秦天晴 — 有鬼 新章《畫》正式展開: 洋娃娃 — 第三章
望住悠悠指住我後面嘅動作，再加埋佢講嘅“哇”，我可以百份之百咁肯定，我身後個窗一定係有啲野響度！
於是我深深咁吸左一口氣，然後慢慢咁轉過身兼擰轉頭，同時內心響度不斷咁求神拜佛，千祈唔好又係果啲血淋淋，超嘔心嘅野丫！
當我個身慢慢咁轉，個頭慢慢咁擰嘅時候，我終於都睇清楚果度到底有啲咩響度！係一隻BB仔咁樣嘅手。。。
呢隻怪手，就吊住左響個窗邊度，而另一隻手，就慢慢咁伸緊上嚟！
悠悠一見到就即刻哩埋響我後面，而佢呢個動作，亦令我諗番起呢隻唔知咩野竟然虐待悠悠！
望住悠悠身上嘅瘀傷，我嘅怒火馬上爆發！
我伸手入衫袋度拎張符紙出嚟，同時唸
“乾坤無極，風雷受命！雷降！”
最為純熟嘅招式瞬間爆發，直接擊中左佢拉住窗邊嘅果一隻手！
隨著擊中目標而響亮嘅“噗”一聲，果隻野亦都發出左尖銳刺耳嘅“丫！”一聲，之後就好似。。。可能。。。或者。。。應該跌鬼左落街。。。
而我就好淡定咁行過去，對住窗外講左句“好行夾唔送，Bye！”之後就關窗，上鎖，貼符紙，動作一氣呵成！
“搞掂！”我拍左拍隻手，望住個窗滿意咁點頭一笑，然後轉過身
丫。。。！？ 我扶額，同時心入面響起左一句“大獲啦！”
因為我啱啱果下嘅衝動，令我完全唔記得左悠悠響度，所以我做完晒一系列嘅動作之後，一轉身就望到悠悠兩隻眼掙到大一大，仲擘大個口得個窿咁望住我。。。
呢一刻，我開始覺得令到佢有童年陰影果個應該唔係冰山美男軒轅皓，而係我呢個淡定暴力秦天晴！
點算好呢。。。？為免嚇親佢，我細細聲咁叫左聲“悠悠”，佢個口即刻合番埋，仲對我眨兩眨隻眼！
見佢有反應，我就繼續同佢講
“悠悠，你啱啱咩都睇唔到，咩都聽唔到，忘記佢，OK？”
悠悠望左我一陣，然後回番我一個“OK”嘅手勢，我以為佢應該會轉頭就唔記得，點知。。。
一出去廁所，軒轅皓就走嚟問啱啱發生左啲咩事，因為佢聽到有怪聲，但係又唔好意思走過嚟敲門
正當我想答佢嘅時候，悠悠突然拉一拉軒轅皓隻手，指住前面“哇！”左一聲，再伸手指一指我，然後擰轉身響唔知邊度拎左張廁紙出嚟，對住佢啱啱指住果個方向飛過去。。。之後轉身，拍左兩下手，點點頭，對住我地滿意咁笑一笑！
見到佢發揮得淋漓盡致嘅表現，呢一刻，我除左覺得有啲好笑之外，仲有啲無言，小朋友果然係好誠實！而我，只可以用五個字嚟形容自己，《很傻，很天真》。。。
我對住軒轅皓苦笑，然後攤開兩隻手，對佢講左句“如你所見！”，之後就行番去沙發度繼續睇我嘅電視，而悠悠就學我咁，對住軒轅皓攤一攤手，然後行埋我度，坐響我身邊合埋眼瞓覺
最後淨番軒轅皓一個企響度，用一種莫名奇妙嘅眼光望住我地
第二朝一早，我又再次被嘈醒左，不過今次唔係比鬧鐘嘈醒，而係比電話個鈴聲嚇醒！
但係瞓到迷迷糊糊嘅我，根本就唔記得左部電話放左去邊，所以瞓響張沙發度，不斷咁左摸右摸，最後係軒轅皓睇唔過眼，響我頭頂嘅位置拎過嚟遞比我
我接過之後，望一望個來電顯示，果然係Cindy打嚟，我馬上接聽，然後開口問
“Cindy，Auntie而家點丫？有無事？”
而Cindy就回應我話 “去到醫院果陣已經醒番啦，但係醫生話最好都係留院觀察多幾日會好啲喎！係呢，悠悠佢點丫？有無比到麻煩你丫？真係唔該晒你幫我睇住佢丫！一陣我過嚟接番佢走丫，順便番屋企沖個涼換件衫！”
聽到佢咁講，我即刻睡意全消，急急咁回應佢
“唔洗啦，我一陣帶佢番嚟啦！你番去沖個涼休息下先！仲有悠悠好乖，放心！”
我當然要拒絕佢啦，如果唔係邊有機會上嚟睇下果個《哇》嘅廬山真面目！
收左線之後，我就收拾一下，之後就由專業司機軒轅皓載我地過去，但係我真心有啲過意唔去，尋晚已經搞到佢飯又無得食，食得個麵！又搞到佢無得瞓，幫我地守夜，而家仲要開車送我地過去，之後佢番屋企沖個涼又要繼續開工！
”男神！我以後會好好拜祭你！丫，唔係！係好好咁懷念你！又好似唔係好啱喎。。。是但啦！你永遠長存我心裡！”我內心默默咁諗
好快我地又再次到達Cindy屋企樓下，臨落車之前，軒轅皓望住我，好認真咁同我講“有啲咩事，唔好逞強！等我過嚟！”
見佢咁嚴肅，我開玩笑咁拍一拍佢膊頭，然後話“放心喎！又唔係得我一個！”為食狗呢個時候好配合咁“汪！”左一聲，惹得我同悠悠不停咁笑！
軒轅皓見秦天晴一啲都唔正經咁回應自己，只能無奈咁嘆一口氣，然後就開車離開，順便為今晚做準備
我帶住悠悠上到去Cindy屋企門口，然後舉起手敲一敲門，但係出嚟應門嘅並唔係Cindy，而係佢家姐Zoe
Zoe見到我就一邊招呼我入屋，一邊好熱情咁話“哎！天晴！真係唔該晒你尋晚幫我照顧呢個百厭妹呀！Cindy佢沖緊涼！嚟嚟，快啲入嚟坐！”
於是我就一手抱住為食狗，一手拖住悠悠行入去，而入到屋之後，我對眼就開始觀察有無啲咩唔妥，同時我把口就回應佢“唔洗客氣！好小事姐！仲有悠悠好乖丫！又精靈活潑，好得人鐘意！”
Zoe聽到我讚悠悠，就好開心咁笑住同我講“無麻煩到你我就放心啦！你坐響度等等我，我去拎啲野比你飲！”講完佢就轉身行開
呢個時候，悠悠突然伸出雙手，拉住我行去佢尋晚指住嘅果間房前面，然後指一指對門，示意我打開
我明白佢係想帶我去睇果隻《哇》，所以我握住個門柄，內心數左個1，2，3之後，就推開對門入去！
果然！開門嘅一剎那，果種唔自在嘅感覺再一次充溢住我嘅全身，並且有種被盯人住嘅感覺！
我全身立即進入戒備狀態！
我對眼不停咁周圍望，從房嘅左面掃到去右面，終於，我發現左我嘅目標，同時亦都明白左悠悠所講嘅“哇”到底係啲咩！
果隻《哇》，就係一隻仿真製做嘅洋娃娃。。。