秦天晴 — 有鬼 新章《畫》正式展開: 百貨驚魂 — 第四章
第二朝九點，我準時咁出現響羅氏集團！
呢個時候嘅我，滿心歡喜咁以為去搵羅永倫簽完份contract就可以順利咁開工啦！點知。。。事實並無想像之中咁簡單。。。
當秘書小姐帶我行到去羅永倫間房前面，舉起手正想敲門之際，佢隻手突然停頓左響半空之中，然後一臉錯愕咁企左響度！
咦？做咩事。。。？
我正想開口問佢，但係我都未問到出口，就已經知道點解佢會咁！因為。。。裡面嘅聲音，已經傳到連門外面都聽到。。。
好明顯，裡面嘅人係響度吵緊大鑊！
秘書小姐擰轉頭一臉尷尬咁望住我，完全唔知應該點做先至好！而我就對住佢笑一笑，然後就同佢一齊企左響度，等裡面嘅人嘈完為止
“細佬！你要留個女人響公司！得！我無意見！佢安份守己嘅話，我都可以隻眼開，隻眼閉！但係絕對唔可以將呢件事交比佢處理！
你都知道我地已經時日無多架啦！幾日後嘅活動絕對係不容有失！呢個關乎到我地公司嘅未來！總之！總之我就決定將呢件事交比游師傅去搞啦！你同我叫個女人唔好咁多事！” 有把男聲好激動咁話
哇！真火爆！。。。不過憑住佢果聲細佬。。。呢個人，十有八九就係羅永倫個大哥！
如果係咁嘅話，佢口中嘅果個女人，唔洗問肯定係我！
果然！個男人講完之後，羅永倫把聲就急急咁跟住話
“大哥，你諗多左啦！我同秦小姐並唔係你諗咁樣架！而且我睇得出，秦小姐唔係果種為左錢而埋我身嘅女人！佢係真心想幫我地！我知而家時間緊迫！咁點解唔可以比佢試下呢！？或者有佢響度，同游師傅合作嘅話，會事半功倍呢！”
而羅永倫既話音一落，就有另一把男聲接住話
“羅二少！你都知道之前跟住我入去收妖嘅果班道士法師嘅下場係點架啦！有啲人仲差啲連命都無丫！我當然唔介意多個人，多個照應啦！但係果個女仔仲咁後生，以後仲有大把前途架！如果明知入面有危險都仲推佢入去嘅話，咁樣完全係作孽囉！我係絕對唔會同意架！”
講到呢度，成間房都突然之間咁安靜落嚟。。。
我伸手指一指道門，示意秘書小姐係時候可以敲門啦
秘書小姐對住我點點頭，就起手敲左幾下門，然後推門入去
一入到去，佢就用職業化嘅口吻話
“大羅生，細羅生，我已經將秦小姐帶到嚟啦！”
講完之後，佢就擰轉身出番去，而我就吸左一口氣，做好晒心理準備之後，先至慢慢咁行入去。。。
其實呢一刻，我心入面係響度諗
”臥底真係唔易做丫！都未開始行動就已經要過五關，斬六將！唉。。。！”
羅永倫見秦天晴行左入嚟，就即刻走過去迎接佢，然後帶佢行去沙發果邊，同時細細聲咁向佢介紹“左邊果個係大哥，而旁邊果個就係游師傅！”
聽到佢咁講，我就隨意咁點點頭，然後耷低頭，跟住佢嘅步伐，一步一步咁行過去！點知我一邊行，佢地就一邊對我行注目禮。。。搞到我最後都忍唔住抬起頭望番住佢地！
唔抬由至可，一抬！我嘅目光就被枱面嘅野所吸引住。。。
因為枱面上面，放住左一個小木箱，而個木箱外面，就貼滿左無數咁多張嘅符紙
雖然。。。個箱係完全密封，但係望住佢果陣，我就有一種好唔舒服嘅感覺。。。而呢種感覺。。。就好似之前響Cindy屋企果陣咁。。。
唔通。。。入面裝住嘅係。。。鬼娃娃！？
就響我眼定定咁望實個木箱嘅時候，羅永倫嘅大哥—羅永仁就用冷漠兼疏離嘅嗓音同我講
“秦小姐，如果你做咁多野係想引起我細佬嘅注意，繼而埋佢身嘅話，恭喜你！你成功啦！我細佬會將你留響公司入面！不過其他唔關你事嘅野，就麻煩你唔好理！你只需要做好比人包養嘅份內事就夠啦！”
下。。。引起你細佬注意！？比人包養！？
本來響門口聽到佢講嘅野，都知道佢對我有偏見架啦！但係入到嚟連招呼都唔打聲，就咁樣一句質埋嚟，係咪太過份呢！？
聽到佢咁講，我就諗住開口反駁啦，點知佢身邊嘅果位大叔，就突然企起身同我講
“秦小姐！我睇得出。。。你都係有靈力嘅人！不過少少靈力並唔代表啲咩！單係呢個木箱入面隻公仔就已經足以對付到你！更何況入面仲有幾十，甚至上百隻呢！小姑娘，我希望你可以好好咁考慮清楚！錢，幾時賺都可以！但係命，就只有一條！”
