行行下街，突然撞返前度: 章節一

有一日，當我係條街到漫遊之際，見到一個熟悉嘅身影係不遠處。 

我嘅身體下意識轉身就走，不過我行咗幾步之後就俾人從後拉住… 

「阿恆，咁耐冇見，做咩一見到我就走呀？」一把既熟悉又陌生嘅聲音再次出現係我腦海當中…… 

「咦！阿靜？我冇為意你係邊呀，咁啱醒起公司有啲嘢做，咪諗住返去做埋佢先囉。」 

「咁耐冇見，不如食餐飯丫，去返以前我哋成日去個間粥鋪丫。」佢一邊講一邊扯住我衫袖。 





記得當年同阿靜分手嘅時候，我每日都傷心欲絕，以淚洗面。五年後嘅今日再遇返佢，佢依然係當日咁靚，我個心依然對佢存有一份愛…… 

「um…好丫。」 

「哦，頭先又話有嘢做，你呃我！」佢一邊講一邊嘟起個咀，旁人睇落可能會覺得好幼稚，不過係我眼中，真係好可愛。 

「丫，你丫！」 

「嘻！」佢嘅笑容依然咁天真… 





五年後，同一地點，當年我哋並肩而坐，今日我哋嘅距離已經被張枱隔開。難得嘅係，一間小小嘅鋪頭係呢個租金好似坐火箭咁上升嘅香港仍然可以生存落嚟，令我同阿靜仲可以搵返我哋嘅回憶。 

「係呢，你呢排點呀？」阿靜首先打破冷場。 

「都係普普通通咁啦，同普遍嘅打工仔冇乜分別，返工等放工，放工等放假，夜晚唔願瞓覺，日頭唔願起身咁啦。」 

「咁，你而家有冇拍拖呀？」估唔到阿靜咁快問呢啲咁敏感嘅問題…… 

「丫，粥嚟啦，食咗嘢先啦。」 





「你記唔記得呀，以前你食完啲腸粉都會將啲混醬撈埋落啲粥到，乜真係咁好食咩？」 

「你試下咪知囉。」我作狀將啲醬倒落阿靜碗粥到。兩個你推我擋咁擾攘咗一陣… 

「唔玩啦，食嘢先啦！」之後大家繼續各自一邊食嘢，一邊玩手機。 

係呢個年代，食飯玩手機就好似變咗大多數人嘅通病，明明大家約出嚟食飯，偏偏各自修行。唔通平時獨處嘅時候仲玩唔夠，連朋友間嘅小聚都唔可以一心一意咁進行？ 

我望住阿靜，感覺我哋嘅距離彷彿唔止隔咗一張枱。空氣再一次靜止咗係我哋之間…… 

由於見到外面好多人排隊，我同阿靜都係快手食完之後就賣單走人。 

出到去之後，本來我打算返屋企，不過阿靜話： 

「食完嘢不如行陣散下步啦，我想去返以前成日去個個海邊。」 





五年前，我哋有個習慣，每次食完嘢都會不知不覺咁行去海邊，雖然行成個鐘先到，但因為有對方係身邊，再遠都願意行落去。 

沿途我哋都係講下身邊嘅人同事，而且亦都係一啲冇自己所涉及在內嘅事。 

不經不覺我哋行到嚟海邊，一個屬於我同佢嘅寧靜世界。係今日嘅香港，無論大街小巷你都會見到有強國人嘅蹤跡，就連尖沙咀海旁，荃灣碼頭之類嘅地方都會因為附近名店林立而令某幾個海邊成為強國人嘅休閒地。 

幸運嘅係，呢個屬於我同阿靜嘅海邊，附近冇名店又冇美景，只有一望無際嘅大海同一艘艘嘅貨船。