秦天晴 — 有鬼 新章《畫》正式展開: 畫 — 第一章
紙言同步 ： https://www.shikoto.com/i/B5i
畫 — 第一章
“喂！你快啲放開我個妹丫！”秦天朗扯住某人背後嘅衣領大聲咁話
而被扯住嘅某人就死死咁抱住我唔放，同時邊掙扎邊話
“人地大佬！你想點丫！？晴晴，救命丫！”
“哎呀！舅舅。。。哎呀。。。叔叔。。。哎呀呀。。。”小木魚見佢地又嚟料，就圍住我地身邊不斷咁團團轉
就連為食狗都加入埋戰團！不停咁發出一啲“嗚嗚！嗚嗚嗚！汪汪！”嘅聲音！
我企響戰爭嘅中心點，滿頭點線咁望住佢地，連反抗都懶得做。。。
皆因呢個情況，已經發生左好幾日！而且。。。仲一日入面發生左好多次！搞到我個人都已經麻木左！
至於點解會搞成咁呢，事緣響幾日之前，呀朗佢忽然同我講，話佢係我呀哥，令到我一時之間接受唔到，嚇左一嚇之餘，仲搞到頭一暈，腳一軟，成個人向後咁跌！
就響呢個時候，某人突然出現響我身後面，將我扶穩嘅同時，亦都好熱情咁攬住我，同我講左句
“晴晴！我番嚟啦！”。。。
呢個人，正正就係同女友去左歐遊，好多日都無出現過嘅嚴正晞！
然而，我無諗過嘅係，呀朗一見到呀晞從後攬住我，佢居然一手拉走我！而呀晞見我比人拉走，亦都伸手捉住我另一隻手！搞到我好似扯大纜果條繩咁，比佢地扯嚟扯去！
見到咁嘅情況，一直哩埋響手繩度嘅小木魚，就馬上現身，用楚楚可憐嘅目光，望住佢兩個開口話
“舅舅。。。仲有叔叔。。。你地唔好扯娘親啦。。。娘親痛痛啦。。。”
結果，小木魚一講完之後，呀爸呀媽就即刻衝埋嚟我地身邊，一個好驚訝咁捉住我追問“孩子呀爹係邊個！？”，一個就對小木魚又攬又錫！
最後。。。搞左好耐，先至擺平到呢個混亂嘅局面！
而由果陣時開始，呀朗只要一見到呀晞，就會守住響佢身邊，嚴陣以待！以免佢對我摸手摸腳！
以佢嘅說話嚟講，呀晞係男嘅，我係女嘅！我要識得反抗，唔可以蝕底比佢喎。。。
聽到佢咁講，我就響度諗。。。自從我懂事開始，呀晞就已經係咁架喎。。。
唔知比佢知道左嘅話，佢會唔會走去打扁呀晞呢！？
我望住比呀朗成功捉走左嘅呀晞，心入面為佢默哀嘅同時，亦都響度諗
“你自求多福啦！希望你唔好亂講野啦！”
再望住捉住呀晞嘅呀朗，我個心入面有種難以形容嘅感覺。。。
其實，到而家為止我都唔係好習慣叫呀朗做呀哥。。。
一來係大家都相處左一段時間，一時之間要我叫呀朗做呀哥，我改唔到口。。。
二來。。。可能係自己潛意識已經否定左“呀哥”呢個人！先至唔知點樣開口去叫。。。
一直以嚟，我唔係無懷疑過有“哥哥”呢個人嘅存在！皆因我有時會聽到呀爸呀媽佢地好感嘆咁話
“好掛住朗朗丫。。。”
“如果朗朗響度就好啦。。。”
當然，佢地並唔知我聽到佢地咁講，而我亦都無去追問朗朗係邊個啦。。。久而久之，我就自動腦補成自己應該有個哥哥，不過響我有認知之前，就已經死左！
諗到呢度，我就有啲懊惱咁對住呀朗雙手合十，同時內心默唸
“嗚。。。我無心咒你架！所以你一定要長命百歲丫！”
雖然，剛相認嘅果一刻，我好想去追問佢點解而家先至出現，點解一開始佢唔講我知，仲有。。。點解呀爸呀媽一直都無同我講過！
