秦天晴 — 有鬼 新章《畫》正式展開: 畫 — 第四章
本來同呀晞講得興起嘅我，突然聽到呀皓叫我，仲同我講三日後復工！搞到我個腦完都轉唔切，淨係識得眼定定咁望住佢，一時之間都唔知點應佢好！
而秦天朗同凌嘯峰一聽到軒轅皓咁講之後，就即刻一臉壞笑咁望住佢，同時用眼神表示
“呀皓！好波！竟然識得假工濟私！”
“兄弟！你終於都開竅啦！做得好！”
令到自知失態嘅軒轅皓，完全係尷尬到不得了！
呢一刻，佢個心就響度諗。。。明明自己一直以嚟都好冷靜，好少會失控架。。。偏偏一遇到關於秦天晴嘅野，就特別容易失去分寸！唉。。。
至於坐埋一邊，一直關注住佢地呢班後生仔嘅柳鳳儀同秦洛，見到呢個情況，就馬上相視一笑！
皆因佢地都感覺得到，當初果個為左責任先至答應會保護晴晴嘅人，已經響不知不覺之間，改變左自己嘅態度！
照咁睇嚟。。。有戲丫！不過。。。有呀晞呢個青梅竹馬響度。。。佢想要引起晴晴嘅注意，就真係要加把勁，再主動一啲先至得啦！
我望住軒轅皓停一停，諗一諗之後，就馬上開口答佢一個“好”字，點知我一講完，坐響我身邊嘅嚴正晞，就突然伸個頭埋嚟，響我耳邊輕輕咁講左兩個字。。。“思語！”
思語？係喎！我應承左思語要去佢度架喎！慘啦。。。如果我放思語飛機嘅話，佢肯定會勁唔開心！一陣佢因為心情唔好，而影響到個BB咪弊傢伙！
於是，我就即刻對住軒轅皓，雙手合十，同時用懇求嘅語氣話
“呀皓。。。我果日有事丫。。。可唔可以遲多一日丫？”
軒轅皓見到嚴正晞響秦天晴耳邊唔知講左啲咩之後，佢就即刻開口話自己果日有事，個心就有種好唔舒服嘅感覺！而呢種感覺，就令到佢有種衝動，想開口去拒絕！
不過，當佢見到秦天晴正響度用緊一副楚楚可憐嘅表情嚟望住自己，響度等緊自己嘅答覆！再諗到自己剛才所謂嘅“三日後復工”，其實都只不過係衝口而出嘅說話，所以。。。佢內心微微咁嘆左一口氣之後，就淡淡咁話
“可以！我到時再搵你！”
聽到佢咁講，我就即時鬆左一口氣！心入面比左個V自己之後，就開開心心咁繼續食我嘅飯！
晚飯過後，呀朗同軒轅皓佢地就急急腳咁離開！因為宋娟嘅死，令到佢地今晚要徹夜咁去調查！就連嚴正晞都跟埋佢地一齊走！不過，佢並唔係出於自願，而係被呀朗同埋呀峰佢地兩個一左一右咁架走！
諗番起啱啱果個情況，嚴正晞一臉慌張咁比呀朗同呀峰夾住咁向前行，而軒轅皓就雙手插袋，淡淡定定咁響佢地嘅面前帶頭咁行，果種強烈嘅對比感，真係勁搞笑！
小木魚見到瞓響床上面嘅秦天晴，突然望住個天花板響度微微咁笑，就即刻手腳並用咁爬上床，然後瞓響佢嘅身邊，跟住佢一齊望！
點知。。。佢望左好耐，都見唔到有啲咩好笑嘅野響度喎！於是，佢就轉身趴響張床度，雙手托腮，望住秦天晴一臉疑惑咁問
“娘親。。。你笑咩丫？”
聽到小木魚咁問，再望住佢一副呆萌嘅表情，我就摸摸佢個頭，同佢講
“哦。。。娘親啱啱諗起你舅舅同埋班叔叔之嘛！”
聽到我咁講，小木魚就馬上嘟起個咀，然後好哀怨話
“無小木魚丫。。。”
我望住小木魚表情上嘅變化，就忍唔住笑起上嚟！
哈哈哈，佢真係好可愛丫！
我即刻伸手攬住小木魚，然後輕輕咁同佢講
“因為你一直都響娘親身邊丫嘛！又洗乜用諗呢！乖。。。”
