秦天晴 — 有鬼 新章《畫》正式展開: 百貨驚魂 — 第五章
一到達百貨公司，我就搭電梯上去最高嘅果一層！
望住電梯嘅數字慢慢咁上升，我個心就響度諗。。。應該要點做先至好。。。
“羅氏百貨咁大，單係層數就已經有九層，再加埋個地牢。。。足足有成十層。。。而家淨係得番三日兩夜嘅時間。。。有無啲咩辦法可以響咁短嘅時間之內。。。將所有嘅鬼娃娃全部消滅晒呢。。。”
“叮！九樓！”，電梯嘅提示音響起！我慢慢咁離開電梯，然後就直接咁將軒轅皓比我嘅果部特制手機拎左出嚟，打開佢入面果個GPS功能，開始搜尋鬼娃娃嘅所在之處
好快，屏幕就出現左一點紅色嘅小圓點！不過，我並無即刻就將佢搵出嚟！
因為。。。我唔知應該用啲咩方法，可以響唔會引起恐慌嘅情況之下，將隻鬼娃娃拎走！
雖然，日光日白嘅時候，鬼娃娃唔會郁，比較好對付！但係。。。都要顧及到周圍嘅人。。。所以，我決定行晒咁多層之後，先至再作打算！
如是者，我開始搭扶手電梯逐層咁掃落去，直至去到地庫一樓為止！
而當我到達左地庫一樓嘅時候，竟然發現左一個好奇怪嘅現象！就係。。。
呢十層入面嘅鬼娃娃，加起上嚟竟然得十七隻！平均每一層都唔超過兩隻！計一計條數。。。即係連總數嘅五分之一都唔到！
呢一刻，我第一個反應係諗，唔通宋娟佢講大話！？將鬼娃娃嘅數量報大數！？
不過呢個假設好快就比我推番！因為我醒起游大叔啱啱講過一句《更何況入面仲有幾十，甚至上百隻呢！》。。。咁即係話，佢曾經見過大量嘅鬼娃娃啦！
既然宋娟所講嘅係事實。。。咁淨番果啲鬼娃娃究竟去左邊！？
莫非。。。佢地趁天光之前走晒出去？
定係。。。個GPS有問題呢。。。？
本來，我以為呢個任務係超簡單！只需要去見一見工，入一入嚟公司，開一開個手機GPS，搵一搵個位置，劈一劈堆鬼娃娃就可以完成大半個任務！
點知。。。事實並非如此！
唉。。。發現呢個咁嘅情況，我就唯有打電話比軒轅皓，同佢匯報番呢件事，順便問下佢應該點做先至好啦！
而佢聽完之後，所比我嘅指示係。。。
嘗試下將果17隻鬼娃娃全部銷毀！至於GPS嘅問題，佢會搵技術支援部去檢查一下，晏啲再比答覆我！
唔單止咁，佢仲響收線之前，對我嚟左個千叮萬囑！叫我千祈唔好勉強自己，千祈唔好做危險嘅野，千祈唔好睇唔開去做傻事！仲有千祈唔好。。。（下刪無數咁多個字）有啲咩事就打比佢，佢會即刻過嚟幫我！
聽到佢嘅說話，令我有種窩心感嘅同時，亦都令我好慨嘆。。。
軒轅皓呢個冰山美男，已經徹底咁變左做長氣大媽。。。回不去了！
丫。。。！如果比Cindy知道左，唔知會唔會傷心死呢！？
就響我胡思亂想緊嘅時候，突然有把細路仔嘅喊聲吸引左我嘅注意！
“嗚哇！我要扮聖誕老人丫！媽咪。。。家姐蝦我！嗚哇。。。。”有個約莫五歲嘅小朋友響度不停咁喊，同時亦都對佢身邊嘅女人不斷咁投訴
而果個媽媽見個仔喊成咁，就大聲咁鬧佢旁邊果個十幾歲嘅女仔
“你個衰女包！又搞喊個細佬！番去你就知死！”
點知個女仔聽到之後，唔止唔驚，仲好大聲咁反駁佢
“我幾時有蝦佢丫！我講事實之嘛！邊有人響萬聖節扮聖誕老人周圍走架！仲鬧我！你試下響清明同人講恭喜發財！新年走去叫人食月餅丫笨！”
