行行下街，突然撞返前度: 章節三

係我講到一半嘅時候，阿靜已經淚流滿面，不過我又何嘗唔係眼淚在心裡流呢。自從同阿靜分手之後，我用咗整整兩年時間先企得返起身，不過對於愛情，甚至女性都失去信心，遑論再開展一段新戀情…… 

即使五年嚟嘅心結今日終於打開咗，而我亦都好想同返阿靜一齊，不過內心對愛情嘅恐懼比起對阿靜嘅愛意來得更強烈，最後只可以講出一番違背良心嘅說話…… 

「咁你做我一日男朋友丫。」 

「阿靜……」 

對於阿靜提出嘅要求，我除咗驚訝，其實仲有啲喜出望外。畢竟呢幾年嚟，我都曾經期待過可以有機會同返佢一齊。





「冇得say no，今日去返哂有我哋回憶嘅地方。」

「點去得哂呀……」

「點唔得啫，嗱 而家先去海港城，再去荃灣，到你屋企。」

「喂喂，我屋企都係？！」

「唔係咩，個陣一放假就一齊係你屋企睇電視，瞓覺，其實你屋企先係最多回憶嘅地方。」





「問題係邊夠時間呀……」

「再講就唔夠時間架啦！」

-------------------------------------------
係海港城嘅玩具反斗城內，有兩個大細路係到玩「僕哩哩」。

「喂呀，點解你次次都咁快搵到架！」阿靜洩氣咁問。

「好簡單啫，因為我係千禧年代嘅福爾摩斯，哇哈哈哈！」





「到你啦，等我神探阿靜用最快嘅速度嚟搵你出嚟啦！」

一分鐘後……

「丫，佢係邊呢，都行哂成個場架啦，都唔見嘅……」

阿靜拎起電話打俾阿恆，當打通嘅時候，鈴聲就係佢嘅背後響起。

「你哩係邊架，點解我搵唔到嘅？」

「乜神探都會有搵唔到嘅人架咩！」「我哩咗係你冇後眼所以睇唔到嘅地方囉！」

「咦，衰人！」





阿靜一邊講一邊追打我，就係呢個小朋友視之為天堂嘅地方，我同阿靜兩個成人係到追逐打罵，好似回歸到當年一樣。講起，都唔知幾耐冇人會用衰人嚟稱呼我，原來最純真嘅愛情入面，連俾人叫衰人，聽落都甜在心頭。我好想……阿靜可以一世都係我身邊，將衰人一詞變成佢對我嘅專屬稱呼。

離開尖沙咀去荃灣嘅時間係旁晚六點。