秦天晴 — 有鬼 新章《畫》正式展開: 露營 — 第二章
朝早七點鐘，我比三個鬧鐘圍住嚟同時響嘅攻勢之下，終於都成功咁爬左起身去整理下今日露營所需要嘅行裝
雖然我係第一次去露營，根本就唔知應該要帶啲咩，但係我知道有三樣野一定要帶！
九節鞭！符紙！降魔金鈴！
望住枱面呢三樣野，瞬間覺得自己距離神棍又接近左一大步。。。
將呢啲野近身收好之後，我就打開個背囊，再點一次有無執齊需要用嘅野
水壼。。。衫。。。風褸。。。睡袋。。。為食狗。。。
咦。。。。？為食狗！？。。。
我望住哩埋響睡袋入面咋死嘅為食狗，頓時滿頭黑線。。。心諗
”你咁樣哩埋入去，唔怕會焗死自己架咩。。。？”
見佢毫無已經比人發現左嘅自覺，我就唯有對住佢，細細聲咁叫左一聲“為食狗！”
點知佢聽到我叫佢，嚇到微微咁打左個震之後，竟然繼續咋死！超級搞笑！
其實，我本來就諗住帶埋佢去，因為自從佢跟左我番嚟之後，出去嘅機會就變得好少，除左每日固定響附近行一轉之外，根本就無再去其他遠啲嘅地方
雖然我知道佢並唔係一隻普通嘅狗，但係由佢選擇左放棄自己嘅世界，而進入左我嘅世界之後，佢就已經將自己完完全全咁交托比我
或者，作為人嘅我，有自己嘅生活，娛樂，同朋友，但係對於狗狗嚟講，佢就只有我。。。
我伸手將為食狗抱起，然後輕輕咁摸左佢幾下，同佢講
“狗狗，我會帶埋你去架，你唔洗再哩埋響入面啦，不過。。。你要乖乖地聽我話，跟住響我身邊，唔准亂咁走架！”
“汪！”為食狗即刻回應我一聲，然後不停用條尾嚟掃我隻手，搞到我好痕，忍唔住係咁笑
我繼續拎下呢樣，整下果樣咁，再望下個鐘，都已經八點五十分，於是我孭起個背囊，抱起為食狗，就轉身行去門口，經過餐枱果陣，見到枱上面果十幾隻平安公仔，諗左諗，決定帶幾隻去送比人做見面禮！
雖然人地可能會覺得好幼稚，不過。。。都係心意姐，你要就要，唔要就。。。隨你囉！
落到街等左一陣之後，就有架藍色七人車向我呢個方向駛埋嚟，而架車一停低，思語就衝落車向住我飛撲埋嚟！
為食狗即刻向佢“嗚嗚”左兩聲，好似叫佢小心啲咁，而思語聽到佢嘅“嗚嗚”聲之後，果然馬上停低唔再撲埋嚟，轉為望住佢同我講
“晴晴，你幾時有養狗架！細細隻咁，好得意丫！佢叫咩名丫！？”
叫咩名。。。嗯。。。為食狗算唔算係名呢。。。？再唔係。。。叫狗狗？我平時都係咁叫佢架喎。。。
我響度苦惱緊點樣答佢好嘅時候，車上另外果幾個人都已經落左車向住我行埋嚟，係三個男仔，同一個女仔
佢地一行到過嚟，就好Nice咁打招呼，然後嚟左個自我介紹，而我都同樣咁對佢地打左個招呼，仲響自我介紹完之後，送左我嘅見面禮比佢地
出奇地，佢地竟然無嫌棄我隻公仔，仲好開心咁拎住嚟比較，話自己果隻靚啲！見到佢地都鐘意，我都鬆左一口氣！
最後，佢地將果隻公仔扣左落去個身嘅唔同位置度，用嚟當團章，超好笑
我地有講有笑，嘻嘻哈哈咁，就去到集合嘅地方，而團嘅另外三個人亦都已經企左響度等我地，係兩個男仔，同一個女仔
我見啱啱係人地做主動，就諗住今次不如就我做主動啦！於是我就行埋去對住佢地做左個自我介紹，同時送上一隻公仔
點知，個女仔好嫌棄咁話“咁大個人仲送公仔比人！仲有無幼稚啲呀！”
而另一個男仔就對我笑一笑，搖一搖頭
我見佢地咁嘅反應，摸摸鼻頭諗住收番埋，而呢個時候，最後果個身材高大嘅男仔竟然伸手拎走左我隻公仔，然後開口同我講
“我叫呀峻！呢隻好野嚟！多謝！”
我望住佢，覺得有啲熟口熟面唔知似邊個！
死啦。。。我係咪有病丫！？點解呢排望住啲人都總係有啲似曾相識感架！？
我拍兩拍自己塊臉，對住佢笑一笑，然後話“你好，我叫天晴！”之後就轉身走去搵思語
