秦天晴 — 有鬼 新章《畫》正式展開: 露營 — 第三章
雖然前面嘅環境好詭異，但都只係令我嚇左一嚇，好快就已經恢復過嚟！無辦法。。。最近見得太多恐怖嘅野，接受程度唔多唔少都提升左
我望住呀峻，輕輕咁點一點頭，表示自己已經見到，然後神色凝重咁問“要搵個藉口叫佢地走？”
點知呀峻對住我搖搖頭，然後話
“而家唔得，呀漢個女朋友同幾個學生已經到左，唔可以掉低佢地！”
聽佢咁講，即係點都要入左去先啦！
唉。。。最後麻煩始終都係搵到嚟！如果比軒轅皓知道嘅話，肯定又會幫我嘅黑歷史記上一筆！
我嘆左一口氣，伸手摸一摸為食狗個頭，然後認真咁同佢講
“狗狗，我知你擔心我有危險。。。但係思語佢地響入面，我無辦法唔入去丫！”
為食狗望一望我，然後就開始響我面前左行右行，仲一邊行一邊發出啲怪聲，好似啲人發牢騷咁！
行左幾轉之後，佢先至停低趴響我面前，“嗚嗚”咁叫左兩聲，表示妥協！
我對住佢笑一笑，然後抱住佢企起身向住果條小路行過去，而呀峻亦都即刻企起身同我平排咁一齊行
行到去條小路入面，我開始仔細咁打量住周圍嘅環境！同時亦都響衫袋度拎實張符紙，因為我好擔心會有啲唔知咩野突然之間飛出嚟！
而我隔離嘅呀峻呢，佢明明同我一樣都見到呢個情景，但係佢竟然好似普通郊遊咁輕輕鬆鬆向前行，令到我忍唔住開口問佢
“你唔驚側邊有野飛出嚟咩。。。？仲有。。。你唔怕果啲手突然之間捉住你隻腳丫？”
點知佢聽到我講之後，即刻笑左幾聲，然後答我
“你睇到嘅只係幻象，無攻擊力！”
幻象。。。？無攻擊力！？即係點。。。
佢見我皺住眉頭望住佢，於是就一邊行，一邊同我解釋番
“你而家見到成條路都灰灰黑黑咁，其實係因為呢度佈滿住怨氣！而果啲一隻隻嘅手，只不過係啲怨氣幻化而成！所以毫無攻擊力！”
聽到佢咁講，我即刻好驚訝咁“下！”左一聲！而下一秒，我就好哀怨咁問佢
“咁啱啱你做乜野要神神秘秘咁同我講丫。。。仲等我以為好大獲！”
佢聽到我咁問，竟然好真誠咁同我講
“哦。。。我啱啱擔心直接同你講嘅話，會嚇親你丫嘛！”
先生！其實你神神秘秘咁仲更加嚇親我囉。。。
呢一刻，我已經揸定主意，以後一定要將呀峻介紹比Cindy識。。。因為佢地係《同道中人》！我諗佢地一定會好夾。。。
佢見我無言以對咁望住佢，就尷尬一笑，然後話
“呢度安全，但係唔代表入面係安全！能夠產生咁多怨氣嘅地方，就只有一個！亂葬崗！而呢度咁多怨氣，但係都只係凝聚左鬼手幻象，證明呢度係有野鎮壓住佢地！”
講到呢度，佢停一停，然後望住我認真咁話
“但係所謂嘅鎮壓，都只係對本身存在響呢度嘅野有用，對於怨氣所感染而衍生出嚟嘅野，係一啲作用都無，所以。。。入面可能會有其他野響度！”
會有其他野響度。。。呢句說話響我腦海入面產生左無限嘅幻想，同時，亦令我諗起一樣野！
點解佢會知道呢啲野嘅。。。！？
唔通。。。呢啲就係傳說中嘅《高手在民間》！？
既然呢度無危險嘅話，我就決定閂番隻天眼，因為我無辦法可以好似呀峻咁，望住周圍黑蚊蚊嘅環境，都可以當無事發生
閂完之後，周圍瞬間回復番天朗氣清嘅景像！
我地一直行一直行，終於都見到佢地！於是我同呀峻就快步咁走過去歸隊！而當我地行到過去果陣，就發現佢地成班企晒響度，唔知望緊乜！
思語一見到我行過嚟，就走埋嚟捉住我隻手臂話
“晴晴，好恐怖丫。。。無啦啦有塊咁嘅碑！”
而佢身邊嘅可兒就捉住我另一隻手臂話
“係囉。。。好似好邪咁。。。不如我地走囉！”
好恐怖！？ 好邪 ！？ 唔知係啲咩嚟呢。。。
我深深咁吸左一口氣，然後上前望下！
原來，果度有一塊半個人咁高嘅黑色石碑，塊石碑嘅背面刻住左個符咒，而石碑嘅前面就刻左兩個紅色大字 —《鎮魂》！
我即刻諗番起呀峻話呢度有野鎮壓住啲怨氣，唔洗問，應該就係眼前嘅呢一塊《鎮魂碑》！
