秦天晴 — 有鬼 新章《畫》正式展開: 洋娃娃 — 第二章
我抱住悠悠慢慢咁行去搵軒轅皓，而悠悠就一直攬住我，伏響我個膊頭度郁都唔郁，唔知係咪瞓著左
條路唔係好遠，所以好快就行到去軒轅皓架車度，而佢見到我地之後，就行去後座幫我地打開度門，眼見對門係開左，但係我就遇到個難題！
未湊過小朋友嘅我，真係唔識得點樣可以抱住佢上車呀！！
我開始嘗試向前烏低身，但係失敗！我又嘗試左打側個身，亦同樣失敗！仲撞親個頭！試左幾次之後，我決定抬起頭望住軒轅皓求助，而佢見到我咁嘅樣，只係淡淡咁講左句“自己上車！”
聽到佢咁講，我唯有響心入面安慰自己 “自己嚟咪自己嚟囉。。。嗚。。。求人不如求己，我靠自己！”
安慰完畢！我再次彎身嘗試瓹入去，點知軒轅皓竟然伸出隻手嚟攔住我，然後再次講左句“自己上車！”
我呆左咁望住佢。。。你而家攔住我唔比我上車，又叫我上車即係點。。。？不過諗諗下，點解呢個情況咁熟口熟面嘅？唔通。。。
於是我開口問”呀皓，你同悠悠講丫？”
軒轅皓對我點點頭，然後望住悠悠冷冷咁話“細路，自己上車”
軒轅皓一講完之後，悠悠就放開我，掙扎要落地，然後自己爬左上車
我望住悠悠咁乖巧懂事，再望下軒轅皓又化身成舊冰山咁，瞬間覺得悠悠好可憐，咁細個就比人凍親，都唔知會唔會有童年陰影。。。
軒轅皓見到秦天晴一時望下自己，一時又望下個細路，仲時不時皺下眉，肯定又唔知響度亂諗啲乜，有啲好笑咁話“走啦！”
我地好快就番到屋企，軒轅皓送左我上嚟之後，發現屋入面無人響度，就開口問”世伯，伯母呢？”
我抱住出嚟迎接我嘅為食狗，摸左佢兩下，然後答佢”佢地番左鄉下，所以而家得番我同悠悠，仲有為食狗三個”
點知佢聽到之後，即時用啲好奇異嘅眼光望住我，好似覺得淨番我地兩個人同埋一隻狗，唔知可唔可以生存到第二日咁！我即刻望住佢反左個白眼！
做完呢個動作，我忽然諗番起有啲野想問佢！於是就叫佢坐響客廳度等一等我，然後拖住悠悠入我間房度休息，再叫為食狗入去陪佢
因為有啲野，唔適合比小朋友知
關好門之後，我就行出廳度開始同軒轅皓講番啱啱響Cindy屋企發生嘅事，包括奇怪嘅感應，同埋果下突如其來嘅巨響
講完之後，我有啲猶疑咁問“呀皓，你估Cindy屋企會唔會真係有啲野。。。？”
佢聽完之後，就話”好大機會有，因為你而家有靈力，有靈力嘅人會對呢方面特別有感應”
聽到佢咁講，我就默默咁決定聽日上Cindy屋企查下！
就響呢個時候，我間房突然傳嚟“乒拎乓啷”嘅聲音，仲有為食狗“汪汪”嘅叫聲！我同軒轅皓互望一眼，就即刻衝過去！
當我打開房門一睇，我當堂成個人呆住左，因為我間房好似比人打完劫咁，書枱上面啲野飛到周圍都係，張床又超亂！個窗又無啦啦打開左！為食狗就唔知點解對住個窗係度“咕咕”叫，而悠悠就好似受左好大驚嚇咁，一見到我就跑過嚟攬住我！
究竟，呢度發生咗啲咩事！？
雖然我好想問，但係我都唔知可以問邊個！眼見悠悠一直抱住我隻腳唔放手，我就唯有抱起佢，響佢個背脊度輕輕咁拍左幾下，同佢講“無事，有哥哥同姐姐響度唔洗驚！”
