行行下街，突然撞返前度: 章節四

「去荃灣廣場個天台公園先啦！你帶路。」阿靜基本上好似plan過哂啲行程咁，而我只係負責帶路。

五年後，同樣嘅人，同樣嘅路，唔同嘅感覺。當年初戀，兩小無猜嘅純真感覺，為咗小小事已經可以樂透半天嘅心情，已經不再復還。

我哋坐咗係天台公園啲長櫈到，望住小朋友係到盪鞦韆，佢哋天真嘅臉真係叫人羡慕又妒忌。

「做咩想嚟呢到嘅？」我問阿靜。

「咁呢到充滿住你嘅過去嘅回憶架麻，況且以前我哋都嚟過，都算係我同你嘅回憶丫。」





當年同阿靜講過，由小學到中學，每次聚會都會嚟呢到。諗返起，原來都唔知幾耐冇嚟過，但估唔到阿靜咁多年都仲記得，對於佢咁記得我所講嘅嘢，我真係有種想喊嘅衝動。

坐咗陣，我哋又轉移陣地，今次係荃灣碼頭。當年嘅我哋都係個學生，冇收入，所以好少行商場，最常去嘅哋方就係海邊，青衣海濱長廊、荃灣碼頭、尖沙咀碼頭等。身邊嘅朋友都話：「你拍拖拍到咁悶都有人肯陪你癲，你執到啦！」當時我的確覺得我真係好幸福，但亦都係阿靜親手將我嘅幸福毀滅，呢個傷口到今日始終冇辦法釋懷……

我同阿靜就好似以前咁，由西鐵站行到去盡頭，因為太遠加上夜晚嘅關係，個到除咗少量跑步嘅人經過之外就只係得我同阿靜。我哋又係搵張櫈坐咗係到，望住海邊，四圍都好寧靜，我好想好想，永遠都停留係呢一刻。

坐咗陣，我開始覺得肚餓（鬼咩，3點幾食完個碗稀到水咁嘅粥之後再冇食過嘢），之後就同阿靜行返去食飯，時間係8點半。我邊行邊諗，而家去食飯，快極都半個鐘，啫係返得我屋企嚟起碼都10點，應該唔會再嚟我屋企啦掛？

點解我咁唔想佢嚟我屋企？我幾經辛苦先將以前同佢係屋企發生嘅事淡忘，真係好怕佢上完嚟，令我要再一次學習點樣忘記……





由於佢依然好想去我屋企，所以揀咗間出餐快過你等杯麵嘅老麥，我唔知佢係受「捱麥記潮文」影響，想我覺得佢娶得過，定係真係貪快。之不過，挑，快餐咋麻，咁易難到我咩，於是我用食法國餐嘅速度去食一個原本10分鐘乜都ko得哂嘅魚柳bellchan，今次我仲唔完勝。

食完10點都嚟緊，邊到都唔洗去啦掛。

「食咁耐架你，你睇下，10都嚟緊啦！」

「哦，呢排我腸胃唔好，係要食慢啲俾佢消化下架啦。」都唔知要幾多個好假的肥仔上身先講得出呢番說話 。

「返屋企啦。」





我終於等到佢呢句啦！

「我送你丫。」

「咩呀？返你屋企喎。」

我太睇少佢……