅說話
“活在當下！唔好懷念過去！”
好快，我地就番到屋企！當我企響門口，正想拎鎖匙開門嘅時候，道門就自動咁打開左條門罅！然後，就有個細小嘅身影，響門罅入面攝出嚟！抱住我隻腳，奶聲奶氣咁話
“娘親，你番嚟啦！叔叔佢地嚟左丫！”
哦？叔叔佢地嚟左？即係邊個？
無辦法，小木魚佢除咗叫呀朗做舅舅之外，其他男人都統一咁叫叔叔！最多前面加個姓！所以佢就咁講叔叔，我一時之間唔係好知佢指嘅係邊個。。。
諗到呢度，我突然醒起。。。咁樣嘅話，咪即係小木魚一早就知道呀朗係我呀哥囉！？
咁唔怪之得我之前問佢果陣，佢會好迷茫咁反問番我，”舅舅唔係舅舅，係叔叔？”咁樣啦！原來係咁！
我伸手拍左自己個額頭一下！覺得自己真係蠢死啦！
而我呢個突如其來嘅行為，好明顯就嚇親呀晞同小木魚！佢地即時異口同聲咁話
“娘親！你做咩丫！”
“晴晴！你做乜野丫！？”
或者，我拍落額頭嘅“啪！”一聲實在係太過響亮，又或者係小木魚佢地講得太大聲！所以，道門就被人一下子咁拉開！
至於今次出嚟嘅係邊個，唔洗問就知道係呀朗啦！佢又再次拉走我，將我推入屋！然後同呀晞響門口度進行第N次大戰！
眼見佢地又嚟料，我除咗搖頭嘆氣之外，都真係無乜野可以做！
於是，我就抱起小木魚，轉身行去沙發果度！而擰轉身嘅呢一刻，我亦都知道左小木魚所講嘅叔叔佢地係指邊個！原來係幾日無見嘅呀皓同呀峰！
不過，佢地咁忙都走上嚟。。。唔通有大事發生！？