秦天晴 — 有鬼 新章《畫》正式展開: 百貨驚魂 — 終章（下）
咦。。。小木魚！？點解佢會響呢度架！？明明今朝我出門口果陣，佢仲同為食狗兩個響屋入面玩緊架喎！
小木魚將姚魅兒撞飛左之後，一擰轉身就見到娘親眼定定咁望住自己，好難以至信咁！就諗番起自己偷偷地附身響條手繩上面跟住佢出嚟嘅事！
於是，佢就飛奔去秦天晴嘅面前，撲入佢個懷中，好似隻樹熊咁攬住佢，開口話
“娘親。。。小木魚擔心你。。。先至偷偷地跟過嚟！”
當然，響佢撒緊嬌嘅同時，亦都不忘撐起個防護罩，將秦天晴同佢嘅叔叔舅舅好好咁保護住！以免佢地受到傷害啦！
不過咁樣做，就令到現場形成左一個好奇怪嘅現象！
前一刻，大家都打到異常激烈，下一刻，就變成左雙方對峙！
因為班骷髏鬼同露營果次所見到嘅果班一樣，都係唔敢接近個粉紅圈圈！所以佢地都淨係識得圍住我地，完全無進一步嘅行動！
聽到小木魚咁講，我就有種好窩心嘅感覺！
我伸手抱緊掛響我身上嘅小木魚，輕輕咁摸一摸佢個頭，然後同佢講
“乖。。。娘親無事。。。小木魚唔洗擔心！”
然而，當我一講完之後，就有把聲，從大坑入面傳出嚟！
“邊個咁大膽打傷奉靈教魅使者！”
同時，一個黑袍人就抱住姚魅兒從大坑之中跳左上嚟！
本來，佢咁樣嘅行為，應該係好瀟灑先至啱！但係好可惜，當佢一上到嚟，見到我地之後，就咩瀟灑丫，霸氣丫！通通都消失得無影無蹤！
皆因佢竟然指住我地好大反應咁樣話
“又係你地！點解你地會響度架！？仲有你！你個死女人！竟然仲敢出現響我面前！？”
丫。。。死女人。。。？呢度得我同姚魅兒兩個女嘅響度。。。唔洗問佢呢句肯定係同我講架啦！
我望住面前呢個黑袍男人，心諗
雖然我係有啲臉瞎姐！但係無理由見過佢而完全係一啲印象都無架喎！
莫非。。。佢點錯相！？
軒轅皓望住身邊嘅秦天晴，見佢一直響度皺晒眉咁望住對方！就知道佢應該係唔認得對方係邊個！於是，佢就微微彎腰，響佢耳仔邊淡淡咁講左個字
“魍。。。”
魍。。。？哦！原來係佢！唔怪之得我唔認得佢啦，因為佢無帶面罩！
“原來係你！你個死人頭！”我即刻對住佢，回敬番一句！
聽到我叫佢死人頭，佢就更加激動咁話
”你話邊個死人頭丫？死女人！當初如果唔係你地，我會搞成咁！？好在我搵到個適合嘅肉身番嚟姐！如果唔係。。。”
講到呢度，佢停左一停，放低左姚魅兒之後，就將佢嘅武器—骷髏鬼錘拎出嚟！繼續話
”哼！呢個仇，我今日一定要報！就睇下修羅閻君今次點救你！”
語畢，佢就舉起枝骷髏鬼錘，然後揮向我地呢邊，大喝一聲
“噬魂降！去！”
空氣之中立刻浮現出一個巨大嘅黑色骷髏頭，擘大個口向住我地呢邊飛過嚟！
我地馬上拎起手上面嘅武器，準備迎戰！
但係響呢個時候，被我抱住嘅小木魚，就忽然伸手摸摸我塊臉，輕輕咁同我講
“娘親，唔洗驚。。。”
講完，佢就飛身出去！對住個骷髏頭伸手一指！一支粉光形成嘅箭，就向住骷髏頭嘅前額之處直射過去！
粉光箭立即從骷髏頭嘅頭頂上方穿過去！形成左一個大窿！然後骷髏頭就逐漸被粉色光茫所吞噬！消失於天地之間。。。
