「續寫」無啦啦多左幾個家姐同阿妺: 真帥氣
酒紅色既短髮，個一粒美人墨，加埋果一對電眼，係喎！佢係愛麗絲！點解我一直都留意唔到佢！
睇相已經覺得佢靚架啦，無諗到真人仲靚！同佢對望一眼好似都會勾走個魂咁！
單純用外貌黎比較的話，呢個愛麗絲的確比Sarah佢地靚，但總係有一種令人想提防佢既感覺。
啊，綜合其他方面的話都係Sarah佢地好D，戴返個頭盔先。
我：「你好，初次見面。」
愛麗絲：「嗯，但係點解你唔肯同我訂婚呀？我想知道理由。」
我：「因為我已經有五位女朋友，每個我都好愛。」
愛麗絲：「咁唔係問題吖，同我訂左婚之後你都可以繼續同佢玩拍拖遊戲，而且又可以強化我地之間既合作關係。」
嘩，語出驚人喎你…
我：「唔好意思，我真係做唔到，訂婚結婚係我心目中唔係咁廉價既野。」
愛麗絲：「哈哈，都係第一次有人咁同我講野，你唔怕我會對付你架咩？」
我：「搵人麻煩可以千百萬個理由，你鐘意點就點，我尊重個人意志。」
愛麗絲：「你真係同佢地好唔同呢~你唔同我訂婚，無後盾你唔驚七星入面站唔住腳？」
我：「無後台的話，我會靠自己實力。」
愛麗絲：「你覺得七星係一個可以只講實力既地方？你要知道你失敗的話會連累到李uncle。」
佢態度開始惡化，我甚至feel到有少少敵意。
我：「如果出左咩事的話，我會一力承擔，到時李uncle可以換過另一個人去代表佢。」
愛麗絲：「哦？你以為…」
李生：「夠啦愛麗絲，講夠喇。阿明你返去先喇，訂婚呢件事我遲D再同你傾。」
原先我打算再補多句，話我已經決定左唔會訂婚，但當我想講既時候二家姐係我背後撞左我一下。
我知道佢意思係叫我唔好再講落去，所以我就乖乖收聲，同大家姐佢地返去。
之但係，我硬係覺得呢件事係有問題。點解李生咁執著要我訂婚？
返屋企既路上，無人出聲，羽晨直頭訓左係Yui大脾上面，大家姐則挨住二家姐訓左。
無人評論我頭先既所作所為，就連Sarah都無出聲，只係一味望住窗外，我連佢個樣都睇唔到。
唉，點解仲係咁，明明已經做左咁多野，做乜佢地仲係無乜反應。
頭先同Anna佢地道別個陣，佢地都係無乜反應，只係「哦」左一聲。
到底呢個愛麗絲有咩咁恐怖呀，我睇落佢同當初既Ellen差唔多啫。
啊，原來唔經唔覺已經返到屋企嗱？好似咁快咁既。
二家姐：「蘭姨，你幫我抱羽晨上房先，佢訓著左，小心d。」
蘭姨：「知道二小姐。」
大家姐：「啊~~我好攰呀~我上房訓先啦~各位早抖~~」
二家姐：「你同我坐低，我有野要同你地講。」
二家姐一手捉住左想走既大家姐，仲拉左佢去梳化坐低。
我，Sarah同埋Yui睇到呆左，完全唔知發生咩事。
二家姐：「你地都坐低先啦，唔好企係度。」
我地三個傻下傻下咁聽二家姐既說話去做，排排坐咁坐低係梳化，好似上堂咁望住二家姐。
二家姐：「頭先你地做乜拉住我？」
拉住你？唔關我事呀我坐低左咩都唔知道。
大家姐：「咁我怕你一時衝動唔知會做D乜，所以我咪拉住你先囉。」
二家姐：「就係因為你地拉住我，所以而家件事先變得更加嚴重同麻煩呀！」
「阿明你講野之前有無諗過後果架？」
我：「吓咁樣會有後果呀？唔通佢會買起我咩？講兩句啫。」
咦…做咩靜哂無人講野既？我講緊笑話喎！無人笑既！
唔通…
二家姐：「你呀…到底Ellie係點同你形容愛麗絲架？」
我之後完完全咁複述左一次Ellie同我講既所有有關愛麗絲既野比二家姐，大家聽完都只係嘆左一口氣。
二家姐：「Ellie真係只係同你講左咁多？無其他？」
我：「係吖真係得咁多咋。」
二家姐：「唉，Ellie今次真係好心做壞事，我估佢諗都無諗過愛麗絲今日都會係度。」
大家姐：「如果佢知道的話佢應該唔會咁同阿明講架啦，不過我地都無諗過阿明會主動去搵李Uncle啦。」
二家姐：「唉，今次真係…你地記得唔好同Daddy講呀，免得佢擔心，知唔知？」
Sarah：「知道喇。」
我：「eh…我想問下…」
二家姐：「做乜呀又？」
我：「我想問下呢個愛麗絲到底係咩人，點解你地好似咁驚佢咁。」
二家姐：「我試下用一句話你知佢到底係咩身份啦，佢係李uncle最大既合作夥伴，明未？」
我：「都係唔明，點解你地會驚李uncle最大既合作夥伴，關我地咩事？」
二家姐：「唉…咁即係話李uncle都要比面佢呀！你仲當住咁多人面前串人！」
「佢試過因為人地酒店一個waiter頂撞佢就收購唒成個集團添呀！」
「十九歲做到大集團主席，仲令公司生意愈來愈好你估佢流架？」
Shit，好似得罪左一個同李生同lv既人添。
不過我同佢講左幾句啫，佢應該唔會好似阿天咁小器..掛？
我唔想係呢個時候再多樣野要煩啊，我太多野要煩啦實在…
Sarah：「不過…」
Sarah係一片沉默中突然出聲，令到在場既所有人都望住佢。
Sarah：「阿明頭先真係好有型…我無諗過佢會咁同李Uncle講野…」
嘩突然讚我都有既，而家仲講緊正經野架。
大家姐：「係吖係吖！尤其係放低部ipad果下！我當時真係好想嗌出黎架！Yui你呢？你覺得頭先阿明型唔型呀？」
二家姐：「家姐！我仲未…」
我已經無理二家姐講咩，我只係掛住望住Yui，睇下佢有咩反應。
雖然Yui咩都無講，不過佢好用力咁點左兩下頭，仲面露笑容。
見到呢個笑容我咩不安都無哂，原先既我返黎啦！
二家姐：「唉我唔理你地喇！得我一個咁認真都唔知為乜！」
二家姐嬲爆爆咁講完之後就嬲爆爆咁走左去，大家姐都即刻跟左上去，留低我地三個係度。
我：「係咪…講完喇？」
Sarah：「我估…係掛…」
我：「真係嚇死我啦，快d去沖個涼訓返個靚覺先都係。」
Sarah：「阿明你等陣先…」
我：「嗯？做乜呀？」
Sarah叫我等陣先令我下意識咁望向佢度，結果…
結果佢同Yui左右夾攻，錫向我兩邊臉，完全係出奇不意既突襲。
Sarah：「多謝你呀阿明。」
Yui：「多謝你為我地開心返做左咁多野…」
原來佢地係知道既。
但係…唔知其餘三個又知唔知道我既苦心呢…