行行下街，突然撞返前度: 章節二

「嘩，呢到完全唔同哂嘅，以前明明仲係個地盤嚟架？你記唔記得呀，個陣仲係地盤，走個陣又落雨，周圍幾恐怖呀！」 

「小姐，以前都好似係五年前架啦喎。何況呢到都起好咗四年啦。」 

「你…之後都有嚟過……？」 

「係呀，因為個陣…仲掛住你丫麻……」 

「咁而家呢？」 





每當被阿靜問到呢啲問題，我都頓時語塞… 

「咁不如我問返你丫，當年你有冇一刻愛過我？」 

「有，一直以嚟都咁愛，到而家都係！」阿靜答得好爽快，一啲猶豫都冇，咁更加令我呢幾年嚟嘅問題一湧而出。 

「咁點解當年會分手？點解當年你要咁決絕？點解……」 

太多嘅問題同時湧現係我腦海入面，令我一時之間都唔知應該點問起…… 





「阿恆，當年嘅我一直都係真心愛你，只不過你個陣太幼稚，太多空想，我唔敢將自己嘅下半生交俾一個望唔透未來嘅人。當日嘅我過得絕對唔會比你好，我做到咁決絕都好辛苦。因為我知道阿恆你係一心一意咁愛我，而你亦都係第一個感動我嘅人，不過我知道如果俾你繼續活係幻想當中，你就冇辦法由絕望中企起身，發奮做人，所以我唯有同你分開，迫你成長，我咁做可能好自私，對唔住……」 

即使而家終於知道當日令我傷心欲絕嘅原因，我依然未能夠釋懷。無可否認嘅係，當日嘅我的確係好幼稚，終日沉溺係幻想嘅未來入面，從來冇用行動去將幻想變成現實。不過今日嘅我呢？即使未必可以同返阿靜一齊，但我又有冇資格去開展一段新嘅感情，有冇資格令一個人嘅下半生交托俾我呢？ 

我走近鐵欄，一邊感受住海風嘅輕撫，一邊問阿靜：「如果當日你自私嘅決定，因為估計錯誤，我因為受唔住打擊而死咗呢？咁你希望見到嘅，成熟嘅阿恆就永遠都唔會出現架啦喎……」 

「我知道你唔會，我好清楚你為人，一個會以父母利益將來行先嘅你，唔會忍心留低你父母而走去死。而且今日你都好地地咁企係我面前，證明我當初嘅決定冇錯丫。」 

我唔知我應唔應該興幸阿靜咁了解我，不過佢嘅一字一言都令我搵唔到反駁嘅餘地。 





靜止嘅空氣再次將我倆包圍…… 

「阿恆…對唔住…」 

「我由始至終都冇嬲過你，我只係嬲自己點解冇辦法令你留係我身邊…」 

講完之後，我感到有對手從後攬住我，唔洗問都知係阿靜。呢個久違嘅擁抱感覺好奇妙，由當日分手之後我一路懷念，一路祈求可以再一次返嚟我身邊嘅感覺，直到而家幾經辛苦終於可以開始淡忘回憶，一瞬間返返嚟我嘅腦海入面。 

「阿恆，不如我哋一齊返丫…」 

我搖一搖頭，慢慢咁將阿靜雙手鬆開。 

「點解呀？你有女朋友啦？」 

「自從同你分手之後，我都冇再拍過拖啦。」 





「咁啫係你唔再愛我啦…？」 

我轉身面向阿靜，用好堅定嘅眼神對住佢講：「當年嘅我真係好愛當年嘅你，不過五年後嘅今日，我哋已經唔再係當年嘅我哋，我真係唔敢再拍拖，就算愛都冇可能再走返埋一齊。阿靜，如果可以，我都好希望我哋可以拖住手走落去，因為我真係好愛你，但係我相信而家嘅你，絕對可以搵到一個比我更加好嘅男人，就由佢代我永遠照顧你啦。」