但係，當我見到呀爸呀媽望住呀朗同我相認果時，果種欣慰，滿足咁嘅樣。。。我就咩都問唔到出口。。。
唉。。。咁既話，我就唯有安慰自己，船到橋頭自然直！該知道嘅就會知道，順其自然啦！
而呢個時候，“娘親，娘親！”小木魚稚嫩嘅聲線從我身邊響起
於是我就伸手抱起佢，響佢個臉珠仔輕輕一吻之後，就問佢
“做咩事丫，小木魚？”
聽到我咁問，佢就伸手指一指牆上面掛住嘅鐘，然後話
“娘親，要出門口啦！”
出門口。。。？丫。。。！係喎！我今日要去思語屋企喎！
早幾日思語佢突然打嚟，神神祕祕咁話自己搬左屋，同男友一齊住，仲約我過去佢地間新屋度，有啲野想當面親口同我講！我就覺得好神奇！
到底。。。佢想同我講啲咩呢！？
為左儘快咁知道，我就走去《打得火熱》嘅兩人身邊，隨手拎起塊白色抹布，一邊揮舞，一邊話
“停戰！停戰！你地先停一停戰，呀晞，夠鐘啦！我地要行啦。。。”
點知呀朗一聽到，就即刻放底捉住呀晞嘅手，改為捉住我對手，好緊張咁話
“晴晴，你要同佢去邊丫！？我又去！”
見佢咁嘅樣，我諗一諗，其實帶埋佢去都無乜所謂嘅，正好可以同思語介紹埋佢添！
不過，就響我想開口答應嘅時候，佢個電話就突然響起嚟！而打嚟嘅，係已經忙左好幾日嘅軒轅皓
本來。。。作為靈警一員嘅我，應該係同佢一齊忙，一齊處理埋啲手尾！但係。。。佢偏偏就下令要我放幾日假，唔好再插手呢單野！
而佢嘅決定，仲得到大家一致嘅認同！
原因係我而家拎住鬼王殘魂響手。。。佢地好擔心我會成為奉靈教攻擊嘅對象！
雖然，我理解佢地係為我好。。。但係某程度上嚟講，對於自己幫唔到佢地手，仲拎住左一個大炸彈響手，就覺得好有挫敗感。。。
望住呀朗一邊聽電話，一邊用手搓個太陽穴，我就知道肯定有事發生！
果然！呀朗聽完電話之後，就苦笑咁同我講
“我都係唔去啦！我而家要去呀皓果邊呀！”
聽到佢咁講，我正想問佢發生左啲咩事！不過，唔等我去問，呀朗就已經將個原因講左比我聽。。。
“宋娟比人殺左！”
宋娟。。。Cindy姐夫個情婦！害悠悠嘅女人！佢。。。竟然死左！？
秦天朗見秦天晴皺起眉頭，就伸手摸摸佢個頭，同佢講
“唔洗擔心！有我地響度！無事！你地出門口未？我車埋你地！”
如是者，呀朗佢就車左我地去思語屋企，然後就自己一個去搵呀皓。。。
不過，響佢離開之前，我就將佢叫住，然後支支吾吾咁同佢講
“小心啲。。。呀。。。呀。。。呀哥！”
講完，我就一枝箭咁衝去撳思語個門鐘！
因為。。。實在係好尷尬丫！
而秦天朗見自己個妹終於都開口叫自己做呀哥，就成個人都覺得飄飄然，咀角一直帶住笑意！以至於軒轅皓一見到佢果陣，就送左兩個形容得佢好貼切嘅字比佢！就係。。。“發姣！”
好快，思語就走嚟應門！而道門一打開，思語就即刻飛撲埋嚟攬住我！我當然就回抱番佢啦！但係。。。當我抬頭一望嘅時候，竟然發現佢男友呀耀都撲緊埋嚟！
不過，佢唔係撲向我，而係撲向思語果邊！
呀耀一撲過去，就雙手捉住思語嘅膊頭，將佢從我身上面輕輕咁拉開，同時吩咐佢小心啲，唔好撞親！令到我有啲百思不得其解嘅感覺。。。
我又唔係銅牆鐵壁，點會撞親佢丫。。。
我好委屈咁望住呀晞，求安慰。。。
