秦天晴 — 有鬼 新章《畫》正式展開: 露營 — 第四章
紙言同步 ：
露營 — 第四章
當我同為食狗行到番營地嘅時候，佢地都已經紥好晒啲營，響度分頭行動！有啲人響個背囊度拎緊啲食材出嚟，有啲人就響石地果度生緊火，為今晚餐飯做準備！
眼見思語同可兒響個背囊度拎緊啲野食出嚟，咁我就行去佢地身邊，睇下佢地帶左啲咩嚟啦，而思語見我眼甘甘咁望住佢地，就開口同我講
“晴晴，我地今晚燒野食丫！不過你放心！我同可兒都有帶埋你果份架！一定唔會比你餓親嘅！”
聽到思語咁講，嗚。。。我真係超級感動。。。
於是，我默默咁行去拎起自己個背囊，默默咁行去佢身邊度坐底，默默咁打開個背囊，然後默默咁將裡面嘅野拎出嚟。。。
一條法包，兩包餐包，同埋三大袋生命麵包！
我好真誠咁望住佢地，然後話
“放心！我都有帶埋你地果份！我都唔會比你地餓親架！”
講完之後，我就起身行去石地果邊，睇下有無野可以幫到手
思語同可兒望住秦天晴果個《我揮一揮衣袖，不帶走一片雲彩》嘅背影，再望住滿地嘅麵包。。。傻眼加無言。。。
我孭住最後果轉柴，慢慢咁行去石地果邊，但係人都未行到過去，就聽到果把超級嗲聲話
“呀峻，肯定唔係你問題啦！係果條女執埋晒啲垃圾柴番嚟之嘛！你睇下！濕架！”
濕！？無理由架喎！我根本就無執過啲濕嘅樹枝番嚟！
聽到佢咁講，我即刻放低個袋，行過去佢地生火嘅位置果度望一望，竟然見到果堆柴枝真係濕到出晒水！
到底發生左啲乜野事！！？
呀佩一見我行埋嚟，就即刻開口數落我話
“喂！你點做野架！你睇下！啲樹枝濕架！點用嚟生火丫！？仲有丫！執埋啲細細枝嘅有咩用丫！話咁快就燒晒啦！無啲常識！”
講到呢度，佢拎起地上面把叢林斧嚟指住我，然後另一隻手就指住樂仔同呀漢搬緊過嚟嘅枯樹幹，大大聲咁話“你！同我去砍番啲柴番嚟！無鬼用！廢柴！”
見到呢個情況，所有人都立即放低手上面嘅野衝埋嚟，為食狗就準備向佢撲過去！而呀峻就即刻企起身，諗住搶走佢手上面用嚟指住我嘅果把斧頭！
可惜，佢無辦法搶得到，因為果把斧頭已經比我搶先一步咁搶左過去！
我望住呀佩，一邊上下咁拋動手上面把斧頭，一邊笑得好甜咁同佢講“唔該，響我砍完柴，起埋個火之後，你就即刻同我收聲！”
講完，我就將把斧頭對住舊枯木一野飛過去！
“噗！”一聲，斧頭瞬間插實左響舊木上面！而我嘅呢一個舉動，令到所有人都嚇到呆住左！
呀佩比我嚇到愕一愕然，回過神之後就即刻大鬧“八婆！你講乜野丫！靠嚇丫！”然後舉起隻手想打我
但係當佢一舉起手嘅時候，就已經有人出手攔住左佢！而同一時間，思語見佢想打我，就即刻衝左過嚟諗住幫我報仇，亦都同樣比人拉住左
“放手！”。。。“冷靜啲！”。。。
我望住佢地呢個混亂嘅情況，微微咁皺一皺眉，然後踎低執起左佢地腳邊盒火柴，之後以完全無視佢地嘅狀態，慢慢咁行去舊木頭果度，跟住起腳一踢！
“砰！”成舊木頭即刻一塊塊咁散開晒！
同時間，成個環境亦都清靜晒。。。
我望一望地下嘅碎木條，背住佢地踎低響地下度扮用火柴，實則用靈火將其中一條木條點著，然後拎住佢企起身，隨手咁向住果堆生唔到火嘅濕木柴飛過去！
“啪！”果堆濕木柴瞬間點起左熊熊烈火
我拍兩拍隻手，滿意咁點點頭，然後望住佢地笑一笑
但係。。。佢地無人比反應我。。。個個都係擘大個口得個窿咁望住我。。。
哈。。。面對住呢個冷場。。。應該點做先好。。。！？
我尷尬咁摸摸鼻頭，諗左一諗，然後伸手指一指地下啲木碎，細細聲咁同佢地講
“Sorry。。。一時錯手。。。大力左。。。”
聽到秦天晴咁講，大家都合埋左個口，同時心諗“ 原來呢啲叫錯手。。。哦。。。原來係咁。。。” 然後繼續你眼望我眼。。。
就響呢個時候，有一把女聲突然打破沉默，講左句“咦！你地企晒響度做咩丫？”
我地全部人都同一時間擰過去望住聲音嘅源頭！
有個女仔帶住五個小朋友向住我地呢邊行緊果嚟！應該就係呀漢個女朋友同埋佢班學生！
不過，點解唔見啱啱果個小朋友嘅。。。？
為食狗一見到佢地，又開始“咕咕”叫，嚇到我即刻抱起佢細細聲咁講左句“乖乖，唔准嘈！”一陣佢又好似樹林入面咁，嚇親小朋友咁點算！
好在佢聽到我講之後，都乖乖地咁無再叫，只係就眼定定咁望住佢地
呀漢見到佢之後，就即刻走埋去攬住佢，然後同佢講“呀茹，你而家先出嚟架！”
而果個叫呀茹嘅女仔，就好溫柔咁拍一拍佢個背脊，然後話“係丫。。。我要捉班細路出嚟丫嘛。。。”
