秦天晴 — 有鬼 新章《畫》正式展開: 百貨驚魂 — 第八章
百貨驚魂 — 第八章
至於點解我會尖叫。。。係因為佢塊臉！佢塊臉已經腐爛到見晒骨！而且不斷咁流出一啲又黃又黑，仲夾雜左少許白色嘅液體出嚟。。。
而最恐怖嘅係。。。佢果兩隻手正響度對住自己塊爛臉，用力咁抓落去！
同時不停咁喃喃自語
“痕。。。好痕。。。”
望住佢塊臉啲肉，比佢啲指甲所刮落嚟。。。然後跌落個地上面！強烈嘅視覺沖擊，再加上極度嘔心嘅感覺。。。令到我忍唔住衝口而出咁尖叫左出嚟！
聽到我嘅叫聲，游大叔佢地就即刻向住我嘅位置衝過嚟，同時亦都借助我手上火球嘅光，睇清楚櫃入面嘅情境。。。
自己識左咁多年嘅老友，突然之間變成咁嘅樣，應該無一個人可以接受得到。。。而萬師父更加係悲痛絕望咁叫左一聲“呀霞！”，就直直咁向住王仙姑嘅位置撲過去！
不過，佢撲到一半，就比張天師同朱道長所攔住左。。。
萬師父見自己比人攔住，就梗係反抗啦！佢一邊掙扎，一邊大嗌
“你地做乜阻住我救呀霞丫！你地快啲放手啦！喂！放手丫！”
游大叔見到咁嘅情況，就即刻從後用力咁箍住佢，然後合埋雙眼，儘量用平靜嘅聲線，緩緩咁開口話
“呀霞。。。佢已經死左啦。。。”
然而，游大叔嘅說話，唔單止無令到佢冷靜落嚟，反而係令到佢更加激動咁話
“死左？邊度有死左丫佢！佢仲活生生響度！呀霞！唔好再搲啦！停手丫！你地快啲放手啦！呀霞佢未死架！”
聽到萬師父咁講，攔住佢嘅張天師就對住佢大喝一聲
“你睇清楚啲啦！佢已經死左架啦！佢而家只係重覆緊佢死前嘅動作咋！如果佢未死！又點會我地企晒響度佢都唔應我地丫！呀萬！你清醒啲啦！”
話音一落，所有人都靜晒落嚟。。。
而我地嘅耳邊，就淨係得番王仙姑嘅聲音，不斷咁響度話
“好痕。。。痕。。。”
聽住呢啲聲音，一直眼泛淚光嘅朱道長，就突然好悲憤咁話
“我地而家就殺出去！殺晒果啲爛鬼公仔！我地去幫呀霞報仇！”
殺晒啲鬼娃娃嚟報仇。。。？但係啲鬼娃娃。。。應該無呢啲本事架喎。。。
雖然響呢個時候，咁樣同佢地講好似唔係幾好，但係我都係決定將個事實講出嚟！
“啲鬼娃娃。。。應該無呢個能力搞到王仙姑佢咁。。。所以。。。”
聽到我咁講，朱道長就好激動咁話
“唔係佢地！咁係邊個丫！？呢個擺明就係一個局嚟！利用呀霞將我地全部引晒過嚟，然後想一次過咁殺晒我地！”
“丫。。。”，呢一刻我完全係無言以對！正如朱道長所講，呢個的而且確係一個局！由我發現王仙姑嘅時候開始，我就已經知道得一清二楚。。。
不過。。。我真係唔認為啲鬼娃娃可以做到啲咁嘅野。。。
如果佢地真係咁勁嘅話，果陣時就唔會咁容易比我用鞭抽，用符咒劈啦！但係。。。兇手係邊個。。。我又真係答佢唔到。。。
而呢個時候，聽到我地對話嘅游大叔，就開口話
“天晴佢講得啱，的確唔係果堆鬼公仔做嘅！因為呀霞佢。。。係中左蠱毒！”
講完之後，佢就指一指個櫃入面嘅地下。。。
果然！響地上面嘅果啲肉碎入面，有無數條白色嘅小蟲響度不停咁蠕動。。。
我望住果啲白色小蟲，頭皮即刻有種發麻嘅感覺，令到我不由自主咁將手上面嘅靈火球，漸漸咁擴大！打算一把火咁燒左佢。。。
不過。。。當我望到游大叔佢地果個悲痛欲絕嘅神情，我手上面嘅動作就有啲遲疑。。。
其實，我地應該趁王仙姑仲未識得攻擊我地之前，就要將佢消滅！雖然，我嘅想法係好殘忍！但係。。。我地根本就無得揀！
而家，我地被困響呢間房嘅入面！根本就無處可逃！而王仙姑比我嘅感覺，已經係越嚟越危險！所以，而家唔處理左佢先嘅話。。。等緊我地嘅。。。肯定就係一場惡戰！
