秦天晴 — 有鬼 新章《畫》正式展開: 百貨驚魂 — 第九章
聽到呢把化左灰都認得佢嘅聲，我個心即時好感嘆咁諗
“唉。。。咁都比你入到嚟！果然係怨魂不散丫！”
不過諗深一層。。。對門又無打開，佢地究竟係點樣入到嚟架呢！？
不過我無辦法再諗落去！因為我面前仲有一個好難搞嘅王仙姑！
佢竟然趁我想轉過頭望下游大叔佢地咩情況嘅時候，拎左張符紙向住我飛埋嚟！同時亦都噴出左大量嘅飛蟲！打算嚟個雙重攻擊！
見到咁嘅情況，我即刻好不屑咁”哼！”左一聲！
你估淨係你先至識得雙重攻擊架咩！我夠識囉！
於是，我就將手上個火球拋過去，然後即刻拎左張符紙出嚟，一邊向前飛，一邊唸
“乾坤無極，風雷受命！風刃！”
風火合擊，瞬間就將啲蠱蟲同符紙完全咁粉碎！同時亦都搞到周圍嘅環境都佈滿住煙塵！白茫茫一片，暫時乜野都見唔到！
有見及此，我即刻擰轉身，向住游大叔佢地所在嘅位置跑過去！因為我已經聽到佢地發出左無數次嘅慘叫聲！我好擔心佢地會出事！
結果跑到過去，入眼嘅係，有十多隻拎住武器嘅鬼娃娃，正對住游大叔佢地不停咁劈落去！而因為離我太遠而睇唔清楚周圍環境嘅佢地，就不斷咁被鬼娃娃嘅武器所傷！搞到全身上上下下都血跡斑斑！
見到佢地全部都掛晒彩，我抽左一口涼氣之後，就諗住上去幫拖啦！點知，我行左兩步之後，就聽到游大叔大叫一聲
“天晴！後面！”
後面！？大鑊！一心諗住去幫手，竟然遺忘左身後面仲有個王仙姑！
我即刻擰番轉身！見到嘅已經係王仙姑揮動緊佢隻手，向住我抓落去！
時間太急，我根本就嚟唔切閃開！響無法閃避嘅情況底下，我就唯有舉起帶住手繩嘅果隻手，大聲咁呼叫一聲
“小木魚！”
隨住我嘅話音一落，手繩就發出左強烈嘅粉紅色光芒，將王仙姑同所有嘅鬼娃娃全部彈開！同時亦都將我同游大叔佢地緊緊咁包圍住，形成左一個粉紅色嘅防護罩，保護住我地嘅安全！
見到呢個突如其來嘅情況，所有人都目瞪口呆咁望住我，擘大個口得個窿，完全一句野都講唔到出口！
而我就對住佢地笑左一笑，淡淡咁講左句“出番去再話比你地知！”之後，就開始打量住周圍嘅環境！
因為粉色嘅光芒，已經代替左我手上面嘅靈火，照耀住房間嘅每一個角落！
我原地咁轉左一個圈，終於都發現左啲鬼娃娃係點樣走入嚟！
原來係頭頂上面嘅冷氣槽！佢地因為體形細小，所以就通過中央冷氣嘅通風管道，爬到嚟我地間房呢度！殺我地一個措手不及！
好在有小木魚嘅手繩響度！如果唔係，咁樣腹背受敵法，真係唔死都一身殘！
我望一望鬼娃娃嘅位置，雖然佢地係無辦法有面部嘅表情，但係佢地拎起武器，同時向後退嘅表現，令我知道佢地係對粉紅圈圈有所戒備！
我再擰去另一面，望一望王仙姑，佢亦都向前向後咁走嚟走去，介乎於想攻擊與唔攻擊之間！我諗佢應該都同鬼娃娃一樣，對粉紅圈圈有所警惕！
於是，我就響度諗。。。既然係咁，我地咪即係等同於開左外掛一樣。。。唔洗驚佢地囉！？嘿嘿。。。
諗到呢度，我忍唔住“嘿嘿！”咁笑左出嚟，而我嘅呢一笑，就令到游大叔佢地震左一震，就連對面嘅十幾隻鬼娃娃都再次退後左好幾步！
其實，點解大家會有啲咁嘅反應呢，係因為秦天晴啱啱都曾經咁樣笑過，然後佢接住落嚟嘅動作，就係。。。凝聚靈火拍到班鬼娃娃響度依哇鬼叫！所以響呢一刻，大家都覺得，秦天晴笑完之後，肯定會有所行動！