軒轅皓見為食狗對住個窗不斷“咕咕”叫，知道外面有古怪，就開口叫秦天晴帶埋為食狗去客廳度等佢，然後就關埋房門，將腰間果枝警棍拎起變成伏魔劍，警惕咁慢慢行去窗邊，但係當佢行到過去嘅時候，竟然發現窗外面根本就乜都無，但係事出必有因，所以佢伸手幫秦天晴關好個窗之後，就響個窗邊度放左張符紙，先至出番去客廳搵佢地
我抱住悠悠坐左響客廳張沙發度等軒轅皓出嚟，但係越等越不安，因為我知道啱啱肯定係有啲野入左去我間房度。。。只係唔知道究竟係乜野
狗狗好似感覺到我嘅情緒，所以從地上面跳上嚟，坐響我嘅身邊陪住我，過左陣之後，軒轅皓終於都由間房度行左出嚟，而佢一開口就同我講
”呢個細路好似招惹左啲野番嚟，如果得你地幾個響度可能會有危險，今晚我留底響度，有無問題？”
下。。。！？竟然跟到過嚟！？咁猛！唔係掛！！？
我即刻對住軒轅皓擰頭，然後同佢講“無無無，梗係無問題啦！” 之後我地就一直坐左響個廳度睇電視，玩下電話，而悠悠就伏響我度瞓著左！
但係睇睇下嘅時候，我突然覺得有啲肚餓，我望一望軒轅皓，忽然諗起佢啱啱一直教我野，根本都無食過野！
話晒過門都係客，所以我決定去煮個麵大家一齊食！坐言起行！將悠悠放底響張櫈度之後，我就行入廚房度煲麵！
正當我煮好想夾起啲麵上嚟嘅時候，我突然又感覺到有人望住我！我馬上打開陰陽眼周圍望，望左陣之後，我終於都發現左個視線。。。係從個窗度傳過嚟！
“哎喲！” 我輕叫左一聲！，因為我嘅分心，隻手唔小心掂到個煲邊，辣親隻手指尾
軒轅皓同為食狗聽到我叫，即刻跑入嚟睇下我有無事，而為免佢地擔心，我即時舉起隻手指尾比佢地睇！
軒轅皓見到之後，無奈咁搖搖頭同我講“都係等我嚟啦！”然後就接過我手上對筷子同湯勺，裝好啲麵同湯之後拎出去
唔知係咪太香，悠悠竟然醒左望住我地，而我居然可以從佢嘅眼神中讀到“你地偷食唔叫我”呢句說話，所以我摸摸鼻頭開口問”悠悠，你食唔食丫”
果然，佢笑住向我點頭，我就去拎多個碗同筷子裝啲比佢
凌晨時份，我地三個人坐響度食麵，為食狗食雞肶，然後一邊食一邊睇深夜劇集，個情境怪異得嚟又好和諧
就響我地食得差唔多嘅時候，悠悠突然“哇”左一聲！然後好大反應咁彈左起身，而佢手上隻碗啲湯同啲麵就瞬間淋到自己成身都係！
呢一刻，我比佢嚇到我都彈埋起身！我即時檢查下佢有無比啲湯熝親，因為小朋友啲皮膚好幼嫩，好容易燙傷，望一望佢啲手手腳腳，見到無紅無腫，頓時鬆左一口氣！好在無事咋！但係張枱同地下都係湯同麵。。。
軒轅皓見我望住張枱同個地下，就話“你帶個細路去換衫沖涼，啲野等我搞！”
哇！男神！太好啦！呢一刻，佢響我心目中由冰山升級為男神！
我望住佢，送上一個大大嘅笑容，然後話”唔該呀皓！”，就帶住悠悠去廁所沖涼，點知幫佢除左啲衫之後，竟然發現佢身上有多處瘀傷，個心即刻涼一涼，虐兒！？
為免嚇親佢，我就扮咩都唔知咁，乜都睇唔到咁一邊幫佢沖涼，一邊求其咁搵啲野同佢講，見佢都會比啲反應我，我就乘機問佢，“悠悠，係咪有人打你丫？”
佢眼定定咁望住我，擰頭！
我諗一諗，然後換個問題再問”咁唔係有人打你，你點解會瘀晒嘅？”
佢望住我，歪一歪頭，然後“哇”左一聲
”哇！？我整痛左你！？”我即時鬆開幫佢抹身嘅果隻手
但係佢又再次對我擰頭！
聽唔明。。。我唯有組織一下，然後再次問”哇？整瘀你？”
今次佢終於都點頭，仲舉起隻手指住我嘅身後。。。