而小木魚小小嘅身影就站立響半空之中，咬住佢發射出光箭嘅果隻手指頭，含糊不清咁講左四個字
“不。。。自。。。量。。。力！”
黑袍魍即刻比佢呢四個字激到有種吐血嘅衝動！咩叫不自量力！？仲有，呢個細路響邊度嚟架！？竟然有啲咁嘅力量！
“細路，你到底係乜水！？”
小木魚望住黑袍人魍，歪頭一諗，正想開口答佢，但係就比姚魅兒歇斯底里嘅叫尖聲所打斷！
“丫！我理得你係乜水！你整死左我隻小寶貝！我要你條命！你地全部都同我去死啦！萬蠱噬天！”
隨住佢嘅話音一落，無數微細嘅黑色點點，就從佢嘅髮絲之中不斷咁冒出！
一開始，大家都唔知道呢啲到底係啲咩嚟！不過睇真啲，就發現呢啲黑色點點，原來全部都係好似蚊吱仔咁嘅小蟲！而佢地就正響度不斷咁衝擊小木魚嘅防護罩，令到防護罩上面嘅光，開始逐漸咁減弱！
身處半空之中嘅小木魚，一邊要應付黑袍魍嘅攻擊，一邊要對付果堆撲面而來嘅小蠱蟲！本來就已經係分身不暇！
點知仲比佢見到啲小蠱蟲響度蠶食緊保護住娘親佢地嘅防護罩，於是佢就越打越急，打到最後完全係用唔要命嘅打法！
以至於比黑袍魍佔到空位，舉起骷髏鬼錘向住佢細小嘅頭顱狠狠咁敲落去！
“小木魚！”我即時驚呼左一聲，然後諗都無諗就想衝出個防護罩外面救小木魚，不過就比軒轅皓眼明手快咁一手拉住！與此同時，身後就響起呀朗唸咒語嘅聲音
“天地乾坤，火速降臨！烈火焚天！”
漫天嘅符紙化為烈焰之火，將空氣中嘅小蠱蟲儘數燒毀！同時，火燄所形成嘅火蛇，就向住黑袍魍嘅位置衝過去！令到佢不得不放棄對小木魚嘅追擊，去閃開呢下攻擊！
見到小木魚佢平安無事，我當堂鬆左一口氣！剛才真係嚇死我啦！如果可以出去幫佢手就好啦。。。
咦。。。唔係喎！有計！
“小木魚！可唔可以幫我地整個個人防護罩？”我對住已經退到我地身邊嘅小木魚，一邊講，一邊用手比畫
小木魚隨即意會到我所講嘅係咩意思！於是，佢就對住我地揮動雙手，令到本來包圍住我地嘅大防護罩，變成一人一個細嘅防護罩！
”嘿嘿。。。”我望住身上嘅粉色光罩，滿意咁笑左一下，然後。。。就梗係去還擊啦！
等佢兩個啱啱蝦小木魚一個丫拿！而家仲唔到我地三個打你一個！
我地嘅目標分得好明確！我同軒轅皓，凌嘯峰負責姚魅兒，而呀朗同凌嘯峻就去幫小木魚，對付黑袍魍！
姚魅兒一見我地三個包圍住佢，一步一步咁靠近，佢就好警惕咁望住我地，一步一步咁向後退！
我諗佢誓估唔到自己噬唔成天，比人焚左之餘，仲淪落到要比剛才發狠話，話要攞佢地命嘅人所圍住！
同樣地，黑袍魍亦都比呀朗佢地瘋狂咁圍攻，而瀕臨崩潰嘅邊緣！本來佢對付個細路就已經夠棘手！而家仲要應付多兩個！仲要呢兩個嘅戰鬥力都竟然咁高！
如果呢個係自己原本嘅身體，佢一早就反擊，打到佢地落花流水！但係而家呢個係啱啱安裝左無幾耐嘅新軀殼！佢根本就未適應得到！
而且，重點係佢必須要愛惜自己呢個身體！因為打壞左嘅話，要再次搵過個適合自己嘅軀體就非常之難！
所以，佢就萌生左退意！反正自己剛才已經將個封印打開左，大王破土而出亦都只係時間問題！
