秦天晴 — 有鬼 新章《畫》正式展開: 露營 — 第一章

距離上次嘅大戰，唔經唔覺咁已經過左三日啦。。。

響呢三日入面，除左暈低左嘅第一日之外，其餘果兩日都一直無所事事，留響屋企同為食狗相依為命

無辦法啦，呀爸呀媽番左鄉下，要半個月後先至番嚟，嚴正晞又同左個女朋友唔知1號定2號去左歐遊，而軒轅皓同凌嘯峰就番左去總部，去匯報番今次呢件事，唔知要去幾多日

諗番起果日，軒轅皓臨走之前同我講左句

“放你五日假，記得留響屋企，唔好周圍走！你容易出事。。。”然後送左個《你懂的》嘅表情比我。。。





嗯。。。我懂。。。我真係懂。。。有我嘅地方，就有罪案嘅發生丫嘛！

嗚嗚。。。明明我不惹麻煩，但麻煩愛找我。。。關我咩事姐！

可惜，我嘅心聲佢聽唔到。。。

之後，佢望住我好認真咁補充多句

“唔准再用符陣。。。危險！” 





嚇到我即刻舉起左三隻手指對天發誓，暫時都唔敢啦！

點解我會咁驚呢！事緣係三日之前，我出完個雷陣之後就失去左知覺，根本就唔知道之後發生過啲咩事，所以一醒番我就開口問軒轅皓

點知我一問，佢竟然唔係答我，而係伸出兩隻手，搣左我塊臉一下！然後講左一句

“亂咁嚟！下次你就知味道！”

我即刻囧左，心諗“你做咩無啦啦搣我丫。。。” 





而凌嘯峰見到我個囧樣之後，就忍唔住哈哈大笑，笑左陣之後，就將果日所發生嘅事話番比我聽，原來。。。

我果日出完招五雷轟頂之後，就因為靈力用盡而虛脫暈倒，而個符陣無左我嘅掌控，啲雷電就失晒控咁變成左無差別攻擊，見野就劈！

劈完啲鬼娃娃之後，又劈落去倉庫嘅其他地方，仲連佢地都劈埋一份！好在黑白無常反應夠快，幫佢地佈左個結界，如果唔係佢地就已經變晒炭灰！

聽到呢度，我都已經唔知比啲咩反應好，點知凌嘯峰之後講嘅野，真係令到我想扻頭埋牆！

佢話啲雷電無間斷咁不停劈，劈到成個倉庫都變到溶溶爛爛，最後。。。仲成座比佢劈冧左！

當時好在有黑白無常同修羅閻君同時出手，一人抱一個咁飛出去，大家先至可以全身而退，如果唔係就同班鬼娃娃一齊陪葬！

聽完佢咁講，我得出左兩個結論，第一個係，唔怪之得軒轅皓會搣我啦，原來係我差啲害死左大家。。。仲包括埋我自己！

而第二個結論係，五雷轟頂真係名符其實嘅五雷轟頂！差啲搞到連自己個頭頂都轟埋！真係唔可以亂用！





我伸手扶額，然後開口問“咁之後呢！？仲有無。。。？”

然後佢繼續話，出番嚟之後，修羅閻君就對住果堆瓦礫放左個火蓮，將佢地全部燒毀，而黑袍人個頭響我出五雷轟頂果陣時，就已經趁混亂乘機飛走左。。。

回想到呢度，”唉。。。”我輕輕咁嘆左一口氣，爬左落床，拎起左枱上面果個黑色嘅木盒，然後慢慢咁打開。。。

裡面有一張卡字，寫住 “你個護身法器暫時無用，拎住佢，保你平安！”
 
而卡紙嘅下面，放左一個全黑嘅叮噹。。。

望住佢，我腦海入面慢慢咁浮現出一個著住白袍，頭帶面紗嘅人。。。

修羅閻君。。。





點解要將個降魔金鈴放響我衫袋入面呢。。。

仲有。。。我究竟響邊度見過你呢。。。？

就響我諗到入晒神嘅時候，一陣音樂聲打斷左我嘅思緒，我拎起個電話望一望，原來係思語

“點丫思語，係咪決定放棄你個異性轉投本小姐嘅懷抱丫？”一接電話，我就同佢開玩笑咁話

點知思語聽完我講之後，就嬲爆爆咁話

“係丫！我而家需要你，唔要佢啦！”

聽到佢嘅語氣，就知道佢地肯定係鬧左交啦！不過安慰人我唔係好在行。。。唯有順下佢意，氹下佢啦！

於是我開口扮豪氣咁同佢講





“好好好，只要你需要我，上刀山落油鑊我都陪你闖！”

果然，佢聽到之後，就忍唔住笑左兩聲，然後話

“落油鑊就唔洗啦，你聽日陪我上山啦！”

佢咁講，令我愕一愕然，我啱啱隨口嗑咋喎！竟然真係要上山！？

我即刻開口問“上山，上咩山丫？上山做乜？”

我估佢可能知道我個心諗緊乜，所以我問完之後，佢就不停咁笑，直到佢笑完，正常番先開口同我講

“無呀！去露營之嘛！同我以前啲大學同學去！本來我男人都去架，點知當佢知道左我個ex都去之後，就反晒面咁死都唔肯去！而家我無人陪丫！你陪我啦！”





聽完佢咁講，我本來想即刻答佢“好丫！我去丫！”反正無所事事無野做丫嘛，去行下都好丫

但係諗諗下，上山嘅話可能會遇到果啲野架喎。。。會唔會一陣麻煩又找上我架。。。

比軒轅皓話得多，連我自己都有啲驚驚地！結果，就處於天使與魔鬼嘅掙扎之中！

呢個時候，思語見我唔答佢，就施展左佢嘅絕世嗲功！

“晴晴丫！你話陪人地架。。。你唔可以呃人架，去啦去啦，好唔好姐！”

丫。。。！？佢把聲加埋佢講嘅野，聽到我全身毛管都棟埋！搞到我神推鬼㧬咁答左佢一句“好。。。”

結果佢驚死我會反悔，講左句“有人揸車，聽朝九點響你屋企樓下等！”之後就收左我線

就係咁，我就無啦啦咁踏上左露營之旅

而且。。。仲係一個恐怖嘅露營之旅。。。