由於我一講完就轉身走，所以並無發現到，當我介紹完自己之後，呀峻喃喃自語咁講左句
“天晴？唔知係咪姓秦架呢。。。”
既然人都已經到齊晒，咁我地就準備行上山！
啱啱對我笑一笑，然後搖頭拒絕我隻公仔嘅叫呀漢，係今次露營嘅發起人！
我地一陣行嘅路線同紥營嘅地方，都係由佢揀嘅！所以佢就行最前面，而我地女仔就行響佢後面，其他男仔就跟住我地後面
一開始，條路唔係好難行，大多係平路，或者少少斜路，所以大家都好似啱啱嚟果陣咁，響度有講有笑
而唯一唔合群嘅，就只有帶緊隊嘅呀漢，同埋啱啱話我幼稚嘅果個叫呀佩嘅女仔
思語同可兒兩個偷偷地咁話比我知，原來呢個呀佩一直都係犯眾憎，無人鐘意佢，今次佢會嚟都係因為呀峻響度，所以死跟過嚟！
哦。。。原來係咁！不過對我又無影響嘅，事不關己，一於少理！
就響我地邊行邊講笑嘅時候，為食狗突然對住我“汪汪”咁叫左兩聲，之後就好似小朋友咁，咬住我隻褲腳，扯住我唔比我行
見到佢咁樣，我就以為佢行到攰啦，咪伸手諗住抱起佢，點知佢竟然避開，唔比我抱喎！
而呢個時候，呀佩就響我身邊，好尖酸刻薄咁講左句
“好心就唔好帶隻廢物狗嚟啦，阻住晒條路！”
為食狗聽到佢咁講，全身嘅毛毛都即刻豎起晒，然後對住佢發出“咕咕”咁嘅叫聲！
為食狗呢個反應，令我諗番起佢之前對住貓妖果陣，都曾經係咁嘅樣！然後。。。佢就變大撲過去！
唉。。。人算不如天算，我不找麻煩，麻煩老愛找我，就連我不犯人，人都愛走嚟犯我。。。
我搖搖頭，嘆左一口氣，然後輕輕咁講左句
“為食狗，唔好同呢啲人一般見識，我地去後面慢慢行！”
點知呀佩聽到之後，就郁手推開我，同時大聲咁話“喂！你講乜野丫你！”
見到呀佩出手推我，思語同可兒即刻擋住響我面前，而後面班男仔聽到我地咁嘈，亦都行快幾步咁走過嚟，睇下發生左啲咩事，只有行響前面嘅呀漢，一副睇戲咁嘅樣，繼續企響前面
呀佩見到呀峻行埋嚟，竟然瞬間變臉！好委屈咁話
“我知你地都唔鐘意我架啦！但係你地點可以排斥我架！”
聽到佢咁講，我都懶得去反駁，冷冷咁望左佢一眼之後，我就行左去班男仔嘅身後面，然後淡淡咁講左句
“你地行先，我要留響後面阻住晒成條路。。。”
而呢個時候，一直冷眼旁觀嘅呀漢，終於都開口話
“快啲行，如果唔係太陽落山之前都去唔到，為免影響進度，佩佩你地三個繼續跟響我後面，天晴你就行最後啦！”
講完之後，佢就轉身繼續出發，而思語本來想出聲反對，不過見我搖搖頭，佢先至嘟嘟咀咁繼續行
我等佢地行開左之後，就踎低響地下度細細聲咁問為食狗“前面有危險？”
以我所知，為食狗會攔住我，就肯定係有問題先到會咁做！
果然，我一問完，為食狗就對住佢地正在行緊嘅果條小路，不斷咁發出“咕咕”聲！
唔通。。。果條小路有問題！？
我一直望，一直望，但係望左好耐，都睇唔出有啲咩危險喎！
前面都係啲花草樹木之嘛，望落去好正常丫，最多係兩邊嘅草生得比較高身少少姐！同埋日光日白，太陽又猛，點睇都唔以有問題丫！
到底。。。係有啲咩唔對路呢。。。？
就響我諗到皺晒眉頭嘅時候，呀峻突然調番轉頭向我行埋嚟，然後踎響我面前，做口形咁同我講“你都見到！？”
我見佢對我做口形咁神秘，咪學佢做口形咁問番佢“你指乜野！？”
佢見我唔明，就用手指一指自己隻眼，然後做口形話“天眼！”
天眼。。。？用陰陽眼睇。。。？
於是我就打開陰陽眼去睇，點知一望，我成個人當堂嚇左一嚇！
響我眼前嘅小路。。。成條都係灰灰黑黑咁嘅顏色。。。
而果啲高身少少嘅草。。。根本就唔係一條條嘅草。。。
而係。。。一隻隻焦黑嘅人手。。。