【獵奇甜】《吸血鬼係香港搵食真係好撚艱難》Remaster: 第6回 - 有隕石呀屌

-免責聲明：故事內容涉及以人類加入妖怪食物鏈情節，純粹以現時生物學生態類比，只屬幻想與虛構，如有雷同實屬巧合 - 「不如周圍行下囉？」劉龍食飽飽，個樣睇黎十分滿足。 「咪啦，無乜心情。」我話。「溝唔到女唔開心。」 「你上次講果個人類呀？怕咩呀你吸血鬼咁撚型，吸血新世紀主角都係咁溝女架啦。聽講個女仔識打柔道架喎，唔知夠唔夠吸血鬼打？」劉龍一輪嘴咁講。 「打鬼打馬咩，比我吸乾左啦。」我話。「就係咁先唔開心。」 每次一溝唔到女，我就忍唔住一手劃過佢既頸際，趁住鮮血直噴時吸一兩口熱血。 「... 算啦，女死女還在呀嘛。」劉龍搭住我膊頭。「行下啦。」 「好啦..不過你等我準備下先...」我說。 佢所謂既行下，其實就係一野捉我上天。我達一句「屌」都講唔切，真係嚇向左走向右走到我屎忽都濕埋。係呀，龍人都係識飛的。於是我都即刻變返隻蝙蝠，踩係劉龍個頭上面。因為以我既飛行能力絕對唔會比龍強。「你想去邊呀屌你？ 」 「無架，周圍睇下野囉。喂我頭先黎果陣見到d奇怪野。你望下呢度，有鬼咁大個洞喎。」劉龍指住下面話。呢個時候既佢已經飛到上平流層。 「嘩搞錯呀咁撚大粒隕石撞落黎？天文台都唔理既？唔得喎，我地去睇下啦。」我話。 「喂，人間界既事人類自己搞啦。」劉龍話。佢雖然串，不過都講得無錯。一陣落到去，比人類捉埋我地就麻煩啦。雖然都試過幾獲架啦，不過你知啦，對住人類一定要留手的，如果唔係好易玩出火。 「望下唔洗錢姐。 」我冷冷地道。我仍然為左溝唔到條女然後殺左佢而唔開心，都唔知點同佢老豆老母交代。 於是我地飛左落去望下。
「搞錯呀，咁大粒隕石跌落黎無人知會聲既？打歪少少就打到我屋企架啦嘛！屌！」變返人類形態既我，企係個大咕隆隔離望住個天。「咁日光日白，跌左落黎無人知都唔出奇呀。」劉龍話，想伸手去搞粒隕石。我一野捉住佢，阻止佢摸石：「咪呀，熱架戇鳩。」「咁有野就要摸下望下架啦。」佢話。真係唔明，咁單純既龍人點解咁耐都未比人類害死哂。「你等我用超能力望下入面有乜啦。」我話。「勁喎，你新練成架？」劉龍一聽我話有超能力就十分興奮。「等我用念力屌撚死你個戇鳩仔..」我緊閉雙目。其實都唔係咩超能力，只係本身吸血鬼聽力係好少少。我留心一聽就知道隕石有發出古怪聲。舊隕石熱死辣辣，有d燃燒既聲音，呢樣雖然唔洗超能力都知，不過我仲聽到有少少聲係入面傳出黎。「有野係入面架屌...」我話。「外星人？」劉龍拍哂手。「好呀好呀，我未見過外星人喎。」『你見過啦..我唔講姐..』我心諗。外星人既情報，我知道好多，但唔講得的，因為好恐怖，講左出黎我就會比人刺殺，吸血鬼都不例外。我只能講，天外有天，人外有人。香港係有好多外星人的，真心。我見劉龍咁興奮，都唔好掃佢興啦。我向住隕石大叫：「出黎呀！」「嘰嘰--!!」粒隕石入面有聲。估唔到真係會一叫就出黎。正一戇鳩外星人。隕石入面爬出左條撚樣出黎。條友一字眉，d頭髮向上飛起哂成個超級殺亞人咁，仲要矇豬眼，個鼻大到成龍咁款，仲有執羊咩鬚。係呢一刻，唔知點解我真係好想一野衝埋去打撚柒佢，因為個樣太樣柒。正當我懷疑條撚樣係咪咩飛機墜落d生者還果時，我發現條友原來得個頭的！。 「嘩屌！咁撚核突既！ 」見慣DB的我都表示，見到個活人頭係度郁下郁下真係好撚恐怖。「喂，佢有手架！」劉龍指住個大坑。個人頭係度爬黎爬去，原來佢個頭係連住好多觸手 ，要描述的話，即係好似十支竹簽插住一粒魚蛋咁款。「屌乜撚野星人黎架...」我話。「唉屌走呀！頂唔緊呀！」「下？唔理佢啦？」劉龍話。「咪撚理佢啦毛管都棟埋呀見到隻野！」我打哂冷震，準備走人。「但係，捉到外星人咁我地就發達啦！可能可以研究到地球上仲有咩未知生物呢？」劉龍越講越起勁，不愧係潛入人類社會多年既戇鳩仔。「妖！呢個世界邊有d咩奇怪生物架！」我話。「走啦走啦咪睇喇，睇到我lin旗都扯埋。」就係咁樣，我地就走左了，頗無聊。