講完之後，我就慢慢咁瞓著左。。。
小木魚眼見娘親已經瞓著左，就立即化為粉光退出佢嘅懷抱，然後就靜悄悄咁伸手抱起身處響床上面，早已因為食得太飽而瞓死左嘅為食狗，極速咁向住窗口閃身咁飛左出去，消失響夜空之中。。。
時間過得好快，三日轉眼間就已經過左！
而今日，我就響為食狗同小木魚聯手嘅叫喚之下，早早咁起身，向住思語嘅住所出發！
不過，由於我係路痴，再加上呀晞有啲事，要下午先到嘅原故，所以我就以最方便快捷，最萬無一失嘅方法過去！就係。。。搭的士！
因為。。。響我眼中，間間村屋都好似差唔多咁！而且我果日跟住佢地行出去搭小巴嘅時候，根本就無去記路。。。
當然，我並唔係一落街就直接飛的啦！而係搭西鐵去到果區先至轉的士！一來咁樣平好多，二來係揸開果區嘅的士司機，先至會識得分果度係邊條村邊條路！
果然，我上左的士之後，唔洗十分鐘，就再次去到思語屋企嘅門口！
但係。。。好奇怪咁，我撳左兩三次門鐘，都居然無人應門！明明思語佢話過，今日佢都會響屋企架喎！唔通。。。佢咁啱去左廁所！？
咁樣嘅話，我就唯有企左響門口度等啦！但係等左一陣，再撳多幾次門鐘，都仍然仲係唔見佢嚟應門。。。
於是。。。我就打算將門鎖爆開！大不了我等等去搵個開鎖佬嚟幫佢重新咁安裝個新門鎖！
無辦法！我實在係好擔心佢會有事！記得佢果日曾經同我講過，佢係因為突然見頭暈，個人好唔舒服，比呀耀送左入醫院之後，先至發現自己有左BB！
而果日聽到佢咁講之後，作為佢好姊妹嘅我，就當然係搵萬能嘅Google大神，查看一下懷孕初期嘅注意事項啦！發現孕早期嘅婦女，會有可能因為血壓改變而出現暈厥嘅情況！所以。。。
我內心默唸左句“思語，我都係擔心你咋！你唔好怪我丫！”之後，就拎左張符紙出嚟，細細聲咁話
“乾坤無極，風雷受命！雷。。。”
然而，我個降字都未講到出口，道門就突然自動咁打開左一條門罅！
”咦。。。！？”呢個怪異嘅情況令到我打左個突！同時亦都令我諗番起上次思語打開房門果一刻，出現嘅紅色身影。。。
莫非。。。果次我無眼花！？呢度真係有古怪！？如果真係咁樣嘅話。。。思語佢可能有危險！
大獲！我即刻推開道門，然後衝入屋去搵思語！
客廳唔見，廚房唔見，廁所唔見。。。
咁而家只係搵淨最後果兩間房。。。主人房同BB房！
響我眼中，最為危險嘅肯定係BB房！因為我果次所見到嘅紅影，就係響果度！所以我諗都唔諗，就馬上跑去BB房嘅門前，然後一下子咁推開道門！
結果。。。裡面係空無一人。。。
既然判斷錯誤，咁思語所在嘅位置，唔洗問肯定就係響主人房啦！
於是，我就向住最後果間房行過去！但係行到去門前嘅時候，我就成個人僵住左！因為。。。
我突然醒起，啱啱推開房門嘅時候，房入面果幅畫住曼珠沙華嘅畫。。。並無上次咁引人注目！
原因係。。。作為主體嘅果朵大大朵嘅曼珠沙華。。。居然離奇咁消失左！
好好地一幅畫，又點會無啦啦就改變左呢！呢一點，完全印證左我心入面嘅想法！
我深深咁吸左一口氣，拎實果張一直握住響手嘅符紙，然後推開最後嘅果度門！
果然！思語的確係瞓左響主人房嘅床上面！而佢嘅身邊。。。就有一道鮮紅色嘅身影。。。