“秦小姐，你想做啲咩丫！？”張天師見我一直皺晒眉頭咁望住王仙姑，就開口問我
而聽到佢咁問，我就鼓起勇氣咁話
“我。。。要消滅左佢！”
講完呢句，我停左一停，望一望佢地嘅反應！見佢地無阻止我，我就開始婉轉咁講落去
”你地都知道王仙姑佢其實已經。。。唔響度。。。而且我感覺得到。。。佢開始變得越嚟越危險！如果我地而家唔行動嘅話。。。到時房入面有一隻，外面有一堆。。。後果。。。”
聽到我咁講，游大叔同張天師就同時輕輕咁嘆左一口氣，然後話
“天晴。。。你郁手啦。。。”
“我地無辦法落到手。。。你去啦。。。”
而朱道長同萬師父對望左一眼之後，就行埋左一邊。。。選擇唔望。。。
至於我呢。。。響心入面同王仙姑佢講左“王仙姑，你安息啦。。。”之後，就將個靈火球，向住王仙姑嘅位置果度拋過去！
但係！同預想中嘅一幕唔同！火球並無打中王仙姑，而係被佢擋左落嚟！
咦！？佢識得反抗嘅！？
呢個情況，令我愕一愕然！不過好快就回過神來！
於是，我馬上就凝聚左個火球！向住佢再次咁拋過去！點知。。。又比佢擋住左！
呢一刻，我個心即時寒左一寒！果然！我地拖得太耐！佢已經開始有所變化！
而就響我凝聚出第三個火球嘅時候，王仙姑佢竟然拎左將符紙出嚟，向住我地嘅方向飛過去！
“小心！”游大叔一手將我扯開，同時將佢手上面嘅果個銅錢，向住果張符紙一下咁射埋去！
“噗砰！”銅錢撞上符紙，產生左輕微嘅爆炸！
我地即刻向後退，避開爆炸所吹起嘅煙塵！但係退唔夠幾步，對面就已經再次有幾張符紙向住我地呢邊飛埋嚟！
萬師父同朱道長立刻揮動佢個八卦，同埋把桃木劍，將啲符紙打落嚟！
點知。。。響符紙嘅後面，原來係隱藏住向佢地撲緊上嚟嘅王仙姑！
一見到王仙姑，佢地兩個就即刻定住左！而揮動武器嘅手，亦都停頓住響半空之中！
眼見王仙姑果隻佈滿蠱蟲嘅手，向住萬師父佢地嘅身上，狠狠咁抓落去！游大叔同張天師就馬上加入戰鬥！及時咁將佢果隻蟲手擋住左！仲開始反攻起上嚟！
不過。。。佢地並無對王仙姑下狠手！
或者，正如佢地之前所講咁樣。。。佢地根本就無辦法落到手。。。
而呢個時候嘅我，就企左響佢地嘅旁邊，完完全全好似一個局外人咁，望住佢地五個人打埋一堆！
其實，我係好想加入，但係又無可奈何！
因為，如果我一加入，靈火就會跟隨住我嘅行動而移動，令到房入面唯一嘅光芒不停咁忽光忽暗！咁樣嘅話，佢地會好危險！
所以。。。我就唯有充當住電燈柱嘅角色！響兩隻手上面都凝聚住一個大火球，儘量咁照耀住周圍嘅環境！令到佢地唔洗摸黑咁行動！
然而，作為燈柱嘅角色，好快就被王仙姑嘅一個行為所破滅左。。。
就響佢地打打下嘅時候，王仙姑佢忽然唔再用符紙嚟攻擊！而係改為直接擘大個口，向住游大叔佢地迎面咁噴發蠱蟲！
而果啲蠱蟲，並唔係啱啱所見嘅果啲白色小蟲！而係一隻隻好似飛曱甴咁嘅大飛蟲！
一見到呢啲飛蟲，我全身嘅毛管即刻棟起上嚟！然後。。。我失控了！
由細到大最驚飛蟲嘅我，顯然已經忘記左自己作為電燈柱應有嘅本份！
我不顧一切咁將個靈火球，向住果堆飛蟲嘅位置，一下咁鑿落去！鑿完一個就凝聚一個，左手右手不停咁互換交替！一下又一下咁鑿落去！
嚇到游大叔佢地即刻閃身哩埋響我嘅身後面，以免殃及池魚！
但係。。。就響我鑿到無停手，連王仙姑都比我逼番入大櫃裡面嘅時候。。。我身後面就傳嚟一下慘叫聲！
同時，仲伴隨住一句陰森恐怖嘅說話
“桀桀。。。仲唔比我地入到嚟。。。”