【獵奇甜】《吸血鬼係香港搵食真係好撚艱難》Remaster: 第5回 - 龘點讀？咪龍龍龍(3)
-免責聲明：故事內容涉及以人類加入妖怪食物鏈情節，純粹以現時生物學生態類比，只屬幻想與虛構，如有雷同實屬巧合 -
「喂華dee，呢排點呀？」劉龍歡喜若狂。
「有咩點呀，咪又係咁，返下學，放下學咁囉。」我話。大學生活十分沉悶。上堂學既野，雖然唔識，不過當我諗到人生仲有幾百年，就唔會急於學埋d對搵錢無乜用既知識。加上，我同班十幾歲二十歲班友唔多岩玩，佢地細個玩3DS，我細個玩GBA。尤其是上堂果時有個女同學好傻的嗎，諗起都覺得煩。
「大學係咁架啦。」劉龍話。佢講到好似佢有讀過大學咁，但其實佢無！
「黎啦，開餐啦。 」我帶劉龍入黎屋入面。
我由房入面拖出一具*DB。「黎啦，益你呀。」
「嘩！！ 」劉龍伸利。
「我自己一個人食哂呀？」 劉龍問。
「無人食死屍架呢間屋，你隨便啦。」我話。
龍基本上係肉食動物，佢地強而有力既既龍爪就係肉性動物既最好証明。傳說入面，中國既怪獸都係以人類作為食糧，龍都當然不例外，人肉對佢地黎講係上等既美食。如果可以，佢地仲會將DB整成DB肉乾，又或者好似雞脾去骨變雞扒咁，整個DB扒黎慢慢食，仲要一定要指定三成熟，太熟既DB肉就好似食緊Honda架脆皮車仔Jazz咁。不過香港地寸金尺土，有無地方比佢咁做呢？答案係有的。因為我呢個中學同學劉龍，正正就係屋企好大果D有錢仔黎。
「嘩...」劉龍已經流哂口水，右手從手掌變成充滿鱗片既龍爪，準備DB將沒有血色的部分撕下。
呢具DB點黎？唔方便多講了。我能講既係，通常一個人類有幾公升血，都好難話會一下吸乾哂。諗都諗到啦，幾公升水都飲唔到啦，何況血？不過，Victor條友又好向左走向右走大方架喎，每次開餐，佢都鐘意叫埋班朋友黎開Party，五六條友狂啜血，所以就好快飲哂既，好少擺幾日，仲清得快過你雪櫃入面放左成個星期果個大西瓜。
而我當然唔會好似班老餅咁囉一次飲鬼哂，我呢種新世紀吸血魔，當然係會充滿生活態度地逐少逐少咁飲，飲少少其它放哂落雪櫃。有時會加少少落紅茶度調味。
不過，血呢家野擺唔得耐，因為我地無抗凝血劑呢d高檔野（講到尾其實係因為貴），最多擺幾日就會凝固。不過都無所謂啦，一個月大約飲一次就夠架啦，血既野唔洗多 。但係，DB如果無人食就會臭，所以要請d朋友仔上黎幫下手。
古有東京食屍鬼，今有劉龍食屍鬼。食食到好似食雞翼咁，真係得佢先做到。。
「好味喎你食唔食少少？」佢問我。
「咪喇，話哂我以前都係人類，望住你食又唔係幾舒服。」我雖然咁講，不過早已經見怪不怪囉。
龍呢種生物理論上係肉食性，無肉不歡。所以，以人類形態生活既龍人其實就好易認，尤其反素食最西利果班友仔，好多都係龍人黎。無計啦，始終香港地膽呀嘛。就算佢地幾鐘意食肉、幾咁無理，都無乜人會反佢地，因為佢地人多勢眾。要數香港有幾多龍人？呀..我諗都有二百個起碼，大族群黎架，唔得罪得。
如果你地話二百人只係好少，我就可以同你計下數。當一隻龍人1年先食一個人啦好未？龍人多數有200年命，即係1隻龍人食到200個人。200隻龍人，就食到40000個人類！當然我仲係保守估計架咋。所以要養龍人一d都唔易！不過今時今日既龍人，都已經慢慢唔洗食人架啦，因為香港要食人始終唔方便。所以佢地通常會轉向守係一d邊境地方，食一唔太覺眼又唔太出名既人。咁係邊d呢？自己估啦...
當然，以人類為食既生物有非常之多。俗語話，左青龍，右白虎。南朱雀，北玄武，都的確有返多少根據。香港呢個地方，就有龍同有鳳了。鳳族係專以龍為食糧既生物。你無聽錯，係食龍！ 所以龍都有天敵的。反而玄武（即係蛇龜）唔食人的。白虎呢，香港就無既。不過要數遠房親戚呢，就要數貓啦！貓同虎都係貓科動物，而且貓唔係你地人類所想咁單純 。
係咪想聽？係我就講下啦唉。講埋呢度，我就想講下劇情喇。
係好耐好耐之前....有隻貓喎，而貓就不嬲天性係夜行生物，同埋人類平時唔知既事實係，佢地與生俱來通靈既能力，隨時能接通第四、第五、甚至更高維度既訊息。
同時，貓亦都係同我地吸血鬼一族好fd既一族黎，我地既氣場相當接近。點解貓咁強大？非常簡單，因為佢地本來就係外星種族。用人類既說話黎講，係喵喵星。不過喵喵星人比地球人既進化階段高幾萬倍。
「食啦食啦，但你要食哂佢呀，唔準打包喎。」我話。因為打包羅走一具DB係好養眼既事黎。何況呢件DB仲要唔太完整，真係會嚇撚死人的。
「哎？咁我打電話同阿媽講唔返去食啦。」劉龍話。「早知叫埋呀妹黎啦。 」
「電話係果邊呀，自己打啦。」我指住一邊既英國轉輪式電話話。
龍人比起吸血鬼呢d中古生物，歷史耐得多。所以佢地唔洗好似我地呢d少數族群咁要匿埋。
劉龍羅出佢部iphone15 pro：「洗乜呀，我有手機。」
都話我同人類脫節架啦 。我好怕用有相機既手機，因為成日開左前鏡頭都會影唔到自己。
*DB=Deadbody