「續寫」無啦啦多左幾個家姐同阿妺: 放心吧

李生：「你自己好好諗下啦。」

李生講完就轉身走，留低我同部ipad係呢個露台。

雖然咁樣叫我揀未婚妻係好正，直頭好似係餐廳用ipad叫野食咁方便，不過我唔可以咁做啊。

咁樣的話會好對唔住Sarah佢地，而且亦過唔到我自己果關。

李生另一個提議我都諗左一下，不過好快都ban埋。

因為咁樣做的話咪會有階級分別囉，一個係老婆，其他既就只係女朋友，始終有分別。

最壞既情況係其餘四個都會離開我。

唔係話我貪心想霸住五個女仔，只係我發現自己好需要佢地，真係一個都不能少。

就連一開頭唔太鐘意，但總係痴住我，又任性既Ellen我都覺得自己已經唔可以無左佢。

唉，唔得唔得，所有方法都行唔通。

算喇算喇，而家都係返去搵佢地，免得佢地擔心。

我帶住部ipad，行返入去，準備返去會場，點知我一行返入去就嚇左一跳。

Sarah成個人企左係門後面，眼神好憂怨咁望住我，望到我個心好痛。

我：「放心啦，我唔會。」

六個字，只係六個字，Sarah聽完就衝左上黎攬住我，我亦即時抱住佢原地轉左兩個圈，諗住好似童話故事咁。

但係，我亦因此付出左代價，我個頭好暈。

果然童話故事都係假既，根本無可能抱住人轉咁多個圏？

Sarah：「你真係唔會？」

我：「係吖我唔會，邊有可能應承佢。」

Sarah：「咁就好啦！錫哂你！」

講完佢又真係大大啖咁錫左落黎，當然我無抗拒，好好咁享受呢一下。

我估Sarah頭先聽到訂婚既事一定係好擔心好驚，因為…

因為佢，而家喊緊。

我：「傻豬黎既，喊咩呢？喊到唔靚啦而家。」

我伸出手，抹去Sarah臉上既眼淚，但係佢反而捉住左我隻手。

Sarah：「但係你唔咁做的話你咪無後盾囉，呀！仲可以同我地其中一個結婚！」

「同我或者Yui結就無用…即係話只可以揀Anna，Ellen或者Ellie…你會想娶邊個？」

我：「點解你會覺得我同你或者Yui結婚係無用既？

」

Sarah：「因為本身你已經係Daddy既仔，你發生咩事Daddy都會撐你，所以同我或者Yui結婚唔會強化到你既後盾。」

我：「但係如果我真係好鐘意你，非你不娶呢？」

Sarah：「唔得架阿明，真係唔可以，唔洗娶我架，我知你愛我就夠，你自己安全更加重要。

」

嘩，咁好既女仔去邊度搵？我睇電視d女人係一定要一個名份先安心，估唔到Sarah居然會唔要。

一諗到咁，我就忍唔住，大大啖咁錫落去，佢想推開我架，不過我捉住左佢，佢推唔開我。

我錫到夠皮先將嘴移開，佢即刻打左我心口兩錘。

Sarah：「衰人！我叫非禮架！

」

我：「唔知邊個鍚我先呢？

」

佢聽到之後即刻無聲出，紅都面哂咁。

我同佢含情默默咁對望左半分鐘，佢先開口講野。

Sarah：「咁結婚果邊你打算點呀…」

我：「唔結啦~訂婚都唔訂，我係一個浪子黎架嘛，唔會俾婚姻束縛住我，可能有朝一日我會飛哂你地五個，一個人去流浪添。

」

Sarah：「你敢！

」

佢用佢個隻著左高踭鞋既美腿一下踩左落黎，痛到我媽媽聲咁叫。

我：「好痛！我講下笑咋！我唔會飛你地架！」

Sarah：「哼！

」

佢擰咩臉，擺出一個嬲樣，但係又好好笑，因為我知道佢唔係真嬲。

我行埋去，攬住佢條腰，笑笑口咁氹佢。

我：「返去啦，佢地等緊我地架。」

