秦天晴 — 有鬼 新章《畫》正式展開: 百貨驚魂 — 第十一章
聽到《靈界警察》呢幾個字，游大叔佢地唔單止一啲驚訝嘅表現都無，仲對住我地流露出一副崇拜嘅表情！
見到佢地呢個反應，就令到我響度諗。。。莫非，靈界警察係好出名嘅！？
無錯！正如秦天晴所諗咁，《靈界警察》的確係出名嘅，不過出名嘅原因，除左係因為佢地本身為呢個社會做左好多野之外，仲有另外一個主要因素，就係佢地背後嘅《四大天師家族》！
對於一般人嚟講，可能未必知道係啲咩嚟，但係對於做得呢一行嘅人嚟講，四大天師家族根本就係無人不知，無人不曉嘅存在！
以至於佢地年青一輩所創立出嚟嘅靈界警察，都同樣係被受推崇！
只係秦天晴佢自細就離開左家族，先至會缺少左呢方面嘅認知！
好快，呀朗嘅手下就趕到嚟呢度！開始對現場進行清理嘅工作！
而我地所有嘅人，就從中央廣播室，移師去一樓嘅大堂位置，等候隊醫過嚟幫游大叔佢地進行傷勢嘅檢查！
不過我有啲好奇，點解佢地傷成咁，都唔即刻送佢地去醫院，反而要響度做檢查。。。
於是，我就細細聲咁問軒轅皓，而佢就話比我知，咁係因為佢地身上有傷口，又遇過蠱蟲，驚佢地會受到感染！
如果貿貿然咁送佢地去醫院，到時佢地真係受左感染，又惹到其他人嘅話，後果就真係不堪設想！
聽到佢咁講，我就點一點頭，表示明白，然後就問出左我一直好想問嘅問題，就係。。。
“呀皓，點解你地會嚟左呢度嘅？同埋你地點知我地響果間房入面架？”
軒轅皓聽到之後，就慢慢咁響褲袋度拎左部電話出嚟，遞比我睇，同時開口話
“你無收到線。。。我聽到你地嘅對話，擔心你有事，所以我就叫埋呀朗佢地一齊趕過嚟！至於點解知你響果度，係因為你部電話入面係裝有追踪功能！只要拎住第二部特製電話，就可以輕易將你搵出嚟！”
無收線！？。。。我望一望佢部電話。。。果然！上面嘅計時數字仲響度跳緊！我即刻幫佢收線！然後望住佢尷尬一笑。。。
而呢個時候，本來一直響度做緊指揮嘅呀朗，就突然走埋嚟同我仲有呀皓講
“呢度我地會接手去搞！晴晴，你番去休息下！羅永倫果邊我會幫你辭職！呀皓，麻煩你幫我送晴晴番去丫！”
咦！？辭職！？幫我辭職！？
“等等！你要幫我辭職！？”我急急開口問
而呀朗就神色凝重咁同我講
“係！因為呢度實在太危險！你啱啱都見到果個女人變成點嘅樣啦！佢係中左蠱！而且係巫蠱！呢啲絕對係巫蠱師所搞出嚟！我地擔心你會成為下一個目標！所以。。。離開呢度，對你嚟講先至係最安全！”
下。。。雖然辭唔辭職對我嚟講都無乜所謂！但係。。。後日個活動點算丫。。。應承左人幫手但係又走左去，好似好衰仔咁喎。。。
軒轅皓見秦天晴皺晒眉頭咁，就諗番起佢之前所匯報嘅野，估到佢應該係唔想失信於人，所以左右為難緊！於是就幫口同秦天朗講
“呀朗，後日有個活動係天晴搞出嚟嘅，如果佢咁樣辭職走左去嘅話，會搞到人地好麻煩，不如比佢搞埋個活動先至走啦？”
秦天朗聽到軒轅皓咁講，再望下秦天晴個樣。。。諗左一諗，就開口話
“好！不過我地team會留響度掃場。。。一係你後日先過嚟？好無？”
聽到佢咁講，我就緊係點頭同意啦！
其實。。。對於要絕對服從上司命令嘅我嚟講，就算佢要我即刻離開呢度，我都根本就無得say no！
不過，好在有軒轅皓佢幫口，我先至可以留多兩日！去做埋我應該要做嘅野！
我望住軒轅皓，對佢感激一笑！而佢就伸手拍一拍我個頭，然後帶住我離開呢度！
秦天朗望住自家寶貝妹妹同自家兄弟嘅互動，個心就突然有種酸溜溜嘅感覺！
明明我都可以摸下佢個頭。。。明明我都可以送佢番屋企。。。丫！唔係！係一齊番屋企至啱。。。
呢個念頭響佢個腦海入面無限咁循環。。。令到佢個人好哀怨咁企左響度，嚇到本來應該向佢匯報情況嘅手下，全部都走晒去搵凌嘯峰同凌嘯峻求助！
只可惜，佢兩個都唔想招惹隻大老虎，所以都耍手擰頭表示愛莫能助！
結果，響一樓大堂就出現左極奇怪嘅一幕！
靈警嘅大佬企響度呆呆咁望住個門口，佢班手下就企響後面眼定定咁望住個大佬，而手下嘅背後就坐住左一班傷者，莫名奇妙咁注視住呢一切，最後面就企左兩個人，一個響度苦笑，而另一個就響度捂住個咀偷笑！
