秦天晴 — 有鬼 新章《畫》正式展開: 百貨驚魂 — 第六章
一聽到王仙姑嘅慘叫聲，游大叔就即刻轉身跑去扶手電梯嘅位置果度，然後快速咁衝落去！
而我呢，就緊係跟住佢尾一齊跑啦！
好快，我地兩個就跑到落到去一樓！不過。。。出現響我地面前嘅，並唔係一大堆嘅鬼娃娃。。。亦都唔係一個混亂嘅戰場。。。而係。。。一片平靜嘅環境！
見到咁嘅情況，我同游大叔都皺埋個眉頭咁互望左一眼！因為我地都清楚咁知道。。。
無風不起浪，事出必有因！
王仙姑佢肯定唔會無原無故咁走去開廣播！仲有佢最後果下叫聲。。。應該係出左事先至會發出嚟。。。
咁到底。。。啱啱發生左啲咩事呢。。。？
就響我同游大叔打量住周圍嘅環境，睇下會唔會有啲咩線索果陣，萬師父同張天師都已經趕到落嚟，企響我地嘅身邊！而距離一樓最近嘅朱道長，亦都響不遠處果度，向住我地呢邊走過嚟
當佢一行到埋嚟，就即刻開口話
“奇怪啦！我一聽到廣播就即刻衝落嚟。。。但係落到嚟之後，竟然連鬼影都見唔到一隻！呀霞佢究竟要我地支援啲乜野呀。。。”
對於佢呢個問題，我地無一個人可以答到佢！因為唯一知道答案嘅人，淨係得王仙姑一個！
而呢個時候，游大叔突然開口問
”呀霞呢？呀霞響邊度？”
而朱道長聽到之後，就搖搖頭咁話
“唔知丫。。。我啱啱行過去接待處，但係唔見佢喎。。。”
聽到佢咁講，我忽然醒起。。。除左接待處可以開廣播之外。。。響一樓呢度，仲有另一個地方可以！就係中央廣播室！
王仙姑佢好有可能係響中央廣播室入面！
如果。。。我嘅假設係無錯嘅話，咁佢應該係響百貨公司嘅後樓梯果邊遇到危險。。。然後就跑去最近嘅中央廣播室入面求救！
咁樣就可以解釋到，點解呢度會咁平靜！因為事發嘅地點根本就唔係響呢一度！
“去中央廣播室！”我對佢地講完呢句之後，就向住廣播室嘅位置拔足狂奔！而其他人聽到之後，就明白到王仙姑可能響果度，所以就即刻跟住我嘅後面跑過去！
我地一路上都暢通無阻咁直接跑到去廣播室嘅門口，途中連一隻鬼娃娃都遇唔到。。。
而嚟到之後，萬師父就率先咁伸手想推開道門，點知發現道門原來係反鎖左！根本就打唔開！於是佢就拍門大嗌
“呀霞！開門丫！我地嚟左啦！”
不過。。。無論萬師父點拍都好。。。都無人去應門。。。
見到咁嘅情況，雖然大家都好擔心王仙姑會出事，但係就無人敢走去踢開道門！因為。。。無人可以保證門後面嘅究竟係王仙姑丫。。。定還是係其他野嚟！
一子錯，滿盤皆落索！如果唔三思而後行嘅話，分分鐘會搞到所有人都一鑊熟！
結果，大家都你眼望我眼，唔知應該點做先至好！就響呢個時候，我部電話突然響起嚟！嚇到所有人都打左個突！就連我自己都比佢嚇親！
我即刻好尷尬咁望住大家，同佢地講左句唔好意思之後，就接嚟聽。。。
“喂。。。”我只係講左個喂字，就已經聽到軒轅皓開口話
“天晴！技術支援部已經check過，個系統無問題喎。。。你會唔會係唔小心郁到個setting呀？你聽日試下重新開一次嚟睇下！”
郁到個setting？無理由架！我今日先至第一次開嚟用咋喎！不過聽到佢咁講，我就同佢講左句“等我一陣！”，然後就跳出去頁面果度，打開個GPS嚟睇睇啦。。。
點知一睇！咦。。。！？又好似真係無問題喎！
“呀皓！我而家見番晒啲點點啦！果然你呢招係行得通喎！”
點知我講完之後，軒轅皓就好激動咁話
“見番晒啲點點！？你仲響果度！？”