佢照舊哼左一聲，不過都係跟左我行。

返到去會場，我發現其餘七個人都坐哂係同一張台，肯定係佢地做過手腳啦。

不過都好既，可以一次過講清楚哂所有野，唔洗走兩轉。

我無打算瞞佢地，一五一十將所有野講哂出黎，講完之後大家都靜左落黎望住我。

靜左一陣，羽晨突然開口：

「咩係後盾呀？點解結婚可以令個後盾硬D既？」

大家聽到咁都笑左出黎，只有羽晨一個仍然唔知發生咩事。

二家姐：「聽落咁似韓劇既，又訂婚又盛。」

Anna：「等我睇下佢比D咩女仔你揀。」

Anna一手拎左我放係檯上既ipad，同Ellen係度睇呀睇，仲笑得好開心。

我唔明點解佢地笑得咁開心，於是我問佢地。

Anna：「你睇下呢個，幾樣衰！哈哈哈哈！」

Ellen：「仲有呢個呀！肥過部坦克車呀哈哈哈哈！Ellie你都睇下，笑死我啦！」

Ellen將部ipad遞左比旁邊既Ellie，不過Ellie一眼都無睇，直接遞左比我。

嗯，都係Ellie好，一D都唔八卦。

我接個部ipad，開始睇下到底李生推介咩女仔比我，嘩唔睇仲好，一睇我真係屌左出聲。

名單入面全部都係珍禽異獸，甚至可以話係世界奇觀，肥醜樣樣齊，睇見都反胃。

Ellen：「哈哈哈哈Anna你睇下佢而家呢個樣！」

Anna：「哈哈哈哈傻仔明！揀個做老婆囉！我唔會介意架。」

佢地笑聲大到全場都可以聽到，我甚至feel到有人開始用一種不屑既眼神望住我地。

我就死都唔信全部都係珍禽異獸，死搵爛搵，終於比我搵到一個靚女，仲唔吐氣揚眉！？

我：「好！我就同呢個叫咩愛麗絲既女仔訂婚！佢靚過你地添呀！」

我將ipad既screen面向佢地，show比佢地睇下呢個叫愛麗絲既女仔係有幾靚。

有圖有真相，佢地一見到張相都即刻靜左落黎唔出聲。所以話有圖幾有用，可以服眾。

咦，奇怪，佢地做乜咁耐都唔出聲既，唔通真係嚇親佢地？

佢地個個都臉露懼色，睇黎呢個愛麗絲既殺傷力真係好大。

佢到底係咩人呢？有小小好奇添。

我：「哈哈，知驚啦？講下笑咋我！我有你地就已經夠喇，仲邊洗要其他人呢。」

安慰既說話已經拋左出去，但竟然無乜效果，就連一早同佢講左唔會玩咩訂婚既Sarah面色都好差。

哎…點算好呢，我好似做錯事添。

Ellie：「食野先啦，我一陣再同你講。」

坐我旁邊既Ellie用一個好細聲，細聲到只有我先聽到既音量同我講。

當時我亦無其他可以救場既方法，唯有聽Ellie講啦。

不過五個女仔入面唯獨Ellie一個面不改容，好似對「愛麗絲」但呢個名無乜感覺咁。

到底呢個「愛麗絲」係咩人咁把炮？一個名就可以令幾個嘈到拆天既女仔收哂聲，令我愈來愈好奇了。

但係去到散席我地呢檯都仲係好忙，好多人走埋黎打招呼，R水吹，我地想行開都無乜機會。

我終於忍唔住，唔理走埋黎R水吹既人，自己同Ellie傾起上黎。

我：「你又話會同我講果個愛麗絲係咩人既？」

Ellie：「啊我差d唔記得左添，而家就話你知。」

「其實無乜野既，只係佢好厲害，19歲已經接手左佢屋企大部分既生意，仲打理得有聲有色，業務蒸蒸日上。」

「加上人又生得靚，我估家姐佢地都係因為咁先會即刻無聲出啫，無事既。」

我：「哈哈，同我估既一樣啦，佢地見果個愛麗絲又靚又叻，怕人地會搶走我，所以先咁驚。」

「不過點解Ellie你好似完全唔驚咁既？」