至於搞成咁嘅狀況嘅果兩位當時人呢，就已經揸車離開左呢度！
凌晨嘅街道比較冷清，所以我地好快就已經番到屋企！
一打開道門，就有兩道身影向住我直飛過嚟！將毫無防範嘅我撞到向後跌！好在我身後有軒轅皓響度，及時將我扶住！如果唔係我個屁股就要親吻大地啦。。。
我輕輕咁嘆左一口氣，然後好無奈咁望住懷入面抱住嘅果隻狗仔，再望下抱住我大脾嘅兩三歲細路仔，正想開口講啲乜嘅時候，就聽到一句令我哭笑不得嘅說話
“娘親～～～你有無事丫？無事無事！小木魚幫你呼呼丫！乖！”抱住我大脾嘅小木魚奶聲奶氣咁話
其實，呢個小木魚，就係上次露營幫過我地嘅果個細路，而佢嘅真身就係種響陣眼嘅果棵大桃樹，所衍生出嚟嘅百年桃木精！
至於點解佢會由一個十歲嘅小朋友，變成而家兩三歲嘅模樣，仲跟埋我番屋企呢，係因為當日佢見我地放極血都激活唔到個《五行封印陣》，就消耗自身嘅修為嚟助我地一臂之力！
然而，修為同凝聚出嚟嘅人形係有關連嘅，所以佢就變成而家咁嘅樣！
而當時嘅佢，已經決定要跟住我！所以就響神不知，鬼不覺嘅情況之下，偷偷地跟埋我地番總部！
直到我醒番搵為食狗嘅時候，佢先至現身響大家嘅面前！
而當佢現身嘅果一刻，大家嘅反應都係超級震驚！由其係當佢撲埋嚟我度，開口叫我“娘親！”果陣。。。所有人包括我在內都驚訝到完全呆住在！
不過，就因為“娘親”呢兩個字，同埋佢係都要痴住我，所以大家都認為，我將佢帶番屋企係最合適嘅！
當然，我係有反對過啦！要我無啦啦多左個《仔》。。。仲要帶佢番屋企喎。。。
但係當我聽到凌嘯峰同凌嘯峻佢地話
”乖，跟哥哥番屋企丫！”
“你唔要，我要啦！”
再見到小木魚佢咀扁扁，楚楚可憐咁望住我。。。諗左兩諗之後，就唯有點頭同意啦。。。只係。。。
帶得佢番屋企，點都要幫佢改番個名架！但係我改名又真係比較求其。。。所以我決定集思廣益，希望佢地可以比啲意見！點知。。。
“叫細路。。。”軒轅皓淡淡咁話
丫。。。唔錯。。。
“叫木木？”呀朗認真咁話
丫。。。幾好。。。
“叫木木嘅話。。。不如叫小桃？”凌嘯峻望一望呀朗，語帶遲疑咁話
然後佢身邊嘅凌嘯峰就接住話
“叫小桃唔好！叫木頭好啲！夠貼切丫嘛！”
聽到佢地咁講。。。再望下小木魚鼓埋泡腮，想喊想喊咁嘅樣。。。我開始懷疑搵佢地改名到底係咪錯。。。
最後我見佢塊臉谷到好似雞泡魚咁，又諗起佢係桃木精，於是就幫佢改左個名，叫小木魚！
我伸手摸一摸小木魚個頭，然後同佢講
“娘。。。丫。。。娘親無事丫！乖。。。”
其實要自稱娘親真係有啲叫唔出口。。。不過見到小木魚萌萌噠嘅樣，要我唔去迎合佢，我又唔忍心。。。嗚嗚。。。
點知，佢突然伸手捉實我隻手，左望右望左幾下，然後抬起頭同我講
“嗯！無事！蟲蟲飛走左！”
蟲蟲飛走左！？咩意思。。。？
我正想開口問佢，但係就比軒轅皓搶先咁開口問
“細路！你講嘅蟲蟲，係蠱蟲？”
下。。。蠱蟲！？我隻手有蠱蟲！？唔係掛！？
聽到佢咁講，我即刻放低為食狗，然後一支箭咁衝去廁所度，用梘液不停咁洗手！雖然知道無乜野用，但係感覺上洗一洗會比較安心啲！
小木魚見自己娘親比軒轅皓嚇走左，就一臉哀怨咁望住佢，好唔情願咁開口話
“係。。。有蟲蟲想接近娘親。。。不過比繩繩嘅力量嚇走左！”
軒轅皓聽到小木魚咁講，就知道秦天晴曾經成為過目標！佢個心即時寒左一寒！臉都青埋！
不過小木魚就好似留意唔到軒轅皓嘅表情，仲一邊做動作，一邊自顧自咁話
“長髮大嬸！衰人！好多蟲蟲！娘親唔可以握手丫！唔得丫！嗯嗯！要乖丫！”
小木魚所做嘅動作同埋表情，咁啱比響廁所行出嚟嘅我見到！引得我哈哈大笑！
無辦法！佢個樣實在係太可愛啦！不過。。。我再諗番佢啱啱所講嘅說話。。。就完全一啲都笑唔出。。。
本來。。。我以為佢講緊嘅係王仙姑！但係當我諗深一層。。。就發現佢指嘅並唔係王仙姑！
因為王仙姑佢係短頭髮嘅！而啱啱同我握過手嘅長髮女人。。。得一個。。。就係。。。姚魅兒！
巫蠱師就係姚魅兒！