如果秦天晴知道佢地咁諗嘅話，肯定會好驚訝咁擘大對眼問，“點解你地會知道嘅！？”，不過好在佢唔知，如果唔係佢一定會得到佢地同時嘅答覆，就係
“你笑得咁鬼奸！想唔知都幾難啦！”
我對住游大叔佢地講左句“你地休息下，唔好亂郁！”，再對住王仙姑輕飄飄咁講左句“等我一陣”，就拎住一叠符紙，向住班鬼娃娃一步一步咁走過去
而果班鬼娃娃見到我行過嚟之後，就不停咁退後，再退後。。。直到退無可退之後，先至有一隻走出嚟，拎住把刀指住我，然後話
“臭八婆！你想點丫！我地人多勢眾唔驚你架喎！”
聽到佢咁講，我就望住佢地眨眼再眨眼，然後好無辜咁話
“我好似乜都未做喎。。。？”
點知，我講完之後，佢竟然開口同我講
“哼！我量你都唔敢！我地而家就比個機會你，放你出去！你精精地嘅就離開呢度！否則咪怪我地唔客氣！”
佢一講完，其他鬼娃娃就拎住啲武器走左上嚟，將我完全咁包圍住。。。大有你一Say no我就殺左你嘅氣勢！
只可惜，佢地嘅威脅對我嚟講實在係一啲威力都無。。。
所以，我就對住佢地笑左一笑，然後將手上嘅符紙隨意咁向上飛，無錯！係向上飛！因為我有保護罩，而佢地又啱啱好咁圍晒埋嚟。。。令到我可以出偽·五雷轟頂！
“乾坤無極，風雷受命！雷降！”
無數雷電向住我地不停咁劈落嚟！一道接住一道！仲發出一下又一下嘅啪啪聲！當然，中間仲夾雜左無數句嘅咒罵聲啦！不過鬧嚟鬧去嘅都係八婆丫，賤人丫，再加多幾句粗口咁，完全可以自我過濾！
直至我聽到一句。。。令到我無法忽略嘅說話。。。
“噢！你劈我啦！狠狠咁劈我啦！爽丫！我鐘意丫！Baby！嚟啦！再嚟！”
當我聽住佢不停咁嗌，再見到佢好似好enjoy咁響雷電之間不停咁穿梭果陣。。。
我個心就響度諗。。。如果唔係呢個地方唔方便舞鞭，我早就將腰間嘅果條九節鞭抽左出嚟，然後對住佢一野咁抽落去！
明明其他鬼娃娃都已經劈到碎晒！偏偏就淨番呢一隻被虐狂無碎到，仲響度嘈生晒！
老天！你係咪玩野丫！？
好唔容易咁等到十幾道雷電劈完，果隻被虐狂竟然超大命咁只係劈爛左兩隻手！其他地方都安然無恙！仲繼續開口同我講
“哎喲！雖然我愛嘅係男人！但係你竟然比男人更勇猛！噢！我開始討厭男人啦！我愛女人丫！Baby！我愛你丫！你再劈我啦！嚟啦！”
聽到佢咁講。。。我吸氣。。。呼氣。。。再吸氣。。。再呼氣。。。
之後。。。我就擰轉身向住朱道長嘅位置行過去，伸手拎走左佢把桃木劍，再轉身行番去被虐狂嘅面前，狠狠咁劈左佢一下，然後笑住咁同佢講
“嘿。。。見你咁愛我，我就話個秘密比你知啦！其實我係人妖嚟架！仲要係一個中佬嚟架！嘿嘿。。。仲有丫！虐待你呢啲五行欠打嘅野，係我最大嘅樂趣，所以你放心。。。我都會完全咁滿足你！包你爽過夠！”
講完，我就開始揮動我手上果把桃木劍，向住佢一下又一下咁劈落去！同時，一邊劈一邊不停咁話
“我愛你！？我愛你個頭丫！”
”本小姐咁大個女都未比人示過愛！你你你！呢隻咁嘅死野竟然同我講我愛你！”
”你你你！受死啦你！””
呢一刻，我劈得非常之投入！
完全無諗過。。。響下一刻。。。自己會因為呢個行為。。。而後悔到飛起！