於是，佢就閃身去姚魅兒嘅身邊，幫佢擋開左軒轅皓佢地嘅攻擊之後，就向住班骷髏同埋鬼娃娃下達全體攻擊嘅命令！然後趁混亂順勢拉住姚魅兒一齊離開呢度！
見到佢地跑走，我地當然係唔會放過佢地啦！
不過，我地並唔係要致佢地於死地！而係要活捉佢地！要佢地講出奉靈教嘅動向！
我馬上將腰間嘅九節鞭抽出，然後對住姚魅兒嘅雙腳，一下咁抽落去！
九節鞭擊中目標，令到佢慘叫左一聲！同時，條鞭亦都纏住左佢嘅腳踝，令到佢向前仆左落地！
黑袍魍感覺到身後嘅人被牽制住，就擰轉身，再次出左招《噬魂降》！當然，今次同樣被小木魚輕鬆咁化解左啦！
然而，就響大家都就嚟捉到佢地果陣，地面上突然發出左強烈嘅震動！令到我地錯失左捉到佢地嘅時機，比佢地走甩左之餘，亦都令到我地跌低左響地上面！
與此同時，本來仲對我地作出攻擊嘅骷髏同埋鬼娃娃，就忽然全部都跪晒響地上面！而鬼娃娃嘅口中，仲不斷咁叫住“大王！大王！”。。。
地震一直響度持續住！軒轅皓同呀朗響地上面爬番起身之後，就即刻走嚟將我扶起，然後就帶住我衝上去樓梯上面！
因為，地面上面已經出現左一條條又深又長嘅裂縫！
而當我地跑到上出口，由上至下咁望住不斷霧出黑氣嘅大坑果陣，我忽然有種似曾相識嘅感覺！
呢個情況。。。就好似。。。
我有啲唔係好確定咁望一望凌嘯峻，而凌嘯峻就神色凝重咁對住我微微咁點點頭！確認我心入面嘅想法。。。
唉。。。果然無估錯！呢度封印住嘅就鬼王嘅殘魂丫！
諗番起上次鬼王一出現，就拍死兩件。。。咁而家我地呢個情況，咪好危險！
之但係，我地又唔可以就咁就走左去！因為我地而家身處嘅係百貨公司嘅底部！如果我地由得佢破土而出嘅話，咁呢座大廈就肯定玩完啦！
到時唔單止會引起恐慌，仲會令到班守護靈無左個《家》！
而呢個時候，凌嘯峻亦都已經將鬼王殘魂呢樣野略略咁講左比呀朗佢地知，但係大家都只可以束手無策咁望住。。。
點算好呢。。。應該點做至好呢！？上次就話有修羅閻君響度頂住姐！今次佢唔響度，我地搵啲咩頂好丫！？
就響我地急到不得了嘅時候，鬼王殘魂就已經爬左一半出嚟！雙手不斷咁揮舞，將祭壇以及周圍嘅骷髏，鬼娃娃全部都碾碎！
秦天朗同軒轅皓冷冷咁凝視住下方嘅鬼王殘魂，完全明白到呢個根本就唔係大家可以應付得到嘅情況！所以，佢地就決定以安全為先！先撤退！離開呢度以免被活埋！然後先至再作安排！
可惜，而家先走已經太遲啦！鬼王殘魂已經爬左大半出嚟，仲對住佢地嘅方向揮掌一拍！
小木魚立即飛身一擋，洽洽擋住呢一下嘅攻擊！但奈何佢實在係太細粒啦！所以擋完之後，亦都順勢咁向住秦天晴佢地嘅方向飛過去！
好在凌嘯峰同凌嘯峻兩個做人肉墊褥，及時將佢接住，佢先至無受到傷！
眼見第二下攻擊將近，秦天朗知道自己再唔用果種力量，大家都實死無生！
於是，佢就將身上嘅虎形玉佩拎出嚟！放於自己嘅眼前，然後大聲咁呼喚
“白虎！出嚟！”
一隻白色嘅老虎竟然從玉佩之中飛出嚟，發出霸氣嘅虎嘯聲！
而軒轅皓見到秦天朗嘅行動之後，亦都將佢頸上所掛住嘅果隻龍形戒指拎出嚟，冷冷咁講左三個字
“青龍！現！”
一條巨大嘅青色神龍瞬間現身於大家嘅眼前！同時，亦都發出響亮嘅龍吟之聲！
