秦天晴 — 有鬼 新章《畫》正式展開: 洋娃娃 — 第一章
“鈴鈴。。。” 咩聲嚟架。。。
“鈴鈴。。。” 好嘈丫。。。仲比唔比人瞓覺架。。。
“鈴鈴。。。” 好煩丫！我忍無可忍咁響張床度彈左起身，然後努力咁撐開兩隻眼周圍望，望左陣之後，終於都發現左嘈醒我嘅罪魁禍首 — 鬧鐘
於是瞓到迷迷糊糊嘅我，就攬住個枕頭，慢慢咁行埋去張書枱度，然後舉手一拍，“啪！”！世界瞬間安靜了，我滿意咁爬番上床繼續瞓，同時抱怨咁講左句“晨咁早起身做咩，又唔洗番工。。。”
咦！咪住先，唔洗番工？唔係喎！我今日係要番工架喎！我即刻彈番起身，九秒九咁衝去刷牙洗臉，換衫化妝，然後跑出門口！
正當我好急趕咁衝到番公司樓下嘅時候，我突然醒起左一樣好重要嘅野！無錯！我今日係要番工，但係我唔係番嚟做野，而係番嚟辭職！
咁我啱啱咁趕係為左啲乜呢。。。
我頓時滿頭黑線咁企左響度，然後吸氣，呼氣，直到條氣順番晒，先至慢慢咁行入去大廈嘅大堂度等電梯
自從貓妖事件之後，我就應承左軒轅皓加入靈界警察，原因係我發現自己原來對靈異嘅野好有興趣！可能呢個就係血脈所影響嘅天性！當然，驚係會有，對未知嘅野都係會有所恐懼，但係我知道，呢種挑戰絕對會令我有一番新嘅體驗！
電梯上到四樓，我再次踏足呢個改變左我一生嘅地方，一推門入去，班同事仍然仲係果班同事，都仲係舉頭睇緊韓劇，低頭玩緊手機，不過見到我嘅出現，都有啲驚奇咁同我打左聲招呼，之後就繼續睇，繼續玩，一切都好似無乜野改變咁，但係無人知道，當初佢地好驚嘅果隻女鬼，已經永遠咁離開左呢個office
去到人事部，我即刻表明來意兼遞上辭職信，然後就番埋個位度執走自己啲私人物品，之後就落去Canteen等Cindy，因為我答應左陪佢食公司嘅《最後的午餐》
去到Canteen，坐番響我地平時坐開嘅位置，我忽然之間諗番起軒轅皓拎住部電話打暈左Cindy果單野！雖然果時令我好震驚，但係而家諗番起就覺得好搞笑！
因為我早兩日先至知，原來佢唔係識《隔山打牛》！而係要利用電話入面嘅符咒將隻鬼趕番出嚟，先至會拎起個電話一下拍落Cindy度，咁樣就唔洗拎張符紙出嚟，低調啲喎！
不過佢講完之後，我個心就響度諗，其實你拎住個電話定係拎住張符紙，你果時個行為都會比我認為你係。。。痴線佬！不過呢句我當然唔會話比佢知，嘿。。。
坐左陣之後，Cindy就落到嚟，而佢一開口竟然係話“天晴！你點可以唔聲唔聲就拐走左男神架！”
下？我拐左男神？軒轅皓？明明係佢拐左我喎！ （做靈界警察）
佢見我呆左無反應，就馬上作出指控咁話 “拐走左都算啦！起碼響公司都仲可以見到，養養眼都好丫嘛！你竟然仲同佢私奔！”
“噗！”呢句說話嚇到我將飲緊果啖水，從個咀到噴晒出嚟，搞到成張枱都濕晒
“咦。。。天晴！你好嘔心丫！”佢嫌棄咁話，同時拎出袋裡面果包消毒濕紙巾出嚟抹枱
“咳，咳咳，Sorry。。。”我一邊咳，一邊同佢道歉，不過同時心諗，明明係你講啲咁勁爆嘅野搞到我濁親，我幾時有同佢私奔丫！點解連我自己都唔知！？
“點呀你，有無事呀。。。？話說，你點樣攻陷男神個心架，講嚟聽下”佢嘅八卦模式ON
我一邊抹枱，一邊好無奈咁回佢 “我同佢無野架，我無同佢私奔丫！我地係普通朋友嚟咋” 。。。而家仲加埋上司同下屬嘅關係
“哦。。。咁點解男神要辭職丫，唔知男神辭職去左做啲咩呢。。。”佢托住個下巴，悶悶咁話
聽佢咁講，我好順口咁答 “警察！”
點知佢聽到之後，雙眼即刻發晒光咁話“警察，男神即係男神，做啲野都型過人！太有型啦！係喎！咁你呢，你搵左工未？做啲咩？”
我諗左諗，然後答佢 “搵左啦，做。。。警察 ！？” 心入面默默咁補充，係靈界警察。。。可惜佢無辦法聽到，所以。。。
“秦天晴！你仲話唔係私奔！？而家證據確鑿啦！快啲講嚟聽下！”佢即刻拉住我隻手既興奮又激動咁話
我望住佢超級無言！不過由於佢捉實我，仲眼甘甘咁望住我，令我留意到佢個面色好似唔係咁好，於是我就開口問“Cindy，你面色唔係幾好，係咪有咩事？”
