秦天晴 — 有鬼 新章《畫》正式展開: 洋娃娃 — 終章 （下）
黑無常見到黑袍人咁嘅反應，就專登咁同佢講
“係丫，我係黑無常，佢係白無常，我後面嘅係修羅閻君！”
然後白無常就再一次接住話
“你無眼花！無睇錯！係咪好驚喜呢？”
結果搞到黑袍人成個人愕住左！
而我聽完之後，先至醒番起，我身後面應該係有個人企響度！
於是好奇嘅我，就想轉身去望一望啦，點知我都未郁，耳邊就傳嚟一把男聲同我講
“咪亂郁，會跌落去！”
咪亂郁？會跌落去？。。。唔明！
唯有自己耷低頭望下，竟然比我見到箍住我條腰嘅並唔係啱啱條鎖鏈，而係一對手！同時，亦都明白左點解佢會叫我唔好郁
因為佢係抱住我企響半空之中。。。
黑袍人愕一愕之後，就突然情緒好激動咁話
“點解你地會搵到嚟呢度！？明明呢個山頭都佈左陣法！地府嘅人根本就無可能搵到嚟！”
而我身後嘅修羅閻君聽到佢咁講，即刻大笑左兩聲，然後話
”好笑！你認為你果啲咁嘅陣法仔就可以瞞得過我地？你未免太睇少本君，太睇得起你自己！”
講到呢度，佢攬住我飛番落地，然後鬆手將我放開，繼續話
”你禁錮左我地府數以萬計嘅鬼魂，就算本君追到天腳底，都唔會放過你！”
一講完，佢就向住黑袍人飛身閃出去，同時揮動手上條鎖鏈，向住黑袍人打過去！
黑袍人見修羅閻君二話不說就開打，無辦法底下，唯有迎戰！當佢閃身避開修羅閻君呢一擊之後，就瞬間拎出武器— 骷髏鬼錘去反攻！
我望住放低左我之後，就衝去同黑袍人過招嘅修羅閻君，唔知點解總有啲似曾相識嘅感覺。。。身穿白袍。。。頭帶面紗。。。響邊度見過呢。。。
“天晴！有無事？”軒轅皓同凌嘯峰見到修羅閻君將我放番落地之後，就即刻衝埋嚟問
我對住佢地原地轉左個圈，笑一笑，然後話
“無事喎，無穿無爛！”之後就再次望番去戰場果邊，繼續諗。。。
黑袍人不斷咁對修羅閻君施展鬼錘攻擊，但係根本就一啲效都無！因為修羅閻君一直都無乜點埋過佢身，就算有一兩次比佢地拉近距離都好，修羅閻君都會響鬼錘打埋嚟之前，瞬間飛遠，然後再一次對佢揮出鎖鏈！
而鎖鏈受到修羅閻君嘅控制，變得好似一條蛇咁靈活，無論黑袍人點樣閃躲，都無辦法可以完全避過去，你來我往咁過左幾招之後，黑袍人件衣袍就已經被鎖鏈打穿左幾個窿！
見到自己件袍比人打成咁，羞惱成怒嘅黑袍人即刻將支骷髏鬼錘合二為一，然後咬破左自己隻手指頭，將鮮血掃上去，之後再從頸上面拎左一串寫滿符咒嘅木牌出嚟，大叫一聲
“血咒！萬鬼降！去！”
鋪天蓋地嘅血腥之氣不斷由木牌上面傳出嚟，而隨著骷髏鬼錘一下敲落去，千萬鬼魂睜開血盤大口向住修羅閻君飛過去！
修羅閻君無諗過黑袍人已經將千萬生魂煉成降！
“千萬惡魂。。。”佢喃喃自語，然後伸手入衣袖拎左樣野出嚟。。。
係一個發出金光嘅黑色叮噹。。。
佢望住眼前嘅千萬惡魂，然後舉起左手上面嘅叮噹，之後淡淡咁講左句“降魔金鈴，一搖驚天地！”，同時一搖！
清脆響亮嘅“叮”一聲遍佈成個倉庫！
千萬惡魂以及地下上面嘅屍鬼都不斷咁抽搐！
修羅閻君冷冷咁望住眼前嘅景象，繼續話 “ 二搖震寰宇！” 再次一搖！
“叮”。。。千萬惡魂同屍鬼隨即發出驚天動地嘅慘叫聲
呢啲悽厲嘅慘叫聲，令到我個心再一次好似跌左落冰窖咁，心寒嘅感覺令我微微咁抖震，不安，恐懼感佈滿全身
呢個時候，黑無常突然走嚟我面前，同我講“ 唔好比惡魂影響心緒，合埋雙眼，用靈力穩住心神！”
合埋雙眼。。。穩住心神。。。
我依照佢咁樣講去做，果啲唔好嘅感覺，終於都慢慢咁消失左
而呢一刻，修羅閻君再次搖動手上嘅叮噹，大喝一聲“三搖滅，鬼，神！”