萬聖節扮聖誕老人。。。？咦！突然靈光一閃！有個想法響我個腦海入面浮現出嚟！
於是我就即刻打比羅永倫，同佢講出我對《百貨驚魂夜》嘅構思！同時亦都請佢幫手配合我接住落嚟嘅行動！
而羅永倫聽完之後，就叫我坐響美食廣場入面嘅西餐廳果度等佢一陣，佢而家即刻派人去整我所需要嘅物品！轉頭就親自拎過嚟比我！
大約坐左一個鐘頭左右，羅永倫就匆匆咁嚟到西餐廳
一見到我，佢就拎左將海報比我睇，然後開聲話
“秦小姐，我已經照你嘅吩咐去做！而家宣傳部嘅人已經上去左去做推廣宣傳啦！丫！仲有！你要嘅野我都已經準備好啦！”
講完，佢就將手上面果個超級大紙袋塞左比我，然後就同我講佢要趕番公司開會，之後就急急腳咁走左！連比我講句野嘅機會都無。。。
我耷低頭，望一望手上面果個又大又重嘅紙袋，雖然心入面覺得有啲怪怪地，但係我都拎住佢行去廁所果度。。。準備換衫！
其實我嘅諗法好簡單，既然萬聖節嘅時候，啲人都會扮鬼扮馬，同埋拎住啲恐怖嘅野周圍走嘅話，咁我而家換件衫嚟幫《百貨驚魂夜》做宣傳，咪可以光明正大咁行去拎隻鬼娃娃出嚟，然後運去一個地方度一次過咁銷毀囉！
所以我就搵羅永倫幫手，請佢派人預先去同其他部門嘅人打聲招呼，然後去張貼告示，最後就係。。。中央廣播！
“叮噹！各位親愛嘅顧客你地好丫！歡迎各位蒞臨羅氏百貨公司！本店而家正響度做緊《百貨驚魂夜》嘅活動宣傳活動！詳情已經張貼左響各個樓層嘅當眼位置果度啦！
如果大家有興趣嘅話，就去一樓客顧服務處報名啦！名額有限，如果人數太多，我地會進行抽籤決定丫！”
聽到呢段廣播，我心諗“老闆即係老闆！做野果然高效率！“
不過呢句贊美，響我打開左個紙袋，見到入面嘅野之後，就全數推翻。。。因為。。。
”叮噹！丫丫丫。。。！差啲唔記同大家講聲！黑心女巫已經降臨人間！仲響呢度放置左一堆邪惡嘅傀儡娃娃！準備將佢地喚醒嚟遺禍人間！
不過大家唔洗擔心！我地已經請左神聖天使嚟保護大家嘅安全！佢會將邪惡娃娃帶番去天界果度接受處分！所以，大家一陣見到天使大人響度做緊回收工作嘅時候，請記住唔好去打擾到佢丫！
如果唔係。。。小心佢會懲罰埋你哦！”
再次聽完廣播，我好無言咁將袋入面嘅果套所謂《神聖天使》嘅服裝拎出嚟
本來。。。我係叫佢幫我求其咁搵套巫婆衫比我扮巫婆！咁樣就算我拎住隻鬼娃娃周圍走，都唔會令人覺得詭異啦！點知而家。。。由巫婆變左做天使！
好吧！你要我扮天使都唔緊要！咁請問聲，點解件天使衫唔係傳統嘅白袍加對翼，而係lovelive！入面Nico嘅果件黃藍白色天使cosplay衫。。。仲要由頭到腳都幫我配好埋一套！
唔怪之得袋野咁鬼重啦！又唔怪之得佢走得咁快啦！原來係驚我反對！嚟個先斬後奏！
我即刻拎起部電話諗住打比佢，點知見到上面個時間，已經係四點半！距離同游大叔佢地約定嘅六點鐘得番個半鐘。。。
時間無多。。。我望住手上面嘅果條超短裙，內心微微咁掙扎左一陣。。。就決定豁出去！死就死啦！
換好衫之後，我就再次搭電梯上去九樓，開始進行所謂嘅回收！
雖然受到嘅注目禮係非常之多，亦都有無數人走埋嚟話要影相丫，合照丫咁樣！令到我超級尷尬之餘，仲浪費左唔少時間！但係好彩我有GPS響度，所以好快就將啲鬼娃娃，從啲窿窿罅罅果度搵晒出嚟！