龍呤虎嘯，響徹雲霄！單憑聲音就已經化解左剛才鬼王殘魂嘅一擊！
我望住面前出現嘅一龍一虎，除咗覺得震撼之外，個心亦都響度諗。。。
果隻戒指。。。果塊玉佩。。。青龍。。。白虎。。。
咁我條頸鏈。。。會唔會同樣都係哩埋左一隻。。。神獸呢！？
不過，呢個時候我都無辦法再亂諗落去！因為鬼王殘魂好似癲左咁不停向我地作出攻擊！
或者，佢係響度不爽我地三番四次咁將佢嘅攻擊擋住！
眼見白虎青龍一直同鬼王殘魂響度周旋，軒轅皓同呀朗嘅面色又越嚟越蒼白！再望到凌嘯峰一副視死如歸咁款，將小木魚交由凌嘯峻抱住，然後行到軒轅皓身邊，唔知想做啲乜野嘅時候。。。
我個心真係慌到不得了！救命丫！應該點做先至好丫！？
而就響呢個時候，我個褲袋嘅位置，突然發出左陣陣嘅金色光茫！
咦。。。？我愕一愕然，然後伸手將入面嘅野拎出嚟！
果樣野，就係修羅閻君嘅降魔金鈴！
小木魚一見到個降魔金鈴，就即刻飛撲過嚟我嘅身邊，然後好急咁邊做動作，邊同我講
“娘親！拋出去！娘親！拋！娘親！”
拋？拋出去？拋去邊。。。？
小木魚見我一臉疑惑咁嘅樣，就指指自己，然後話
“娘親乖！學我。。。”
聽到佢咁講，我就神推鬼㧬咁跟住佢原地轉左兩個圈，然後，再伸手向前一推！之後。。。個降魔金鈴就華麗麗咁向住鬼王殘魂嘅方向飛過去！
哇丫！我當堂慘叫左一聲！大鑊！修羅閻君個降魔金鈴竟然比我拋左出去丫！點算好丫！？
我死死咁盯住降魔金鈴，希望可以睇清楚佢掉落嘅位置，等我一陣可以執得番啦！
點知，降魔金鈴居然自動咁飛到鬼王殘魂嘅上方，發出強烈嘅金光，將周圍嘅黑氣，以及鬼王殘魂緊緊咁包圍住！
見到咁嘅情況，唔知點解。。。我心入面有種怪怪嘅感覺。。。好似有啲熟悉咁。。。
同時，我竟然自然而然咁講左一句
“天清清，地靈靈！蕩蕩游魂，收入金鈴！”
我揚手一揮，緩緩咁講出最後果兩個字
“收魂！”
清脆響亮嘅“叮！”一聲隨即響起！然後。。。一切都回復番平靜，無鬼王殘魂，無青龍，無白虎。。。完全好似咩事都無發生過咁。。。
我默默咁注視住呢一切，直到降魔金鈴飛番去我手上面嘅時候，我先至突然之間醒覺！
咦！？收魂！？點解我會識得收魂架！？
同埋最重要嘅係。。。我居然將鬼王殘魂收左入個降魔金鈴入面丫！
我欲哭無淚咁望住手上嘅金鈴，完全唔知點算先至好！
鬼王殘魂會唔會突然之間飛出嚟架！？
我呢頭一諗，果頭金鈴就響我手上面不斷自轉！
嗚嗚嗚。。。救命丫。。。修羅閻君你響邊丫！快啲拎走佢丫！
可惜，無論我個內心點樣呼喚佢都好，佢始終都係無出現到。。。
如是者，百貨驚魂夜，就響有驚無險之中咁渡過左。。。
不過。。。呢一刻，我完全無諗過最驚嘅，竟然係我搞埋啲手尾，番到屋企嘅時候。。。
當我打開屋企道門果陣，發現屋企入面，除左有我爸爸媽媽之外，客廳張沙發度仲坐左一個人！而果個人，正正就係剛才同我講過“再見！”嘅呀朗！
但係。。。呢個都唔係重點。。。重點係佢對我嚟左個自我介紹
“Hi，我叫秦天朗！係你嘅親哥哥！以後請多多指教！”
“。。。。。。！”我暈！