佢見我扯開話題，講左句“今次就先放過你！”，然後就話
“係丫，前果排我個賤人姐夫比我家姐捉到佢包二奶，於是我家姐一氣之下就番左嚟屋企同我地住，但係佢個女”悠悠”就掉底左比個老豆湊，點知過左一排之後，個賤人竟然話個二奶同個女唔夾，於是將個女踢番嚟比我家姐，咁我家姐份工係番夜更架嘛，無辦法睇住悠悠，所以夜晚就由我地照顧佢啦！”
佢飲左啖水，之後繼續話
”但係唔知係咪因為比人當人球咁踢嚟踢去，搞到心靈受創，所以番到嚟屋企之後，就唔肯同人講野，淨係識點頭同擰頭，同埋本來佢好乖架，而家就變得好曳，晚晚凌晨都響度搞破壞，搞到我地無覺好瞓，所以咪咁殘囉！唉。。。其實悠悠都好慘架，得果五歲，所以無論佢點曳都好，我地都唔忍心去話佢囉！”
聽完佢咁講之後，我都唔知點安慰佢，關於人地嘅家事，我無辦法去講啲咩，就唯有同佢講
”哦！小朋友嘛，多啲關心下佢，等佢解開左個心結，可能會好啲呢！丫，我呢度有個平安符公仔，係前兩日響街度買架，送比你呀！”
佢收到之後即刻勁開心咁話“多謝！算你有心！嘿！咁我就唔怪你拐走男神啦！”講完，佢仲豪氣咁拍左兩下個心口，超搞笑
其實所謂嘅平安符公仔，係我前兩日整出嚟嘅製成品，個過程非常簡單，只需要將鎖匙扣上面隻毛公仔拆開，然後塞張符紙入去，之後再將佢縫番埋就搞掂！而張符紙上面我有封存左微量嘅靈力，所以普通嘅鬼都唔會敢埋身，算係一個真正嘅平安符
見佢面色唔係咁好，希望可以幫到佢啦。。。
如是者，過左幾日之後，我身處響軒轅皓屋企，正式咁開始學習靈警嘅知識，一開始果陣，佢講嘅野令我聽得好投入，不過連續聽左五個鐘之後。。。佢嘅聲音就好似魔音咁震到我頭昏腦脹！
我望一望個鐘，已經夜晚十一點，而佢仲講得出奇地投入，我心諗“ 佢唔會係諗住講到天光掛。。。” 嗚嗚。。。有無人可以救下我丫！
或者老天聽到我嘅呼喚！我部電話突然之間響起，瞬間打救左我
我拎起部電話一睇，原來係Cindy，於是我就對軒轅皓講左句“等等”，用手指一指個電話，然後就接起嚟話 ”Cindy, 咁夜嘅？掛住我丫？”
點知佢把聲有啲抖震咁話“天晴！我媽啱啱比悠悠撞到，然後仆親撞暈左！我叫極佢都唔醒！我而家要call白車送佢去醫院，但係悠悠太細唔方便一齊去，你可唔可以過嚟幫我睇住悠悠，或者帶悠悠去你屋企住一晚，我聽日過嚟接佢丫？”
下！咁大件事！？ 我即刻答佢“OK，你send個地址比我，我即刻飛的過嚟！”
我一收線，軒轅皓就行埋嚟問“有事？”
我就將啱啱Cindy同我講嘅野講比佢知，佢聽完之後，就立刻開車送我過去！
去到Cindy屋企樓下，佢就同我講”你睇下今晚留響度定係將個細路帶走，我響度等你，如果留響度嘅你打電話講我知，我先走 ，OK？”
我對句講左句“收到！”，再加埋個OK手勢之後，就落車衝上去
上到去，Cindy已經企左響門口度等緊我，原來架白車已經離開左一段時間，於是好心急嘅佢，一見到我之後，就即刻轉身同屋入面嘅悠悠講
”呀姨要趕去醫院睇婆婆，今晚就由晴姐姐陪你，你要乖乖地聽佢話丫，知唔知道？”然後就嘭嘭聲咁走左，淨低我同悠悠兩個企響度互望。。。
為左打破呢個尷尬嘅氣氛，我對佢友好咁笑一笑，然後打左個招呼 “Hello，悠悠”，就行入去，但係一入到屋，我就感覺到有啲唔自在，總係覺得有人望住我咁，我四圍望左望之後，就決定帶悠悠走！
無辦法，自從經過前兩次嘅經歷之後，我發現自己對啲靈異嘅野會有種特別嘅感應！連我自己都解釋唔到點解會咁。。。
於是我踎低望住悠悠，同佢講”今晚去晴姐姐屋企，晴姐姐聽朝再帶你番嚟，好唔好？”
果然！我一講完，屋入面某個地方就傳嚟左一下好響亮嘅“砰！”一聲！嚇到我同悠悠打左個突，我即刻企起身周圍望，而悠悠就抱住我隻腳，伸直隻手指住前面果間房
我即刻打開陰陽眼去望佢指住嘅地方，但係眼前咩都無。。。諗一諗，都係唔好理咁多！我即刻抱起佢，然後轉身關門走，而響我關門嘅呢一刻，果間房對門亦都同時打開。。。