Ellie：「因為我對你有信心囉。」

有信心呢三個字令我好開心，但係我同時亦諗緊點解Sarah佢地唔肯比信心我。

唔唔緊要，我已經諗好有咩方法可以令佢地重拾信心。

我並無注意到，Ellen而家用緊一個憂憂既眼神望住Ellie。

大家姐：「好啦散席啦，我地都返去啦~」

大家姐咁講我先發現賓客們已經開始陸陸續續咁離開，好似唔想留係呢度多一秒咁。

二家姐：「嗯，Anna你地都返去你地父母度，同佢地一齊返屋企啦。」

Anna：「咁好喇，傻仔明我地星期一…」

我：「等等先。」

我打斷左Anna既說話，搞到大家都望住我。

我：「我想大家跟我去一個地方先。」

佢地你眼望我眼咁，就係無人反對，所以個個都跟我行。

反正我要去既地方又唔遠，少少既耐性佢地應該都有既。

我同趕住離開既賓客完全相反，我並無走去門口方向，反而行入去會場更深入既位置。

因為我要搵既人，仍然坐係入面。

最後，我帶住佢地八個人行到去對正舞台中央既果一張檯，張檯仍然坐著幾個人，佢地仍然係度談笑風生，絲毫無離開既意慾。

我並無留意其他人係邊個，只係一直望住我要搵既人，李生。

我行到佢身後，將頭先佢俾我既ipad放係佢面前。

我：「呢樣野，比返你。」

咁樣既舉動，即時震撼到好多人，我見到坐係對邊既人都o哂嘴，唔知發生咩事咁樣。

我甚至聽到Sarah同Ellen係我背後「嘩」左一聲。

但係因為佢背向我，令到我睇唔到佢既表情，唔知佢而家而家有咩反應。

不過我見到佢拎起左部ipad，仲掃左兩掃，用一個好平淡既語氣拋下一個「坐」字，好似一D打擊都無。

坐字一出，原本坐係佢旁邊既一個女人即刻讓開，騰空個位比我，我當然無拒絕，即刻坐左落去。

坐左落去我先發現佢既神情非常平淡，好似完全唔當係一回事咁。

我：「我…」

李生：「愛麗絲唔錯嘛？

」

點解佢一黎就識講愛麗絲！？

我：「點解…」

李生：「放咁多珍禽異獸入去的話，你一定會注意到愛麗絲，除非你係盲或者你已經放棄左再睇落去。」

我已經隱若feel到佢既打算到底係咩。

我：「即係由一開始你就打算叫我揀愛麗絲做訂婚對象？」

李生：「咁我份人都好尊重個人意志既，若然你係揀左果堆珍禽異獸的話我都唔會有意見。」

好一句尊重個人意志，明明就係無選擇，但仲裝飾到好多選擇咁，生意人真係生意人。

不過我都要多謝你呢句尊重個人意志。

我：「嗯，既然係咁的話，我就選擇唔訂婚，希望你可以尊重我既個人意志。」

李生：「咁你即係打算…」

我：「我亦無打算同佢地任何一個結婚，所有野都維持現狀。」

「請你放心，就算無咩後盾都好，我都會係七星站穩陣腳，做到你之前交代我做既事。」

我故意唔詳細講「交代我做既事」到底係咩，因為仲有外人係度。

若然俾其他人知道佢其實係打算令其他七星內鬥的話從中漁人得利的話，佢應該都會難堪。

我咁做係留左幾分面比佢，就即管睇下佢有乜回應。

不過未等到佢既回應，我就聽說一把女人既笑聲係我身邊傳出。

我望向笑聲既來源，發現笑既人原來就係頭先讓位比我既女人。

或者唔應該用「女人」去稱呼佢，因為睇落佢同我年紀差唔多，用「女仔」稱呼會較為貼切。

而且佢呢個樣…好似係邊度見過？

女：「哈哈哈哈，你真係同傳聞一樣，係一個相當有趣既人，居然夠膽咁樣頂撞李Uncle。