雖然游大叔佢表面上好似話我無能力，又貪錢咁。。。但係諗深一層，其實佢所講嘅野，只不過係長輩對晚輩嘅關心同教誨！
嗯。。。呢個游大叔。。。係個好人！
不過。。。佢同羅永仁一樣，屬於反對派嘅人！而家二對一，兩個人阻止我插手鬼娃娃嘅事！咁樣嘅話，就算比我入到呢間公司都好，我都唔方便去行動。。。
諗到呢度，我就即刻擰轉頭望一望羅永倫，打算搵佢幫幫口啦！點知。。。佢竟然擰轉面唔敢望我！
唉。。。好吧！求人不如求己！
我兩隻眼珠響度左碌右碌，望一望枱面個木箱，又望一望佢地。。。然後。。。我諗到一個好辦法！
嘿嘿。。。！一個令佢地心服口服嘅好辦法！
如果軒轅皓見到秦天晴呢一刻個表情嘅話，肯定會搖搖頭，然後感嘆一句
“睇怕又有人要遭殃啦。。。”
我對住佢地甜甜咁笑一笑，然後望住羅永仁開口話
“羅永仁先生，首先，我同你細佬係一啲關係都無！再嚟，就係本小姐對比人包養呢樣野一啲興趣都無！最後就係。。。”
講到呢到，我就擰轉身慢慢咁行開，同時一邊行，一邊話
“呢件事就算你地唔比我理，我都理定架啦！看招！”
話音一落，我就抽出腰間嘅果條九節鞭，轉身向住個木箱一下咁打過去！
“砰”一聲，木箱瞬間粉碎，而裡面隻鬼娃娃，就曝露響眾人嘅視線之中
大叔一見到，就好快速咁唔知響邊度拎左把桃木劍出嚟，全身戒備咁望住面前隻鬼娃娃！
至於羅永倫同羅永仁呢，就響個木箱粉碎左之後，就一臉驚慌咁走左去游大叔嘅身後面哩埋！
嗯。。。效果唔錯！不過我地暫時都要合作，如果太過嚇親佢地嘅話，好似唔係咁好。。。何況。。。我只係想表現比佢地睇，有我參與嘅話，對佢地嚟講係絕對無損失！
於是良心發現嘅我，就無視大叔佢地慌張嘅表情。。。伸出自己隻手。。。一野咁拎起左隻鬼娃娃！
“哇！”。。。呢句絕對唔係我叫！而係佢地叫。。。
我一拎上手，佢地就“哇”一聲咁全部向後退。。。
丫。。。！？見到佢地咁嘅反應，我就諗住同佢地解釋，日光日白，隻鬼娃娃係唔會郁架！除非黑袍人響度姐！點知。。。
當我行前一步嘅時候，佢地就退後一步！我再行前一步，佢地又退後一步！同時不停咁話
“秦小姐！你冷靜啲！”呢句係羅永倫話嘅
“秦小姐！我錯啦！我道歉！對唔住！你有事慢慢講！”呢句係羅永仁話嘅
“秦小姐！你咁做好危險架！你放低佢先啦！”呢句係游大叔話嘅
唔知點解。。。呢一刻我覺得自己好似持槍嘅綁匪咁。。。比啲差人一句又一句咁勸我投降。。。
冷靜啲。。。放底武器。。。有事慢慢講。。。！
一進一退左好幾次之後，我望住已經貼到埋牆嘅佢地，好無奈咁搖一搖手上面隻鬼娃娃，然後開聲話
“你地唔洗驚！日光日白佢係唔會郁架！”
結果。。。我嘅行為令到佢地更加驚慌。。。
因為。。。我唔知道隻鬼娃娃之前受過損傷，所以，當我不斷咁搖佢嘅時候，隻娃娃個頭。。。就同個身分開左。。。而佢個頭。。。就咁啱得咁橋咁碌左去佢地嘅腳邊。。。
“丫！”，“哇！”，“媽丫！”。。。瞬間就驚呼聲四起。。。
最後，係以我將娃娃打碎，將支屍油抽起，然後用靈火將佢銷毀而告一段落
當然，我呢個行為就令我順利咁拎到份入職嘅contract啦！
不過，我嘅身份就唔再係一個售貨員，而係總裁嘅特別助理，對於呢個職位嘅稱呼，我係非常之抗拒！因為唔知點解聽起上嚟。。。硬係覺得有啲怪怪地咁。。。
但係。。。佢地話咁樣先至可以令我響公司入面暢通無阻，所以我就唯有勉為其難咁接受佢啦。。。
其實，我諗我應該係臥底之中，最唔臥底嘅一個！人地臥底係低調行事，而我就高調得不能再高調。。。仲由本來做個小職員，潛伏響公司入面調查，直接變成兩人之下，幾百人之上嘅特別助理，光明正大咁響公司度周圍走，周圍查！
對於個結果變成咁嘅樣，就連軒轅皓都響個電話度沉默左足足半分鐘，先至識得答我一句“做得好！”
佢話咁樣嘅話，幾日後嘅《百貨驚魂夜》活動，佢同凌嘯峰就可以唔洗搵藉口，直接搵我就可以入到嚟！
至於果個大叔，響見到我點樣對付隻鬼娃娃之後，就一直話要跟住我，點都唔肯走！直至我話夜晚個行動我都會嚟參加之後，佢先至肯離開
而我呢，就幾經辛苦，排除萬難，終於都可以正正式式咁向住百貨公司進發！