秦天晴 — 有鬼 新章《畫》正式展開: 露營 — 第五章
嚴正晞話過。。。有影嘅就係人。。。咁佢地無影。。。就證明佢地唔係人！
唔怪之得呀茹佢地一出現嘅時候，為食狗就係咁吠啦！仲有呀峻行埋嚟同我講左句“就係佢。。。”，同埋啱啱分組嘅時候，佢一直反對我同呀茹一組，仲對住我係咁擠眉弄眼。。。
原來佢指嘅“就係佢”，並唔係指“佢就係呀漢個女朋友同埋班學生”，而係指“佢地就係怨氣衍生出嚟嘅其他野”。。。
而佢對我擠眉弄眼，原來唔係眼抽筋，而係想暗示呀茹有問題！
我竟然而家先至諗得到。。。！
一個女人帶住五個小學生響度露營，已經係一件好唔合理嘅事！而六個人加埋，居然連一件行李都無，就更加係一件好唔正常嘅事！
老實講，如果唔係呀漢響度嘅話，我諗我地一早就已經覺得有可疑！
呀漢！。。。佢肯定知道呀茹佢地唔係人！但係就一直對我地有所隱瞞，仲要帶我地過嚟！佢到底有啲咩居心呢！？
我望住面前果四個已經唔係人嘅細路，然後輕輕咁問思語佢地
“你地知唔知，你地身上面隻卡通公仔，識得出啲咩技呀？”
本來仲響度吵吵鬧鬧嘅佢地，聽到我咁問之後，竟然異口同聲咁答“知！點會唔知丫！呢排咁Hit ！”
聽到佢地咁講，我停低左響度，望住佢地話“ 知道就好，如果一陣有啲咩事，就舉起隻公仔對住前面講絕技，OK？”
其實，就算唔講，隻平安符公仔一樣都會護佢地安全，不過如果佢地講出嚟嘅話，一來會令到佢地有番啲安全感，二嚟應該會令到佢地無咁緊張！
可能我講得有啲玄，佢地每個人望住我都係果種莫名其妙嘅表情。。。
唉。。。我微微咁嘆左口氣，響衫袋度拎出左四張符咒，然後快速咁對佢地落左個《寧神咒》！
之後我行前左幾步，望住班細路已經停低左響度嘅背影，開口問“細路，你地有啲咩目的？”
大家聽到我咁問之後，都覺得好驚訝，而樂仔就回神得比較比，所以就由佢開口問我 “發生左啲咩事？”
為左唔嚇親佢地，我只係淡淡咁答左佢一個“ 影”字
影。。。！？ 咩影！？樂仔，可兒同子歉完全領略唔到當中係啲咩意思，直到聰明嘅思語伸出手，指一指四個細路個地下，佢地先至瞬間明白！仲即刻慢慢咁向後退！
而呢個時候，果幾個細路終於都擰轉身望住我地！
佢地個樣，同第一次見果陣完全唔同！而家嘅佢地，全身濕淋淋，臉色蒼白，仲有佢地隻眼。。。只係得眼白。。。一片全白。。。
然後，入面嘅其中一個細路就用空洞洞嘅聲線同我地講 “嗚。。。嗚。。。姐姐。。。我地好想番屋企丫。。。”
佢一邊講。。。兩隻眼就一邊流緊血淚。。。
我地見到佢地變成咁嘅樣，都同時間抽左一口涼氣。。。不過好在有《寧神咒》嘅關係，思語佢地幾個都不至於暈低，只係一直咁響度抖震
呢個時候，另一個細路亦都開聲話“哥哥。。。姐姐。。。不如你地代我地留響呢度丫。。。”
講完，佢就擘大個口，向住我地飛過嚟！
我望一望周圍嘅環境，呢度周圍都係樹，我根本就無辦法拎條九節鞭出嚟，一陣唔小心勾住啲樹枝就好笑了。。。
於是我就改為拎出幾張符紙，對住佢地唸
“天地無極，乾坤借法！水箭！”
四枝水箭同時間飛出，向住佢地直飛過去！
其實，經過上次靈力枯竭而暈倒之後，我就發現左自己嘅靈力提升左好多，由之前只係雷降比較得心應手，其他嘅招式完全唔見得人，去到而家同時發出四枝水箭都無問題！
除左咁之外，我仲發現左身體上面出現左好大嘅變化！無論力量，靈敏度都大幅咁提升左！我能夠感受到身體入面，有一股暖流響度來回咁遊走，令到我個人更加精力充沛！
我諗，應該係條頸鏈嘅力量將我個《封靈咒》嘅缺口再一次咁擴大！先到會令到我從靈力上，甚至身體上得到變化！
雖然上次出完招五雷轟之後，害我足足暈左一日，仲差啲害死埋自己，不過得咁多好處，都算係因禍得福！
而家嘅水箭，同以前所發出嘅迷你箭已經完全唔同，威力增幅左好幾倍，所以當支箭向住果幾個細路飛出去，再打中埋周圍啲樹木之後，瞬間就木屑橫飛，灰塵四起！
機不可失！見到咁嘅環境，我即刻伸手推佢地走！呢度限制太多，我地必須要出番外面先至可以保障安全！
我地不停跑，不停咁向前跑！但係唔知點解，我地跑左十分鐘有多，都仲未跑到出去！明明我地啱啱行入嚟都係用左十分鐘左右！呢個根本就唔合邏輯！
“呼。。。晴晴。。。唔得啦。。。呼。。。我跑唔郁啦。。。”思語跪左響地下度不停喘氣咁話！就連可兒同子歉都坐左響個地上面，大啖大啖咁吸氣！
而我同樂仔就警惕咁望住周圍嘅環境，同時響度調整緊自己嘅呼吸節奏。。。
就響呢個時候，果幾個細路把聲，再次傳過嚟。。。
“嘻嘻。。。哥哥。。。姐姐。。。玩僕哩哩呀。。。”
“我地嚟搵你地啦。。。嘻嘻。。。”
“捉到你地。。。就無得走啦。。。嘻嘻。。。”
子歉聽到呢幾把聲，就即刻好驚慌咁話“死啦！點算丫！我地死梗啦！今次實死無生啦！死啦！”
“死死死！死乜野丫死！又係你自己話兩個年紀加埋都大過佢地四個！你都咁大個人啦！對住幾個細路你都咁驚死！”可兒比子歉刺激到小宇宙爆發了
子歉當然唔會由得可兒去鬧啦！所以佢地又再次嘈起上嚟。。。
佢地響度不斷咁嘈，而我就不停咁深呼吸，令自己保持冷靜。。。
呢度無軒轅皓，無凌嘯峰響度，我必須要靠自己！
我望住周圍嘅環境，不停咁響度搵離開呢度嘅路。。。
“嘻嘻。。。哥哥。。。我見到你囉！”
一個成口鮮血，個咀裂到上面頰嘅細路突然從右邊樹林飛出嚟！向住樂仔飛過去！
但係當佢伸手想捉住樂仔嘅時候，樂仔身上突然之間發出左雷光，“砰！”一聲，打中左果隻細路鬼！
果隻細路鬼嚇到即刻向後退，然後消失左響我地嘅眼前
而樂仔就比呢個突如其來嘅飛撲，嚇到坐左響地上面！