秦天晴 — 有鬼 新章《畫》正式展開: 百貨驚魂 — 第十章
如果，秦天晴佢唔係比鬼娃娃嘅果句《比男人更勇猛》，同埋果句《我愛你》所刺激到嘅話，佢應該就會留意到。。。
呢間房道門，其實響佢拎左朱道長嘅果把桃木劍，行番去劈落鬼娃娃身上嘅第一下開始，就已經打開左！
仲要係幾暴力咁打開左！就連頂住道門嘅果張枱，都比佢地震開埋！
只可惜，秦天晴佢係果種，決定左要做一樣野，就會全心全意去做，完全可以忽略外界事物嘅人！
所以，當佢個腦入面得一個念頭，就係打爆果隻被虐狂嘅時候，佢就已經將門口嘅騷動，完全自我過濾咁無視左。。。
以至於。。。佢所講嘅說話，同佢所做嘅行為，都比企響門口度嘅人，聽到同睇到晒，就只有佢自己響度懵然不知。。。
經過我連番斬劈之後，終於都將果隻被虐狂鬼娃娃打到碎晒！但係，就響我抹抹額頭上面嘅汗果陣，我嘅身後面突然傳嚟朱道長佢地嘅驚呼聲！
聽到呢啲聲，我個人即刻打左個突之餘，仲同時心諗
唔係掛。。。唔會。。。又遇到啲咩嘔心恐怖野丫嘛。。。？
於是我吞左一吞口水，然後就鼓起勇氣擰轉面去睇睇啦，竟然比我見到。。。
本來坐響地下度休息緊嘅人，而家就企晒起身，響度追住王仙姑！
咁王仙姑呢？佢就正係向住門口嘅位置撲緊過去！
而門口果邊呢？居然係打開左對門！仲有幾個唔知咩人企左響度！
其實，企響門口度嘅果幾個人，並唔係秦天晴所諗嘅唔知咩人，啱啱相反，果幾個人佢係個個都認識嘅！
佢地正正就係秦天朗，軒轅皓，凌嘯峰同埋凌嘯峻！
至於秦天晴點解會一時之間認唔出佢地係邊個呢，係有兩個原因！
第一個原因，係因為佢地企嘅位置係背左光！
而第二個原因，係因為軒轅皓佢地打開道門果陣，就比秦天晴所講嘅咩人妖，中佬丫呢啲說話所雷到！搞到佢地一個二個都捂住個口鼻響度笑！淨係露出左上半截嘅臉！令到秦天晴睇唔清楚佢地個樣！
不過，好快秦天晴就已經知道左佢地係邊個！
因為，當王仙姑向住佢地嘅方向撲埋去果陣，秦天朗就已經放低左隻手，大叫左一聲
“小心，有蠱蟲！用火燒！”
然後佢就揮動雙手，將佢手上面嘅物件變成雙刀，衝上前對住王仙姑隻手，一下咁斬落去！乾脆利落！
“噗！”一聲！王仙姑嘅其中一隻手，就咁樣比秦天朗斬左落嚟！然後跌左落地上面！
而跟響佢後面嘅凌嘯峰同凌嘯峻，見到呢個情況，就即刻凝聚左個靈火球，一個向住王仙姑，一個向住地下隻手，直直咁拋過去！
地上果隻手好快就被靈火燒成灰燼！而打向王仙姑嘅火球，亦都擊中目標！將佢打飛左去牆壁上面，再跌左落地下面！
我呆呆咁望住呢一切，個腦完全轉唔到過嚟。。。
點解佢地會響呢度嘅。。。？
點解佢地會識得搵到嚟呢度嘅。。。？
同埋最重要嘅係。。。
佢地究竟係幾時打開道門，然後企左響門口度架！？
軒轅皓見秦天朗佢地應付自如，就無打算上前去幫手，而當佢見到秦天晴無穿無爛無受傷咁企左響度嘅時候，內心鬆左一口氣嘅同時，對腳亦都不由自主咁行左去佢嘅身邊，然後伸出雙手，將佢緊緊咁抱住！
呢一刻，軒轅皓嘅失控，係因為佢部電話，其實一直都係無收到線！所以啱啱秦天晴所發生過嘅驚險情況，佢透過電話果度全部都聽得一清二楚！
由佢比鬼娃娃追，到佢見到啲唔知乜野響度尖叫，再聽到佢大聲咁叫小木魚，呢一切一切，都令到佢個心不斷咁抽住抽住！恨不得自己識得瞬間轉移！可以快啲嚟到佢嘅身邊！
好在，秦天晴安然無恙，如果唔係。。。