而搵完之後，我就將佢地全部放晒響地庫一樓，羅永倫為我準備嘅房間入面，然後抽出九節鞭將佢地一次過咁打碎銷毀！
呼。。。終於搞掂！
望住地上面嘅火種已經完全熄滅，我就轉身換番好套衫，上番去大堂搵游大叔
“秦小姐！我響呢度丫！”
一上到去，我就聽到游大叔嘅叫聲！而隨住聲音嘅方向望過去，就見到游大叔響度對我揮手，而佢嘅身邊就企左幾個人響度
見到已經人齊，我即刻快步咁行埋去，而游大叔一見我過到嚟，就好熱情咁同我介紹
“秦小姐！我同你介紹丫！佢地係我識左十幾廿年嘅老友嚟架！嗱，呢個係張天師！萬師父！佢係王仙姑！朱道長！”
講講下，佢突然停左一停，然後指住企響遠處，著住低胸貼身小背心，再加牛仔熱褲嘅女仔，繼續話
“仲有。。。佢係姚魅兒！早幾日加入嘅！性格有啲。。。”
講到呢度，佢神色古怪咁望住我，一副欲言又止咁嘅樣。。。
見佢咁嘅表情，唔洗問！肯定又係一個極品啦。。。所以我就對游大叔點頭一笑，表示已經明白佢嘅意思！然後就開口嚟個自我介紹
“Hello，我叫秦天晴！大家可以叫我天晴！我係細羅生嘅助理！請大家多多指教！”
講完之後，我就同佢地逐一咁握手，而呢個時候，果個叫姚魅兒嘅女仔，忽然行左埋嚟，主動咁捉住我隻手！
我比佢呢個動作嚇左一嚇，不過話晒人地都主動向你示好，咁出於禮貌，都應該同人打聲招呼嘅。。。所以我就對佢微微一笑，諗住自我介紹自己啦！
點知，我個心入面突然有種好唔舒服嘅感覺！而同一時間，我手腕上面嘅手繩就好快咁閃左一下粉紅色嘅光，將佢隻手一下咁彈開！
咦！？發生左啲咩事！？
我耷低頭望住條手繩，完全唔明白剛才發生左啲咩事。。。而姚魅兒呢，就已經行埋左一邊，用一副陰冷嘅表情望住我。。。
游大叔見到咁嘅情況，就即刻開聲扯開話題
“由於天晴今日係第一日嚟，所以佢會跟住響我嘅身邊！負責第六同第七層！而你地就跟番之前所分配嘅層數，繼續行動！如果無問題嘅話，我地而家就出發！”
見到大家都搖頭，或者開口講無問題之後，我就跟住游大叔搭電梯上七樓！然後再搭扶手電梯落六樓，不停上上落落咁巡邏！同時亦都響度傾下閒計，不過講嘅就全部都係無聊嘅野，同鬼娃娃完全無關
直到我地行左唔知幾多轉，行到百貨公司都閂左門，成個七樓淨係得番佢同我之後，佢先至開口同我講
“天晴，有啲唔對路。。。平時響呢段時間入面，我都會見到一兩隻嘅鬼公仔！但係今晚。。。竟然連一隻都見唔到。。。”
聽到佢咁講，我就好隨意咁答佢
“哦。。。因為七樓果兩隻同六樓果一隻已經比我KO左！”
游大叔聽到之後，就好驚訝咁話
“下！？你！？你KO左！？”
見佢好難以至信咁嘅樣，我就唯有一臉認真咁同佢講
“係！無錯！已經比我KO左！唔止呢幾隻，我連其他樓層嘅都KO埋，總共17隻！”
點知，佢聽完之後，竟然好嚴肅咁問我
“你到底係咩人！？”
下！？。。。又係呢句！？點解啲人咁鐘意問我係咩人架。。。！？
我內心嘆左一口氣，然後好無奈咁開口話
“游大叔，我嘅目的只係要消滅晒所有嘅鬼娃娃。。。所以我並唔係啲咩壞。。。”
“叮噹！”突如其來嘅廣播提示音，打斷左我所講嘅說話，而接住落嚟，就係王仙姑好焦急嘅呼叫聲！
“一樓需要支援！快！哎呀。。。”