「續寫」無啦啦多左幾個家姐同阿妺: 不同了
星期六，我地成村人又去左唔知係邊個搞既Party。
今次 Anna佢地三個直頭係會場外面等我地，話要等埋我地先入去。
我唔明點解，於是問下Ellen，結果得到以下既回答：
「我地怕比人撩嗎~所以咪等埋你先入去，等人地知道我地三個已經名花有主，知難而退囉。」
雖然唔知佢講既係真定係假，但係我聽到佢咁講，個心都係高興左一下既。
所以我地九個人就浩浩蕩蕩咁一字型行入會場，直頭好似黑社會咁，爽。
可惜我身後既都係女人，如果係阿威佢地的話，肯定好有氣勢。
不過都係算啦，上流社會既宴會講咩氣勢。
但係今日呢個party好似怪怪地咁既？
係就係有好多人係度，但係點解個場會咁靜既？同新年晚會果種熱鬧完全係兩個世界喎！
個個都係度交頭接耳，無人敢大聲講野，搞到我莫名其妙咁緊張起黎，唔敢失禮。
我：「喂Sarah，呢個Party係邊個搞架？點解大家都咁緊張咁既？」
Sarah：「哦係喎唔記得同你講添，今日呢個party其實係…」
「阿明！我地有一段時間無見啦！」
嘩屌！邊個阿叔痴撚左線！係呢度咁大聲講野，仲要叫我個名！
我四圍望，睇下到底係邊個仆街咁on9，好快就俾我搵到，因為對方就行緊過黎。
當我知道對方係邊個果陣，我即刻呆左一呆，仲想將自己頭先係心入面講既野全部食哂落肚。
因為對方就係李生。
李生：「無見一排你仲係咁有艷福喎哈哈，身邊全部都係靚女，排場仲厲害過我呢個主人家。」
我：「eh…咁岩撞到咪一齊黎囉，邊有咩排場呢…」
係佢面前，我總係莫名其妙咁有一份畏懼，連企直個人都唔係好敢。
咦咪住先？主人家？我有無聽錯？？
我：「李uncle你話你係主人家..？」
李生：「係呀，有乜問題？」
我：「eh…」
係喎，有乜問題呢，我仲乜要問呢？
李生：「今日係我用我個孫既名成立既慈善基金既成立日，所以開個party慶祝一下。」
我：「孫..係指阿偉？」
李生：「當然唔係佢啦，係阿軒。」
李生講既時候指左一指台上，我亦望左過去，發現台上寫住「俊軒慈善基金」。
啊…唔怪得無人敢大聲講野啦，全港首富搞既party邊個夠膽失禮。
李生：「方唔方便講兩句？只係我同你。」
雖然呢個要求係好突然，我仍然好爽快咁應承左，因為我根本無可以拒絕佢既條件。
我擰轉頭，面向我身後呢班大帝。
我：「你地去坐低先喇咁，我同李uncle去傾兩句，好快就返黎。」
可能因為對方係李生，呢班大帝對於我要行開都無乜意見，好快就自動自覺咁行開左。
我：「李uncle，你想係邊度傾？」
李生：「出去啦，呢度人多，唔係好方便，跟我黎。」
於是我就跟住佢同佢身邊既兩個保鑣行啊行，最後行到出戶外。
呢度風涼水冷，人影都無隻，係一個講祕密既絕好地方。
李生：「你兩個，係入面等我，我唔希望有人打擾我地，明白無？」
保鑣：「明白。」
兩個保鑣就咁退場，得返我同李生兩個。
李生：「頂，早知叫佢兩個拎張櫈，咁我地就唔洗企係度講咁白癡。」
我：「eh…洗唔洗我去叫佢地去拎？」
李生：「唔洗啦，無謂哂時間，係呢阿曹佢最近點？公司搞成點？」
我：「多得李Uncle你筆錢，Uncle佢間公司總算渡過難關，仲賺左好多錢添，而家佢同左我阿媽去左旅行。」
李生：「少少意思，幫朋友啫。而家搞得掂就好啦。」
斷估佢特登叫我出黎唔係只係為左問呢件事掛..呢D事佢自己都有辦法打聽到架。
佢咁樣叫我出黎，應該係想問我七星既事，或者係早幾日既事…
李生：「七星既生活慣唔慣？你都做左一排啦，想知你感覺點。」
果然係咁，佢係衝住七星而黎。
我：「又無話慣唔慣既，畢竟七星都無乜野做，聚會都無乜。」
李生：「唔？你咁講係咩意思？」
吓佢唔係咁都聽唔明呀？
我：「七星無乜野做，好似只係個身份咁，所以多左呢個名都無乜特別，生活都無乜改變。」
李生：「唔係，你咁講就錯喇。」
「由你做左七星果一刻開始，你既生活就已經唔同左。」
今次到我聽唔明啦。
李生：「我想你知道，你而家要提防既人唔只其餘既七星咁少，你身邊既人都要提防一下。」
「因為會有人可能為左巴結其餘既七星去害你，你明唔明我講乜？聖所羅王開放日既事就有可能係咁。」
我：「點解你會知道呢件事？」
李生：「當日我都係度，之後我亦有打聽一下，所以我今日先同你講呢D野，想你提防一下，要有D戒心。」
「不過講開又講，呢個亦係阿曹唔想你入七星既原因，佢話唔想D細路咁細個就咁樣。」
我：「嗯…」
完全唔知比咩反應佢好，我諗我都需要一段時間去消化一下。
李生：「同埋仲有一樣野想同你講，呢個，拎住。」
李生遞左部ipad比我，唔知有咩用途。
李生：「入面有一堆同你差唔多大既女仔既資料，你揀一個，我幫你同對方訂婚。」
我：「吓！做乜呀！李uncle你都知我已經有五位女朋友架！」
李生：「你係七星既後盾唔夠硬，好容易一下被人搞掂，你需要一個好後盾。」
「我都知道你有一班女朋友，但畢竟只係女朋友，未必比到咩支援你。」
「除非…」
我：「除非？」
李生：「你同其中一個結婚，咁樣或者可以好D。」
又係結婚呢個話題？我而家先16歲咋…