嚴正晞見到秦天晴呢副《寶寶委屈，但寶寶不說》嘅樣，竟然好無良心咁笑左出嚟！
因為，佢應該估到呀耀點解會有啲咁嘅反應，只係晴晴呢個小笨蛋完全狀況外。。。所以，佢就抱一抱秦天晴以示安慰！同時，亦都對思語同呀耀佢地講左句“恭喜晒！
呀耀聽到之後，就即時放開思語，轉為拍拍嚴正晞個膊頭，同佢講左句“多謝！”，然後就拉佢入屋講《男人經》！
當然，響行緊嘅時候，亦都不忘擰轉頭，同思語講多句“小心啲，慢慢行！”咁樣啦！
而思語呢，見我一臉莫名咁嘅樣，就對我笑一笑，然後拉左我入佢地間房，打開個櫃桶拎左一樣野比我睇！而呢樣野，如果我無眼花睇錯嘅話。。。佢應該係一支。。。驗孕棒！
佢將支棒一野塞左比我之後，就示意我望一望上面個顯示屏，上面好明顯有兩條紅線！
兩條紅線。。。即係。。。？
我吞吞口水，望住思語有啲疑惑咁問
“兩條紅線係代表。。。有左？”
佢聽到我咁問，就好興奮咁拍左一下手，答左我一句
“Yes！Bingo！”
佢講完之後，我地就沉默咁對望左五秒，然後。。。我再次唔係好確定咁問
“咁即係話。。。你做左人呀媽。。。我做左人契媽。。。？”
何思語見到自己個好姊妹一副難以置信咁嘅樣，就忍唔住響度大笑！其實。。。就連佢自己都係啱啱先至接受到呢個事實！
於是，佢就開始將自己點樣發現丫，佢地之後嘅計劃丫，通通咁話比秦天晴知！
我聽住佢所講嘅野，真係覺得世事無常！之前露營果陣先至話鬧交，轉過頭竟然話有左！
不過點都好，我都衷心咁祝福佢地！見到思語笑得咁幸福，我都為佢而高興！
“晴晴！我地到時會將隔離房裝修成BB房丫！不如你過去睇下，比啲意見丫！”講講下，思語突然開口提議
不過，佢好明顯就只係象徵式咁詢問我！因為佢個人已經向住隔離房行過去！
我望住佢嘅背影，無奈一笑，就即刻快步跟上！點知，佢一打開度門，我就見到一道紅色嘅身影，響我面前一閃而過！
咦！？。。。
我即刻走入房，打開天眼一睇，發現眼前有一幅畫左紅花嘅掛畫比較吸引目光之外。。。並無任何怪異之處！
唔通。。。我啱啱眼花！？
而呢個時候，呀耀就剛好走嚟叫思語過去，話佢搵唔到個開瓶器響邊喎！
於是，房入面就淨番我一個響度！
響無所事事嘅情況之下，我就慢慢咁行過去幅畫嘅面前，細細咁觀察幅畫，同時，亦都不由自主咁舉起隻手，想去觸碰畫上面嘅紅花！
然而，就響我嘅指尖就嚟觸碰到紅花之際，我隻手就突然比人捉住左，同時向後一扯！我就一個轉身，“噗！”一聲咁撞左去果個人嘅胸膛果度。。。
哎喲！我揜住個鼻，眼泛淚光咁望住個兇手，語帶哭腔咁話
“嗚。。。嚴正晞。。。你做咩丫。。。好痛丫。。。”
呀晞一聽到我叫痛，就即刻好緊張咁拉開我隻手，響度左右觀察！發現並無大礙之後，就開玩笑咁同我講
“放心喎！你個鼻仲響度！無凹到！”
見到佢咁嘅樣，我就忍唔住對佢反左個白眼，然後同佢講
“凹左嘅話，你賠番個鼻比我囉！係喎！你做咩無啦啦扯我過嚟丫！？”
聽到我咁問，佢並無答我！反而係好奇怪咁反問番我
“你知唔知呢幅畫所畫嘅係咩花？”
咩花？紅色嘅花囉。。。
不過佢無等我答佢，就行過去畫嘅面前，指住果朵花，自顧自咁話
“彼岸之花。。。曼珠沙華！”