雖然唔知佢做乜咁大反應，但係我都照樣答佢
“係丫！仲響果度，見到點。。。！？”
講到呢度。。。我停左一停。。。再次望一望部電話。。。然後。。。對住游大叔佢地大叫一聲
“爆開道門入去！快！”
唔知係咪我轉變得太快，定係我實在係叫得太大聲！響我講完之後，佢地都呆呆咁望住我。。。連郁都無郁過。。。
大佬！無時間啦！見佢地定晒格咁，我就唯有推開擋住響門口嘅萬師父，然後響褲袋度拎左張符紙出嚟，對住個門鎖飛出去，同時開口話
“乾坤無極，風雷受命！風刃！”
風刃向住門鎖一下咁撞落去！
“叮！”門鎖瞬間散開！我隨即推開對門，然後將離門邊最近嘅萬師父推入去
就響呢個時候，忽然有啲陰森恐怖嘅笑聲從左右兩邊嘅走廊度傳過嚟。。。由本來嘅細細聲。。。慢慢咁變得越嚟越大聲。。。
“桀桀桀。。。”
“嘻嘻。。。”
聽到笑聲嘅呢一刻，我諗唔洗我講，佢地都應該知道發生啲咩事啦掛！？
果然，佢地聽到之後，就即刻自動波咁衝左入房，而游大叔佢將我輕輕咁推左入去之後，就跟住我尾入嚟，然後砰一聲咁閂埋道門
點知！道門竟然閂唔埋！因為。。。班鬼娃娃已經殺到埋嚟！仲用佢啲鬼手鬼腳攝住道門！
嚇到我即刻將手上部電話求其咁塞左落褲袋度，然後上前用力咁頂住道門，唔比啲鬼娃娃打開！
但係單憑我地兩個，根本就無辦法可以同堆鬼娃娃抗衡！
眼見條門罅變得越嚟越大，游大叔就對住手足無措嘅張天師佢地大喝一聲
“呀張！過嚟幫手頂住道門！老朱！呀萬！快啲將側邊果啲枱枱櫈櫈搬過嚟！”
一講完，佢地就好似一言驚醒夢中人咁，即刻分頭行動！
而門外嘅鬼娃娃，聽到游大叔所講嘅野之後，就一個個咁發表佢地嘅意見。。。
“桀桀。。。你以為可以頂得住我地咩。。。”
“嘻嘻。。。佢地真係好傻好天真丫。。。”
“嘿嘿。。。一陣點玩佢地好呢。。。”
“嘰嘰。。。我有斧頭。。。不如將佢地啲肉一塊塊咁割落嚟丫。。。”
“桀桀。。。我都有鉸剪喎。。。呢個方法我鐘意丫。。。”
呢一刻，聽到佢地討論得咁高興。。。搞到我都忍唔住發表埋一份
“嗯嗯嗯！我都覺得呢個方法唔錯！不過用鉸剪丫，斧頭丫呢啲太濕碎啦。。。”
講完，我就兜過游大叔，行去門邊果度，然後響大家詭異嘅目光之下，將右手凝聚左嘅果個小火球。。。對住佢地果啲手手腳腳一下又一下咁拍落去！同時好興奮咁話
“所以我個人比較鐘意用火燒咁囉！嘿嘿。。。”
“哇！”。。。“丫！”。。。“哎呀！”。。。
呢啲慘叫聲不斷咁響起，同時仲夾雜左無數嘅粗口！不過我就自動過濾晒佢地所講嘅野，專心咁響度拍，拍，同埋拍！
隨住我嘅努力之下，果啲攝住門罅嘅手腳已經變得越嚟越少，直到最後一隻手比火燒到縮番出去之後，我地終於都成功咁閂埋道門！
而朱道長同萬師父亦都馬上將啲枱枱櫈櫈推埋去門果邊，頂實對門，我地先至可以坐響個地下上面，喘番口氣。。。
不過，我地只係喘左幾口氣，道門又馬上傳嚟一下又一下，由硬物所引起嘅“嘭嘭”聲！
唔洗問，佢地肯定係拎住啲架生嚟劈門啦！
我望一望道門，雖然係用實木做嘅。。。但係比佢地咁劈落去，應該都撐唔得幾耐。。。
而呢個時候，游大叔就響褲袋入面，拎左幾個銅錢出嚟，向住道門嘅幾個位置拍落去，同時個口就響度念念有詞咁唔知講緊啲咩。。。
之後，外面就徹底咁安靜落嚟。。。
但係，響我地以為暫時安全嘅時候。。。
原來房入面。。。仲有另外一樣野。。。響度等緊我地！