秦天晴 — 有鬼 新章《畫》正式展開: 露營 — 第七章
既然你地驚靈火，咁我就唔用咒術，直接召喚靈火嚟打你地！
於是我就開始凝聚啲小火球，向住細路鬼丟過去！丟一個，唔中！再丟一個！又唔中。。。
丟多幾個之後，我就發現並唔係我嘅技術有問題，而係小火球嘅飛速實在太慢啦！每當小火球飛到去細路鬼嘅位置度，細路鬼都早會一步咁飛走左！
咁樣落去都唔係辦法。。。就算我唔反抗引佢過嚟，佢都唔一定會上當。。。究竟要點做先至好呢！？
我再望一望思語佢地果邊，見佢地仍然仲打得好興奮，不停一人出一招咁輪住上，根本就無留意到啲咒術已經變得越嚟越弱
本來個符咒嘅威力，就只有我出咒術嘅三分之一，而每出一次咒術，符咒入面所儲存嘅靈力，就會變得越來越少！直到靈力耗盡嘅時候，符咒就會變成一張廢紙，再無用處！
眼見佢地果邊已經唔捱得幾耐，搞到我個心都好焦急咁不停諗辦法！
諗住用靈火實得啦，結果又唔掂檔！想用鞭去抽佢地，但係環境所限又唔用得！咁仲有啲咩可以用丫。。。！？
嗚嗚。。。軒轅皓。。。凌嘯峰。。。我突然之間好掛住你地丫！
不過，我知道無論我幾掛住佢地都好，佢地都無可能出現響我眼前，所以。。。我都係面對現實啦。。。
我一邊丟火球，一邊周圍望下個地上面有無啲咩係用得著！
樹葉！？ 肯定係唔得。。。
樹枝呢！？ 都唔得。。。會成枝燒著。。。
咁石仔呢！？。。。石仔。。。呢個可能用得著喎！
於是，我就趁彎低身避開佢招攻擊嘅時候，偷偷地咁執起左塊石仔，然後將佢收埋響個衫袋入面！
當我收好左之後，就對佢連出數十個小火球！
細路鬼即刻上下左右咁飛嚟飛去，避開我嘅攻擊，同時開口話
“ 打我唔到。。。嘻嘻。。。打我唔到。。。”
我夠知我打你唔到啦！但係我嘅目的並唔係咁丫嘛！
所以，我無視佢所講嘅野，繼續發出小火球，直到佢已經習慣左我嘅攻擊，我先至偷偷地咁將粒石仔拎出嚟，然後用靈火點燃，再催動靈力向住佢一下打出去！
著左火嘅石仔比起剛剛所打出嚟嘅小火球，速度足足快左一倍有多！
細路鬼完全無諗過火球與火球之間，會突然混入左粒石仔！所以，“噗！”一聲，毫無懸念咁擊中目標！
被打中嘅細路鬼即刻跌左落地，仲不斷咁發出啲慘叫聲！
見到呢個情況，我就即刻執起幾粒石仔，向住被人打到落花流水嘅果三隻細路鬼，迅速咁打出去！
全部命中，無一幸免！
“咦！？咁快就玩完架啦？”可兒望住響地上面慢慢化為空氣嘅細路鬼，意猶未盡咁話
子歉聽到之後，就和應可兒，一臉婉惜咁話“係囉！明明啱啱係輪到我出招架嘛！”
我望住佢地個表情，再加埋佢地所講嘅野，我完全唔知可以比啲咩反應佢地好。。。
撞鬼都覺得好玩。。。撞鬼都覺得好玩。。。撞鬼都覺得好玩。。。呢句說話不斷響我內心世界度一直重覆又重覆。。。
就響我快被《撞鬼都覺得好玩》所淹沒嘅時候，終於都有人講番句正常嘅野！
思語望住我，認真咁問“晴晴，我地點樣先至可以番出去？”
點先至可以番出去。。。！？
我諗左一諗，然後就有啲猶疑咁話
“而家果五隻細路鬼都已經消滅左。。。我估應該可以番出去啦掛！？”
聽完我講之後，大家就開始向前行，但係過左十分鐘之後，我地仍然仲係身處響樹林之中。。。甚至仲行番番去起點果度！
我踎低執起左一塊燒黑左嘅石頭，伸手遞左比佢地睇，然後開口話“我地。。。又番左嚟！”
呢一刻，無人再響度開玩笑！每個人都一臉凝重咁嘅樣！因為再咁樣落去，我地無水，又無食物，最後就只有死路一條！
人，此終有一日都會死！但係要餓死同渴死，就真係諗都無諗過！
唔通。。。我地真係要死響呢度！？
就響我地都陷入左絕望嘅時候，為食狗突然響度狂吠！
我轉頭望一望佢個方向，竟然見到之前響樹下面嘅果個小朋友！
呢個時候有個小朋友出現響面前，就算無為食狗嘅叫聲，我都可以百分百咁肯定，佢唔係人！
所以，我即刻全身戒備咁望住佢，以防佢會突然飛過嚟攻擊我地！不過。。。企左陣之後，佢都只係望住我，同指指佢隔離棵樹，然後就再無其他。。。
樹。。。？樹有啲咩響度。。。？
“晴晴！你眼定定響度望啲咩丫！？”思語既說話，打絕左我嘅思緒
我指一指個細路仔，然後皺埋個眉問
“佢指住棵樹係咩意思。。。？”
點知佢地聽到我咁問，就即刻好驚慌咁問
“ 佢？邊個佢丫！？”
咦！？ 。。。我再望一望，個細路仔已經唔見左！
我唯有開口同佢地講“無。。。我眼花！”然後就行埋去佢所指嘅果棵樹度
我慢慢咁一步一步咁行過去，而樹嘅原貌亦都出現響我嘅眼前！
係一棵芭蕉樹，一棵散發住詭異氣色嘅芭蕉樹！
當我望住佢嘅時候，就總係好似有一種寒意響我身體入面滲出嚟咁。。。而且。。。棵樹嘅樹幹上面。。。有個淡淡嘅人嘅樣。。。
綜合以上嘅觀察，我認為呢棵芭蕉樹，絕對係古怪！
於是我拎出衫袋入面嘅符紙，順勢咁飛出去，同時唸
“乾坤無極，風雷受命！風刃！”
風刃對住芭蕉樹幹狠狠咁砍落去！樹身瞬間出現左一個大嘅裂口！與此同時，大量嘅鮮血不斷咁從個裂口度噴出嚟！令到周圍嘅環境都佈滿住濃烈嘅血腥味！
血腥之氣撲面而來，簡直就令人反胃作嘔！
我即刻用手遮住個鼻，同時向住佢打出靈火，將佢燒毀！
燒毀緊嘅時候，我就趁機數一數佢身邊嘅芭蕉樹！
一。。。二。。。三。。。四！
果然係啱啱好有四棵！即係話。。。芭蕉樹先至係佢地嘅真身！
既然知道左，就肯定係唔可以比佢地留低！所以我就用靈火將佢地一次過燒清光
等到佢地燒到變成灰之後，我地就再一次嘗試搵路出番去。。。最後。。。只係花左三分鐘左右，我地就已經出番去！
不過我地都嚟唔切高興，就已經比眼前嘅一幕嚇到呆左！
呀佩竟然拎住枝長槍，一下咁插落去呀峻嘅膊頭果度！