諗到呢度，佢就鬆開左攬住秦天晴嘅手，然後抬起隻腳，向住身邊果隻令到秦天晴發飆嘅鬼娃娃殘骸，用力咁一腳踩落去，然後再將果條屍骸狠狠咁掃埋一邊
丫！？我呆愕愕咁望住面前嘅軒轅皓，完全唔理解佢所做嘅野。。。突然之間粒聲唔出咁走埋嚟攬住我，之後又忽然之間鬆開我去踩隻鬼娃娃嘅殘骸。。。
於是，我就眼定定咁望住軒轅皓塊面，然後伸出一隻手，向住佢額頭輕輕咁摸落去！
嗯。。。？又好似無事喎。。。？奇怪啦。。。！
軒轅皓對秦天晴突然走去摸佢個額頭嘅呢個行為，有啲哭笑不得嘅感覺，不過並無去阻止佢，反而係由得佢繼續摸落去
我左摸右摸，都唔見佢有事，就縮番埋隻手，擰番轉頭，諗住繼續睇呀峰佢地點樣大戰王仙姑！
點知一睇，就發現佢地已經差唔多打完！凌嘯峰同凌嘯峻拎住枝長槍，將王仙姑緊緊咁釘實左響牆上面，而呀朗就對住王仙姑打出幾個靈火球，將佢燒毀！
望住王仙姑一邊掙扎，一邊發出啲淒厲嘅慘叫聲，再望下游大叔佢地，個個唔係耷低頭，就神情哀傷咁用手遮住塊臉。。。
呢一刻，我嘅心情都沉重起上嚟。。。
不過，呢個感覺維持左都唔夠一分鐘，就比迎面而來嘅凌嘯峰一下子咁破壞左！
佢一行埋嚟我度，就將佢個頭伏我個膊頭上面，然後雙手合十，嗲聽嗲氣咁話
“耶，天晴！你好Man丫！”
見佢呢個扮女人嘅行為，再加上聽到佢咁講。。。我忽然有種不祥嘅預感。。。
然而，佢嘅下一句說話，完全係印證左我嘅想法！
“你放心啦，就算你係人妖又好，係中佬又好，我都唔會嫌棄你架。。。噗！哈哈哈哈哈！”
人妖。。。中佬。。。哈哈哈。。。！？
我望一望企響我嘅面前努力忍緊笑嘅呀朗同凌嘯峻，再望一望身邊果個直頭擰轉面望都唔望我嘅軒轅皓。。。
好吧。。。我可以非常肯定。。。佢地將我啱啱所講嘅說話通通都聽到晒！
”丫！丫！丫！”我內心呼喊左三大聲！然後推開左凌嘯峰，再走去最近嘅果幅牆前面，踎左響個地上度，一邊畫圈圈，一邊無限哀怨中。。。
嗚嗚。。。點解早唔嚟，遲唔嚟，偏偏響我發神經嘅時候先至嚟丫。。。好樣衰丫。。。嗚嗚。。。
秦天朗同軒轅皓見到咁嘅情況，就同時瞪左凌嘯峰一眼，然後走埋去秦天晴嘅身邊，諗住安慰一番
“我地咩都聽唔到丫！”秦天朗開口話
“嗯！”軒轅皓和應中
“咩人妖丫，中佬丫！係呀峰佢亂講之嘛！”秦天朗繼續話
“嗯！嗯！嗯！”軒轅皓落力咁和應中
“你人見人愛，車見車載，花見花愛，棺材見到你都打開。。。丫！呸呸呸！無啲咁嘅事！總之你就唔會無人愛啦！”秦天朗再次開口話
“。。。。。。”軒轅皓啞口無言，唔識點應落去好
聽到佢地此地無銀嘅對話，我除左有啲無言之外，亦都覺得有啲搞笑！
唉。。。算啦！反正對我嚟講，形像丫，氣質丫，通通都同我無緣！囧
不過，見凌嘯峰佢笑得咁高興，我就忍唔住。。。決定。。。去嚇下佢！嘿嘿。。。
於是，我就企左起身，走埋去凌嘯峰嘅身邊，對住佢笑一笑，然後輕飄飄咁講左句。。。
“最毒婦人心。。。”
果然！本來笑得勁開心嘅凌嘯峰，即刻停低左落嚟，唔再響度大笑！取而代之嘅，係一副求救嘅表情，望住秦天朗同軒轅皓
可惜，佢兩個都係有異性無人性嘅人，所以全部都擰轉面無視佢！
而呢個時候，一直企響我地身邊不遠處嘅游大叔佢地，就走晒埋嚟，語帶猶疑咁問
“唔好意思。。。請問。。。你地幾位係。。。？”
聽到佢咁問，作為靈警特殊部隊隊長嘅秦天朗，馬上就收起左嬉皮笑臉嘅表情，改為非常嚴肅咁同游大叔佢地講
“我地係靈界警察！”