秦天晴 — 有鬼 新章《畫》正式展開: 露營 — 第六章
“十。。。十。。。十萬。。。伏特！？”樂仔坐響個地下度好難以至信咁話
而其他人就瞪大雙眼，用《唔係呀嘛！？》嘅表情嚟望住樂仔手上面隻公仔
我見佢地驚訝成咁嘅樣，就唯有輕輕咁咳左兩聲，諗住引起佢地嘅注意
“咳。。。咳。。。”
點知佢地即刻抬起頭，兩隻眼好似發晒光咁望住我！
搞到我毛管都棟一棟。。。個心都離一離！
我對住佢地勉強咁笑一笑，就開口話“ 如你地所見。。。記住點樣用！其他野出到去先至講！”
講完，我就示範性咁拎起左自己身上果隻平安符公仔，對住佢地嘅身後面冷冷咁講左句
“破空斬！” 一道風刃瞬間飛出，向住撲面而來嘅果兩隻細路鬼打過去！
呢一刻，我個表情望落去好似好嚴肅同好認真咁，但其實響我內心入面，係欲哭無淚中。。。
嗚嗚。。。早知之前就唔咁講啦！惡搞人地。。。結果搞埋自己！咩安全感。。。咩放鬆啲。。。真係搬左舊石頭嚟砸爆自己隻腳！
風刃破空而來，擊中左其中一隻細路鬼，而另一隻見到之後，就即刻飛走隱身於樹林之中。。。
我望住被風刃打中而跌左落地嘅果隻細路鬼，一邊盤算緊應該要點做。。。
敵在暗，我地在明，形勢對於我地嚟講，係絕對不利！既然我地企響度做箭靶咁比人攻，倒不如先發制“人”！
我估。。。我應該知道佢地會怕嘅。。。到底係啲咩。。。
“思語，可兒，子歉，你地企起身。。。同樂仔四個背對背咁企響度，有啲咩就拎隻公仔出嚟講。。。嗯。。。絕招！” 我對住佢地輕輕咁吩咐
經過自己啱啱嘅親自演繹之後，我本來想講話“ 講乜都好！”，不過諗左一諗。。。都係算。。。
之後我就轉為望住為食狗，然後開口拜託佢
“狗狗，幫我保護好佢地！”
聽到狗狗對我“汪！”左一聲之後，我就放心咁慢慢行向地上面果隻細路鬼果度，因為佢一直都趴左響度。。。郁都唔郁。。。
但係我絕對唔會認為佢係比我打到重傷先至咁樣，所以當中肯定係有古怪！
我一步接一步咁向住佢走過去，同時我地嘅距離亦都越嚟越接近。。。
八步。。。七步。。。六步。。。
佢依然都係郁都唔郁。。。
五步。。。四步。。。三步。。。
我個咀角露出左冷冷嘅笑意，因為我已經見到佢隻手指頭郁左一下
兩步。。。一步。。。
佢終於都撲上嚟我度！仲一下捉實左我隻腳！然後抬起頭望住我，打開佢個血盤大口話
“ 姐姐。。。捉到你啦。。。嘻嘻。。。”
正常人遇到呢個情況，應該會好驚！但係我反而對住佢甜甜咁笑一笑，然後話
“ 我就係等你捉住我丫。。。”
自從上次黑無常教我用靈力嚟護心之後，我就一直響度諗，有無可能用靈力嚟護住其他嘅地方呢！？
於是我響屋企宅住咁過嘅呢兩日，就一直無無聊聊咁不斷響度嘗試！
結果發現係可以嘅！不過。。。只有一隻手掌咁大嘅地方，無論試幾多次都好！都只有一隻手掌嘅大細！
唔知係咪因為我嘅靈力唔夠。。。關於呢個問題，我決定等軒轅皓番嚟嘅時候再問佢！
不過呢個手掌咁大嘅靈力罩，足以保護住我隻腳踝免受傷害！所以，我就可以。。。近距離咁使用靈火進行攻擊！
“嘻嘻。。。你去死啦。。。”佢擘大個囗對我隻腳一野咁咬落嚟！
我即刻大喝一聲！
“你死我都未死丫！”
同時招喚靈火向住佢個頭，狠狠咁拍落去！
“吱。。。丫。。。” 尖銳刺耳嘅慘叫聲馬上由佢把口度狂飆出嚟！
果然有用。。。！我當堂鬆左一口氣！
我之所以會用靈火，係因為我記得啱啱燒野食嘅時候，佢地死都唔肯行埋嚟我地呢邊。。。而當時佢地個表情，就好似悠悠見到鬼娃娃咁。。。
恐懼。。。驚慌。。。！
於是我就諗，果陣時響我地身邊，一定係有啲野令到佢地有所畏懼。。。
而我地身邊有嘅。。。就係火！
燒野食用嘅果堆火，就係我用靈火嚟點著嘅！而靈火可以消除一切邪氣。。。所以。。。我假設左一下之後，就決定搏一搏！
佢淒慘嘅慘叫聲，驚動左其餘果三隻細路鬼！佢地即刻從樹林入面飛左出嚟！就連之前話唔見左嘅果隻細路鬼都衝埋出嚟，同時包圍住我地！
可惜佢地出到嚟嘅時候，果隻比靈火燒著左嘅細路鬼，已經灰飛煙滅，化為空氣。。。
“嗚嗚。。。你殺左菲菲。。。我要同佢報仇！”一隻男細路鬼邊講邊向住我撲埋嚟
而其他果三隻就向住思語佢地撲過去！
我閃身避開左細路鬼嘅攻擊，然後望過去思語佢地果邊，點知出現左令我哭笑不得嘅一幕。。。
本來我以為佢地會好驚，會尖叫，會周圍走，但係佢地無，佢地好聽話！四個背對背咁圍住左個圈，然後舉起手上面隻公仔，向住前面一齊大叫。。。
“十萬伏特！”，“破空斬！”，“火焰噴射！”
話音一落，藍色嘅水箭，紅色嘅火矛，綠色嘅風刃同埋黃色嘅雷電即刻混埋一齊向住果班細路鬼打過去！
打完之後，思語，樂仔同子歉仲同時開口同可兒講“卡美龜係唔識十萬伏特架！”
然後。。。佢地就追住班細路鬼嚟打。。。係追住嚟打丫！！！
我真係扶額無眼睇。。。
呢個時候，我好想對住佢地大叫一聲
”你地班精靈上腦嘅人！算你地狠！”
就連為食狗都趴埋一邊呆呆咁望住佢地。。。
其實為食狗呆望住佢地嘅時候，個心係響度諗
“ 主人。。。我覺得我嘅生命受到威脅丫。。。嗚嗚。。。佢地痴線架。。。好得人驚丫！”
眼見佢地都應付自如，咁我都唔再閃避，嚟個速戰速決！