“叮。。。” 隨住第三聲清脆響亮嘅叮一聲，成個倉庫都變得寂靜無聲
“噗。。。！”黑袍人突然噴出一口鮮血，令到全部人都同一時間望住佢
修羅閻君見佢雖然係強弩之末，但為免夜長夢多，就打算速戰速！
“煉獄之火！”隨著修羅閻君揮動鎖鏈，同時大喝一聲，混合住黑紅色嘅火燄瞬間從佢嘅手掌度噴出，然後將成條鎖鏈吞沒！
煉獄之火，係一種令天下生靈無一不驚嘅火燄，因為佢燒嘅並唔係萬物，而係靈魂！一經接觸，輕則痛不欲生，重則灰飛煙滅，永不超生！
黑袍人望住果條從頭到尾都被火燄所覆蓋嘅鎖鏈，驚恐得不斷向後退，同時大叫
“修羅閻君！你敢！奉靈教唔會放過你架！”
修羅閻君聽到之後，冷笑一聲，然後話
“呵！你認為我唔敢？”
佢拎住條煉獄鎖鏈一步一步咁行埋去黑袍人度，繼續冷冷咁話
“奉靈教有放過我地咩？我話比你知，幾百年前我可以忍，而家。。。你同我去死！”
話音一落，煉獄鎖鏈向住黑袍人直直咁抽過去！
黑袍人知道自己肯定係避唔開呢一擊，就算僥倖避開，只係受左輕傷，都一樣會被煉獄之火傷及靈魂！
與其靈魂受創，永不超身，倒不如避重就輕！於是響煉獄鎖鏈即將打中佢之前，佢即刻將個頭同個身分開！
同時，佢將分開左嘅頭，轉向我地呢邊狠狠咁瞪左我地一眼，然後話
“本來諗住收左你地做屍鬼！哼！就算我死，你地都唔洗指意可以離開呢度！娃娃兵！同我殺晒佢地！”
遷怒！！佢絕對係遷怒！！
隨著佢話音一落，數以千計嘅鬼娃娃向住我地呢邊飛埋嚟！
黑無常輕輕咁嘆左一口氣，然後同白無常講左句
“保護呀晴！”，之後就向住班鬼娃娃飛左出左
保護呀晴！？。。。係咪話緊我。。。？
凌嘯峰聽到之後，即刻好驚訝咁走嚟問
“天晴！你識陰差！？”
連冰山軒轅皓都一臉《我都好想知》嘅表情望住我，我扶額！
你地問我，我問邊個丫！！！？
白無常望住我一臉無奈嘅表情，就望住佢地開口話
“打到嚟啦，仲講！“
然後轉向我，好溫柔咁話
”呀晴，我幫你佈結界，你記得企響個圈入面，唔好行開呀！”
講完，就圍住我用腳畫左個圈！
嗚。。。有無人可以話比我知，你地係乜水呀！！？
講到呢度，鬼娃軍團終於都殺到埋身！而軒轅皓佢地亦都開始對佢地不斷攻擊！
但係呢啲娃娃同啱啱啲屍鬼唔同，根本就唔會因為受到攻擊而唔再行動，而依照上次果隻鬼娃娃嘅經驗。。。要將佢地完全打碎先至可以消滅！
呢度有咁多隻。。。要點樣先至可以將佢地打碎晒呢！？
就響我諗諗下嘅時候，突然，有一把空洞嘅女聲講左句 “你。。。可。。。以。。。用。。。雷。。。陣。。。”
“邊個！？”我即刻全身戒備咁周圍望
“唔洗驚。。。我一直。。。都係保。。。護。。。你。。。” 女聲慢慢咁回應我話
“保護我？”我有啲疑惑咁問
“係。。。你合埋雙眼。。。我借你力量。。。不過之後我要沉睡。。。你要靠自。。。己。。。”
雖然我有啲唔係好明，但係我都聽佢講，合埋左雙眼。。。然後就好似之前office果次咁，有好溫暖嘅感覺，全身亦都好似充滿左力量。。。
而呢個時候，我腦海入面，突然出現左一個符陣！
我隨即睜開雙眼，拎出衫袋入面嘅一叠符紙全部向天上飛上去，開口唸
“渾沌無象，一氣化生，開朗天地，雷霆降臨！”
符紙依照我腦海入面嘅符陣飛到去各個位置，然後我大喝一聲
“五雷轟頂！”
話音一落，雷電佈滿左成個倉庫嘅上空，形成左一個大大嘅電網，然後向住所有鬼娃娃一下撲落去！
“砰！砰！砰！”無數嘅爆炸聲不斷咁響起，之後。。。。。我就再次失去知覺
而我失去知覺之前，好想同女聲講
”明明你淨係話你會沉睡之嘛。。。你無話過我都會一齊睡埋一份架喎。。。”
你呃人！！！！！！！