呀佩聽到思語佢地同我講嘅野，就再次發揮佢嘅乞人憎本領，開口話
“生人唔生膽！咁驚就唔好嚟啦！”
思語聽到之後，正想反駁，但係呀漢就搶先開聲話
“前面就到啦，呀茹同班細路都響果度，不如過左去，睇下點先至再講啦！”然後轉身繼續行
隊長一發言，全部人即刻收晒聲！大家你眼望我眼之後，就跟住佢行過去，當我地行到去一個斜坡嘅最高點之後，呀漢終於都停低響度，然後轉身同我地講 “我地到啦！”
到左！？ 呢個斜坡係營地！？果然，有疑惑嘅並唔止得我一個！
思語個ex，樂仔就即刻開聲話“漢哥，呢度咁斜，唔係好適合紥營喎！”
呀漢聽到樂仔咁講，就伸手向後指一指，然後話
“營地唔係響呢度，係響下面！”
大家聽到之後，就即刻行去佢身邊，向下望，然後同時”哇！”左一聲！
因為下面個地方嘅環境真係唔錯！
由左邊開始，係一條清澈嘅溪澗，然後就係一塊碎石地，之後過少少就係草地，然後最右手面就係樹林！
我地成班人即刻走晒落去諗住周圍望，而呢個時候，呀漢望一望隻錶，就提議我地不如紮好個營先至再去
大家諗左諗，都同意佢嘅講法，於是就響草地度開始紥營，連本來仲好驚嘅思語同可兒都落手落腳去紥！我諗呢個環境已經令佢地唔記得左啱啱果塊石碑！
見到大家都落手落力去整，我當然要幫手啦！但由於我真係零經驗，根本就唔知應該要點做，所以就開口問佢地有啲咩可以幫到手
點知大家都好客氣咁話唔洗，搞到我抱住為食狗企埋左一邊，勁尷尬！
呀漢見到呢個情況，就指一指旁邊嘅樹林，提議我入去執啲枯枝番嚟生火，仲話佢女朋友應該同班細路響入面玩緊，叫我如果見到佢地嘅話，就行過去叫佢地番出嚟喎！
我點點頭，同佢講左句“無問題！”，就抱住為食狗擰轉身諗住行過去，而呀峻一見我行過去，就即刻走埋嚟主動話陪我去，仲同我打左個眼色
我知道佢嘅意思，佢擔心入面會有啲唔好嘅野響度，但係我有為食狗，有九節鞭，有符紙，我諗遇到啲咩都應該可以走得甩。。。何況我仲有修羅閻君嘅降魔金鈴護身呢！
所以我決定回絕佢，點知我都未開口，就有把超級嗲聲對住我地呢邊大叫
“呀峻！救命丫！人地整唔到丫！哎呀！仲整親好痛丫！你快啲過嚟幫下我啦！”
聽到呢把聲，唔洗望都知係邊個啦！我對呀峻挑挑眉，笑一笑，佢即刻嘆左一口氣，叫我小心啲，然後死死氣咁行過去
望住佢個淒慘嘅背影，我忍唔住笑左幾聲，先至行入去樹林裡面
因為我要執柴嘅原故，所以一入到去，我就放低左為食狗，然後耷低頭，一邊行，一邊執起啲枯枝，放入去我孭住嘅行山背囊入面
為食狗見我執樹枝，就好聰明咁周圍走，去咬啲樹枝放響我身邊，多得佢嘅幫忙，好快我就已經塞滿左個行山背囊，番出去卸貨
如是者，走左三，四轉之後，已經執左一大堆枯枝！我望一望，應該都差唔多夠啦！但係呀漢話執多轉會好啲，於是我就快快步咁走入去，因為個天已經開始暗，我驚出唔切嚟！
再一次，我同為食狗合作無間，好快就將個行山背囊塞爆晒，我拍兩拍手，講左句“搞掂！收工！”，然後轉身諗住行番出去
點知呢個時候，為食狗突然向住我身後不停“汪汪汪”咁叫！
聽到佢係咁吠，嚇到我即刻轉身望過去！
原來係一個約莫十歲嘅小朋友，企左響我身後嘅果幾棵芭蕉樹下面
諗番起呀漢交帶我，如果見到佢女友同班細路嘅話，就行去叫佢地出嚟！所以我就開口叫為食狗唔准吠，然後向住佢行過去
不過奇怪嘅係，我一行埋去，佢就向後退，我一行，佢又退，仲好似好警惕咁望實我！
我諗應該係為食狗啱啱嚇親佢，唯口離遠咁同佢講
“你地快啲出嚟啦！就嚟天黑啦！”
講完，我就帶住為食狗轉身慢慢咁行番出去
如果呢個時候，我擰轉頭望一望嘅話，應該就唔係慢慢咁行番出去，而係九秒九咁衝出去！
因為，我身後根本就一個人都無！
有嘅只係一棵棵芭蕉樹。。。響度無風自動。。。