我做電話投注，每晚都會接到同一個女人來電: 第十五章
「吓？乜我地唔係黎搵黃子軒師傅咩？點解變左佢師⋯兄？」我一時之間也難以確定這個什麼郭子雄還是黃子軒的輩份比較高。
「哦？你地係阿軒叫黎既？」郭子雄揚眉問，但我注意到，他在聽到「黃子軒」三字後眉頭皺了一下。
「你呀⋯我地而家成個宿舍都被電話入面一個叫『可欣』既女⋯鬼控制住，仲追殺我地，」Michelle搶著答。「係軒仔叫我地黎搵佢師傅救命架。」
「正確啲講，係叫我車佢兩個過黎，順手拖埋我落水。」高啟介補充道。
「原來係咁，可欣大人即係咁解⋯」郭子雄好像晃然大悟一樣，但接著又臉色一沉，問：「咁阿軒而家人呢？」
「佢係宿舍⋯」我看出了他的心情不太好，唯唯諾諾地答：「諗住自己解曬宿舍啲人既咒。」
「哼！又係度自作聰明，」郭子雄終於罵出聲來：「佢成日都唔聽人講係咁撩事鬥非，以前就話恃住有純陽體可以無限用茅山術，而家無曬法力仲係度亂黎。」
「係呢，」高涼介大概為免他一直罵下去吧，便問：「你頭先話咩『搞掂最後一個』，係咩意思？兆華師傅呢？」
「師傅去左仙遊嘛，阿軒佢好日都唔番黎梗係唔知啦⋯」郭子雄不滿道。
「咩話！？佢師傅死左？」我嚇得不禁插嘴道。
「仙遊係指真正意義上既仙遊，係我地道家其中一種修練方法，不過講你都唔明架啦。」郭子雄解釋著，不過我卻聽得很不是味兒。
就好像，他相當的看輕我。
「咁頭先發生咩事？點解道門無鎖？個紙扎公仔又係咩一回事？」高涼介追問。
「哦涼介哥你有所不知啦，」相對於我，郭子雄對高涼介說話明顯尊敬多了，他一邊去開燈一邊道：「師傅暫時放低左神壇俾我打理；岩岩我地呢邊電話響，我都未聽，未身擺係度啲紙扎公仔就唔知點解自己識四圍走；我擔心係咪有咩邪靈，咪先追出去毀左佢地先算；不過而家我知係邊個引佢地黎啦。」說著便向我望來。
他看來大有埋怨我之意，不過，我也漸漸看不起他這個所謂大師兄，相比起黃子軒，他的器量差多了。我只好耍著手道：「我都唔知會咁大獲架⋯」
不過，他沒有再理我，燈開了之後，他便直直的看著Michelle，簡直是看得雙眼放光。我不禁嘀咕：他不是那些玩法術的人嗎？那些家伙不是要避女色嗎？
哪知道，他接著露出不可置信的神情，失神叫道：「絕⋯絕陰體！呢種氣質，一定無錯！我竟然係有生之年遇到絕陰體！」
啊，黃子軒不是說過同樣的話嗎？那時我還聽錯了以為是什麼絕緣體，給Michelle取笑了好一會。
「究竟咩係絕陰體？」Michelle對他的誇張語氣有點不悅地反問。不知怎的，我對此倒有點心涼。
「陰年陰時陰月陰日出生，不帶精氣，天地所孕，是為絕陰也！真係估唔到，有天生既絕陰體！」郭子雄興奮地答著，說是答，倒不如說是自我確定。
我是理科出身，文言文不算很了得，但以我理解，他好像在講關於耶蘇或者孫悟空的降生過程多一點。
「陰年陰時陰月陰日出生」，就是他們常說的什麼時辰八字吧；而不帶精氣、天地所孕，說穿了不就是說她的出生不用男人經手嗎？那Michelle的母親就如同聖母一樣處女生子？還是她其實是石頭爆出來？
「車，你咁講既話，咁所有複制生物都係絕陰啦，之前咁多複制羊呀老鼠呀，咪整左一堆絕陰羊絕陰鼠出黎？遲啲複制人成功仲可以量產Michelle添呀！」我毫不留情地諷刺道，終於回到我所長的領域，我少說也是個主修生物科技的大學生，自然能看清他的理論中不合理之處。
郭子雄被我說得臉上一陣紅一陣白，大概他從來沒有受到過科學理論的挑戰吧。「你⋯你⋯」他只能指著我，卻又一句也說不上來。
「咁我呢個絕陰體又有咩特別？」Michelle沒有對我的話有什麼反應，繼續問道。
「絕陰者，為靈魂之絕佳載體，所以有絕陰體既人都係天生既靈媒。」郭子雄彷彿找到救星一樣，趕緊回答以令話題回到他所熟悉的東西。
「即係話⋯我好易撞鬼？」Michelle接著問，但我好像聽到她的聲線在顫抖著。
「都可以咁講既⋯」郭子雄繼續自顧說著：「不過絕陰有另一個作用，就係如果同純陽體合作，就可以打通天⋯」
「夠啦！」Michelle突然大叫打斷了他的話，嚇得我們三人都呆呆地看著她。
接著，她開始罵起來：「就係因為呢個無聊既原因，我就由細到大都過得咁慘？點解要咁對我！」
「如果你唔想，都有得封左佢既⋯」郭子雄小聲地說著。
這時，我和高涼介都不禁瞪大眼晴看著他；這麼重要的事，他留到現在才說？一早說了，Michelle也不至憤怒成這樣。
Michelle也停了下來看著他，卻另是一副怒容；郭子雄只好繼續說下去：「方法唔係無⋯但係係呢度做唔到，因為呢度太多陣法，會影響我發揮。」
「好，咁樣你而家就帶我去封左佢，」Michelle極度爽快，拉起郭子雄的手就要往外走出去。
我看得很不是味兒，因為那雙手不久前還在繞著我的手臂。
郭子雄的神情很是尷尬，但他好像對Michelle的那個什麼絕陰體很是忌憚，也不敢說不。
我和高涼介面面相覷，也只好跟上去。
就在臨步出神壇時，郭子雄停下來，拍了一下自己的頭，對我說：「係喎，我差啲唔記得左，師傅係臨出遊果時留低左封信俾阿軒，就係果個木牌下面，你不如幫我拎埋走丫。」他說完還看了看被Michelle拉著的手以示無奈。
哼，女孩子都跟你跑了還來給我炫耀；我氣著跑去他指著的那塊木牌並稍為移開了它，果然有封信在下面。我拿了信回頭卻看見他們已經出門口了，我只好跑過去追上他們。