如是者，多得佢地嘅出現，我地終於都回復番本來嘅氣氛！而因為已經生好火嘅關係，我地就圍埋一齊開始燒野食！
雖然大家望我嘅眼神都有啲怪怪地，但係就完全一啲惡意都無，而果個呀佩呢， 經過啱啱件事之後，就一粒聲都無再出過，靜靜咁哩埋響呀峻身後面
但係有啲奇怪嘅反而係班細路，無論我地點叫佢地都好，佢地都行到遠遠咁望住我地，點都唔肯行埋嚟，不過呀茹話佢班學生好怕羞，唔洗理佢地，佢地會自己玩，所以我地就無再去叫佢地過嚟
燒野食，齋燒傾計好似無乜樂趣咁，於是呀東同子歉就提議不如講鬼故！大家一聽到呢個提議之後都即刻拍手叫好，只係除左我同呀峻之外。。。
我同呀峻兩個互望一眼，好無奈咁苦笑左一下。。。
響荒山野嶺講鬼故。。。一陣隔離突然多左一個“人”響度聽就真係。。。
不過大家都咁高興，我地當然唔會講埋晒啲掃興嘅野啦！所以就一個接住一個咁講落去。。。
其實大家講野鬼故，好多都係耳熟能詳嘅，所以一講完就會比周圍嘅人噓！而最多人噓嘅，就係呀佩講嘅《大頭怪嬰》！不過老實講。。。呢個又真係無乜人會唔知嘅。。。
好快就輪到呀峻講，佢同大家講嘅係一個自己上山捉殭屍嘅故事，有人聽得好入神，亦有人笑佢發緊夢，而子歉仲大聲咁話”呢個世界又點會有殭屍丫！有我就批個頭比你當櫈坐！”
聽到佢咁講，我真係好想回佢一句“我驚你有十個頭都唔夠批呀！”唔好話殭屍，連唔殭嘅活屍我都見過！所以呀峻所講嘅野。。。應該係真！
捉殭屍。。。呀峻呢個民間高手到底係啲咩人呢。。。
“晴晴！到你講啦！”思語拍拍我膊頭提醒我
我對住思語笑一笑，然後望一望大家，就淡淡咁將貓妖嘅經過，慢慢咁講出嚟。。。
因為係親身經歷，所以我完全咁陷入左回憶世界裡面，以至於我根本就無為意到，當我講到解剖嘅時候，叉緊生肉嘅人就無再叉落去，到我講到見到啲蛆蟲嘅時候，連食緊野嘅人都無再食落去。。。
而最重要嘅係。。。我講完之後先至記得。。。貓妖事件入面。。。思語都響度。。。
所以當我抬頭一望嘅時候，思語即刻狠狠咁瞪左我一眼！唔洗問，佢之後一定會對我嚴刑迫供！
我講完之後，就到最後一個人講，而果個人就係呀茹！
呀茹耷低頭開始話“響幾年前，有間學校嘅學生嚟左呢度露營，本來天氣好好，大家都玩得好開心，但係入夜之後，個天就忽然落起左一場大雨，所以大家就入晒去帳蓬度避雨，而入到去之後，老師就開始點人數，點知發現少左一個！”
”無論班老師點幾多次都好，都係差左一個！出面落咁大雨，一個學生響外面唔見左，好容易會出意外！所以成班老師商量完之後，就決定組隊出去搵佢。。。就響臨出發之前，有幾個學生同個老師講，啱啱佢地同失蹤左嘅果個學生玩緊僕哩哩，可能以為未玩完，所以唔出嚟。。。個老師聽到之後，就諗一諗，小朋友搵小朋友，應該會容易啲，於是就帶埋佢地一齊去。。。點知佢地入到去之後。。。竟然見到。。。”
就響我地聽到入晒神嘅時候，一把小朋友嘅聲，好大聲咁講左句“老師！琪琪唔見左呀！”
呀茹聽到之後，就即刻跑過去班小朋友果邊，而我地見到咁嘅情況，就全部人都一齊行過去，了解下發生左啲咩事
當我地過到去嘅時候，呀茹就已經攬住呀漢係咁喊，搞到我地想問，都唔知點開口去問
最後係呀漢同我地講，有個細路女唔見左，可能響樹林入面蕩失左路，然後問我地可唔可以幫手入去搵！我地當然係無問題啦，所以就即刻分成兩組入去！
呀茹，呀漢，呀峻，呀佩，呀東五個人一組，而我同思語，可兒，樂仔，子歉，再加埋為食狗同四個小朋友一組
黑夜嘅樹林真係好陰森恐怖，但係好在今晚天氣好，有月光照明，如果唔係仲得人驚！
不過而家呢個環境，都已經嚇到思語同可兒一左一右咁捉實我唔放！搞到我有好幾次差啲跌左為食狗落地！
唉。。。為左為食狗嘅安全，咁我就唯有放低佢落地叫佢自己行啦。。。
而樂仔同子歉就一直響度笑思語佢地，同佢地講“你地睇下前面果四個細路丫！人地手拖手，你地又要手拖手，但係人地四個加埋個年紀都仲少過你地兩個加埋丫，人地都唔怕，你地怕乜野丫！”
思語同可兒當然唔會白白咁比佢地話，而唔去反駁啦！於是佢地四個就不斷咁開火，而我就望住前面一直咁行
不過望下望下果陣，我突然發現有啲野好奇怪，但係又唔知有啲咩怪，所以就好聚精會神咁望。。。
終於。。。我知道有啲咩咁奇怪。。。因為影。。。！
前面果四個小朋友。。。無影。。。